អ្នកជំនាញថា ២០១៥ បរិមាណភាពយន្តកើនឡើង ប៉ុន្តែគុណភាពថយចុះ

2015-12-16 13:17:19
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតមកដល់ចុងឆ្នាំ ២០១៥ នេះ មានភាពយន្តខ្មែរប្រមាណ ៣០ រឿងហើយ បានចាក់បញ្ចាំងតាមរោងភាពយន្តក្នុងប្រទេសកម្ពុជា កើនឡើងជាងឆ្នាំ ២០១៤ ដែលមានត្រឹមតែ ២១ រឿងប៉ុណ្ណោះ។ នេះបើតាមការលើកឡើងរបស់លោក ស៊ិន ច័ន្ទសាយ៉ា ប្រធាននាយកដ្ឋានភាពយន្ត នៃក្រសួងវប្បធម៌ និងវិចិត្រសិល្ប។

មន្ត្រីជំនាញដដែលអះអាងបន្តថា យ៉ាងហោចណាស់ ក៏នៅមានភាពយន្តប្រមាណជិត ១០ រឿងផ្សេងទៀតផងដែរ កំពុងត្រៀមចាក់បញ្ចាំជាបន្តបន្ទាប់រហូតដល់ដើមឆ្នាំ ២០១៦ ឯណោះ។ ប៉ុន្តែលោកបានរិះគន់ថា សមិទ្ធផលកុនខ្មែរទាំងនោះ បែរជាថយចុះផ្នែកគុណភាពទៅវិញ បើប្រៀបធៀបទៅឆ្នាំកន្លងមក ទាំងផ្នែកបច្ចេកទេស ឬជំនាញផលិតជាដើម ដែលជាកង្វល់សម្រាប់នាយកដ្ឋានរបស់លោក។

"បើរឿងរបស់យើង អត់មានគុណភាពយ៉ាងដូច្នេះ មិនអាចប្រកួតប្រជែងជាមួយភាពយន្តបរទេសចូលមកកាន់ទីផ្សារយើងទេ ហើយការគាំទ្ររបស់ទស្សនិកជនក៏កាន់តែបាត់បង់ទៅដែរ"។ លោក ស៊ិន ច័ន្ទសាយ៉ា ថ្លែងមកកាន់ Sabay ព្រឹកនេះ។ លោកបន្តថា នាយកដ្ឋានភាពយន្តកំពុងស្វែងរកដំណោះស្រាយចំពោះបញ្ហាកម្សោយគុណភាពកុនខ្មែរ ហើយជាជំហានដំបូងលោកបានបង្កើតឱ្យមានមហោស្រពភាពយន្តជាតិ ដែលទើបបញ្ចប់ទៅកាលពីពេលថ្មីនេះ ដោយក្នុងឱកាសនោះ ក៏មានសិក្ខាសាលាជជែកជាមួយផលិតករទាំងអស់រកដំណោះស្រាយផងដែរ។

ប្រធាននាយកដ្ឋានឱ្យដឹងទៀតថា មានតែការពង្រឹងគុណភាពរបស់ផលិតករប៉ុណ្ណោះ ទើបអាចជួយស្រោចស្រង់វិស័យភាពយន្តខ្មែរ ឱ្យរីកចម្រើនទៅមុខបាន និងអូសទាញទស្សនិកជនមកទស្សនាកុនខ្មែរឡើងវិញ។ នាយកដ្ឋាននឹងពង្រឹងការត្រួតពិនិត្យលើអត្ថបទភាពយន្តនានា មុនពេលអនុញ្ញាតរៀបចំដំណើរការថត។ ដោយឡែក ក្រសួងវប្បធម៌ បានរៀបចំស្រេចបាច់ហើយ ដើម្បីបើកសាលាបណ្ដុះបណ្ដាលជំនាញភាពយន្ត បន្ទាប់ពីមើលឃើញភាពទន់ខ្សោយក្នុងវិស័យនេះ៕

អត្ថបទ៖ សំ ជំនាញ