យុវតីបីនាក់នាំយកតៅហ៊ូអាំងរសជាតិដើមពីប៉ោយប៉ែតមកភ្នំពេញ

2015-11-16 17:05:21
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតីបីនាក់បានរួមគ្នាបង្កើតអាហារសម្រន់ថ្មីរសជាតិដើមមកពីប៉ោយប៉ែតគឺតៅហ៊ូអាំងរសជាតិហឹរដែលយុវវ័យមួយចំនួនកំពុងពេញនិយម។ យុវតី សឹង សាវី ដែលកំពុងសិក្សាផ្នែកទំនាក់ទំនងអន្តរជាតិនៅសាកលវិទ្យាល័យបញ្ញាសាស្ត្រ និងមិត្តភ័ក្ដិរបស់នាងពីរនាក់ទៀតបានសម្រេចចូលហ៊ុនគ្នាបើកហាង «តៅហ៊ូអាំងរសជាតិដើម» នៅជិតសាលាសន្ធរម៉ុកម្ដុំក្រោយសណ្ឋាគារឡឺប្រេស៊ីដង់ឡើងនៅខែមិនាកន្លងទៅ។

កញ្ញា សឹង សាវី កំពុងអាំងស្លាបមាន់ និងងាវសមុទ្រ

អ្នកដែលចូលចិត្តអាហារដែលមានរសជាតិហឹរ ហាងរបស់នាងអាចជាកន្លែងដ៏ល្អសម្រាប់ភ្លក់រសជាតិអាហារសម្រន់ដ៏សម្បូរបែប។ តៅហ៊ូអាំង ស្លាបមាន់ជាប់ស្បែក និងប្រហិតអាំងជាអាហារពិសេសប្រចាំហាងរបស់នាងដែលភ្ញៀវមកទទួលទានកម្ររំលង។

និស្សិតច្បាប់ វ័យ ២២ ឆ្នាំកញ្ញា អ៊ូ សាវរ៉ា ដែលកំពុងអង្គុយញ៉ាំនៅទីនោះជាមួយប្អូនស្រីនិយាយថា នាងចូលចិត្តញ៉ាំស្លាបមាន់អាំងព្រោះស្លាបមាន់នៅទីនេះគឺជាប្រភេទស្លាបជាប់ខ្លាញ់ដែលខុសពីកន្លែងផ្សេង។

ដោយឡែក សៀវ ម៉ី ដែលកំពុងរីករាយនឹងអាហារជាមួយមិត្តភ័ក្ដិរបស់នាងបីនាក់ក៏ចូលចិត្តតៅហ៊ូអាំងដែរ។ និស្សិតជំនាញធនាគារវ័យ ២១ ឆ្នាំរូបនេះនិយាយដូច្នេះ៖ «ខ្ញុំចូលចិត្តតៅហ៊ូអាំងព្រោះឆ្ងាញ់ ហើយប្លែកពីគេ។ មួយទៀត បង្គាបកសម្បកស្រួលញ៉ាំត្រូវហ្នឹងទឹកជ្រលក់ហ្មង៎!»។

ម្ចាស់ហាងវ័យក្មេង កញ្ញាសារីថា នាងចេះធ្វើតៅហ៊ូអាំងនេះដោយការទៅរៀននៅថៃ និងយកមកច្នៃទឹកជ្រលក់ដោយខ្លួនឯង។ មូលហេតុដែលនាំឲ្យសម្រេចបើកហាងដោយសារមានការជំរុញពីមិត្តភ័ក្ដិ។

«ដំបូងធ្វើញ៉ាំជុំគ្នានៅផ្ទះជាមួយមិត្តភ័ក្ដិធម្មតាទេបង។ តែញ៉ាំទៅ មិត្តភ័ក្ដិគេថាឆ្ងាញ់ គេក៏ជំរុញឲ្យខ្ញុំបើកកន្លែងលក់ខ្លួនឯង»។ ម្ចាស់ហាងដដែលបន្តថា ចំណុចពិសេសរបស់ហាងនាងគឺក្រៅពីរសជាតិរសជាតិប្លែកពីគេ នាងមានបន្ថែមទឹកស៊ុបហ្វ្រីជួយកាត់បន្ថយរសជាតិហឹរ៕