Jessie J សរសេរលើ Insta ថាការមកប្រគំតន្ត្រីនៅកម្ពុជាជាកម្មវិធីបញ្ចប់ឆ្នាំដ៏អស្ចារ្យមួយ

2015-12-15 16:32:34
ចំនួនមតិ 0 | ចំនួនចែករំលែក 0

ចន្លោះមិនឃើញ

"ការមកប្រគំតន្ត្រីនៅកម្ពុជាជាកម្មវិធីបញ្ចប់ឆ្នាំដ៏អស្ចារ្យមួយ" Jessie J បានលើកឡើងនៅក្នុងគណនេយ្យInstagram របស់ខ្លួនកាលពីសៅរ៍កន្លងទៅ អំឡុងពេលដែលនាងកំពុងនៅក្នុងប្រទេសកម្ពុជានៅឡើយ។

ម្ចាស់បទ “Flashlight” បានសរសេរនៅលើ Instagram ទៀតថា " ក្នុងប្រទេសដ៏ស្រស់ស្អាតមួយ គឺកម្ពុជា គឺជាឆ្នាំនៃដំណើរទស្សនកិច្ចដ៏អស្ចារ្យមួយ ហើយខ្ញុំសូមអរគុណទៅដល់អ្នកទាំងអស់គ្នាដែលធ្វើឲ្យវាអាចកើតឡើងបាន! អ្នកដឹងច្បាស់ហើយថាអ្នកទាំងអស់គ្នាជាអ្នកណា”។

មិនតែប៉ុណ្ណោះតារាចម្រៀងសញ្ជាតិអង់គ្លេសនេះសម្ដែងក្ដីរំភើបដែលមិននឹកស្មានដល់មួយក្នុងថ្ងៃធ្វើសន្និសីទមុនការប្រគំតន្ត្រី នៅកោះពេជ្រថា អ្នកគាំទ្រកម្ពុជាបានផ្ដល់ឲ្យនាងនូវភាពកក់ក្ដៅមិននឹកស្មានមួយ ពោលគឺតាំងពីនាងបានចុះមកជាន់ដីកម្ពុជា រហូតមកដល់កន្លែងធ្វើសន្និសីទទៀត កន្លែងស្នាក់ រួមទាំងការប្រគំតន្ត្រីទៀត អ្នកគាំទ្ររឹតតែច្រើនឡើងៗ។

Jessie J ថ្លែងក្នុងសន្និសីទ៖ “ខ្ញុំសប្បាយចិត្តមែនទែន ព្រោះនឹកមិនដល់ថា អ្នកគាំទ្រកម្ពុជា គាំទ្រខ្ញុំច្រើនយ៉ាងនេះ តាំងពីចុះពីលើយន្តហោះ បន្តមកដល់សណ្ឋាគារ និងមកដល់ឥឡូវនៅតែមកគាំទ្រ ខ្ញុំសប្បាយចិត្ត និងសូមអរគុណសម្រាប់ការគាំទ្រ"៕

អត្ថបទ៖ ថា ម៉ាលីដា