ក្រសួងអប់រំជំរុញសាលាបណ្ដុះបណ្ដាលបង្កើតកម្មវិធីសិក្សាតាមអនឡាញ

2015-12-17 23:25:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារមើលឃើញការសិក្សាតាមប្រព័ន្ធអ៊ីនធឺណិត (E-Learning) អាចបង្កើនប្រសិទ្ធភាពសិក្សារបស់សិស្សនិស្សិត ក្រសួងអប់រំបានជំរុញដល់គ្រឹះស្ថានសិក្សាទាំងឡាយឈានទៅពង្រីកកម្មវិធីបណ្ដុះបណ្ដាលលើប្រព័ន្ធអ៊ីនធឺណិត ដើម្បីលើកកម្ពស់ការអនុវត្តបច្ចេកវិទ្យាព័ត៌មាននៅក្នុងវិស័យអប់រំឲ្យមានការលូតលាស់បន្ថែមទៀត។

ឯកឧត្ដម បណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា ការសិក្សាតាមអ៊ីនធឺណិតជាប្រព័ន្ធសិក្សាថ្មីទំនើប ដែលបានដាក់អនុវត្តយ៉ាងជោគជ័យនៅក្នុងប្រទេសជឿនលឿនជាច្រើន។ ប្រព័ន្ធសិក្សានេះជំនួយសម្រាប់និស្សិតដែលមិនសូវមានពេលវេលាគ្រប់គ្រាន់អាចសិក្សាពីចម្ងាយ ចំណេញពេលវេលានិងផ្តល់លទ្ធផលខ្ពស់។

ទោះបីកន្លងទៅមានគ្រឹះស្ថានសិក្សាមួយចំនួនបានដាក់អនុវត្តកម្មវិធីសិក្សាតាមប្រព័ន្ធ E-Learning ប៉ុន្តែលោករដ្ឋមន្ត្រីជំរុញឲ្យប្រព័ន្ធតាមបច្ចេកវិទ្យានេះត្រូវបានអនុវត្តកាន់តែទូលំទូលាយនៅគ្រប់ស្ថាប័នអប់រំ។

មជ្ឈមណ្ឌល Korea Software HRD ដែលជាមជ្ឈមណ្ឌលមួយដែលទទួលស្គាល់សម្រាប់ការបណ្ដុះបណ្ដាលលើជំនាញបច្ចេកទេស ក៏មានកម្មវិធីបង្រៀនតាមប្រព័ន្ធ E-Learning ដល់សិស្សនិស្សិត។

លោក ចិន ភីរម្យ អ្នកគ្រប់គ្រងទូទៅនៃមជ្ឈមណ្ឌលកូរ៉េសហ្វវែរ អេច អ ឌី បានឲ្យដឹងថា Khmer Academy បានផលិតវីដេអូចំនួន ៧២៧ វីដេអូនិងគ្រោងធ្វើវីដេអូជាច្រើនទៀតដើម្បីសិស្សនិស្សិតអាចសិក្សាស្រាវជ្រាវលើអ៊ីនធឺណិត។

លោកបញ្ជាក់ថា មានមុខវិជ្ជាបង្រៀនជាច្រើនដែលសាលារបស់លោកបានដាកសម្រាប់សិស្សនិស្សិតសិក្សាលើបណ្តាញអ៊ីនធឺណិតដូចជា ការបង្កើតកម្មវិធីលើទូរសព្ iOS , Android , ការបង្កើត Website ការរចនាឌីហ្សាញ រួមទាំងមុខវិជ្ជាវិទ្យាសាស្រ្តសម្រាប់សិស្សានុសិស្សនៅកម្រិតវិទ្យាល័យ។

លោកបន្តថា ការនាំកម្មវិធីសិក្សាតាមបែប E-Learning ជួយដល់សិស្សនិស្សិតអាចសិក្សាស្វែងយល់និងរៀនដោយខ្លួនឯង ដែលអាចបណ្ដុះស្មារតីសិក្សា និងការសម្រេចលទ្ធផលដ៏ប្រសើរ។

វិទ្យាស្ថានជាតិប្រៃសណីយ ទូរគមនាគមន៍ បច្ចេកវិទ្យាគមនាគមន៍និងព័ត៌មានវិទ្យា NIPTICT ជាគ្រឹះស្ថានរបស់រដ្ឋទើបបង្កើតថ្មីមួយដែលផ្តោតលើការ បណ្តុះបណ្តាលជំនាញបច្ចេកវិទ្យាបានបន្ថែមការសិក្សាតាមប្រព័ន្ធ E-Learning ដើម្បីបង្កើនប្រសិទ្ធភាពដល់សិស្សនិស្សិតដែលសិក្សាជំនាញ បច្ចេកទេស។

លោក សេង សុភាព ប្រធានវិទ្យាស្ថានជាតិប្រៃសណីយ ទូរគមនាគមន៍ និងបច្ចេកវិទ្យាគមនាគមន៍និងព័ត៌មានវិទ្យាបានឱ្យដឹងថា E-learning ជាប្រព័ន្ធសិក្សាដ៏ទំនើបថ្មីមួយដែលវិទ្យាស្ថានបានដាក់ បន្ថែម សម្រាប់ជាជំនួយដល់និស្សិតកំពុងសិក្សាជំនាញបច្ចេកវិទ្យាអាច ពង្រឹងសមត្ថភាពនិងប្រសិទ្ធភាពលើការសិក្សាកាន់តែប្រសើរ។

លោកថា ការសិក្សាតាមប្រព័ន្ធ E-Learning និស្សិតអាចសិក្សាតាមវីដេអូ សំឡេងនិងឯកសារនានាពីគ្រប់ទីកន្លែងដែលផ្តល់ភាពងាយស្រួលនៅពេល ពួកគេមានចម្ងល់និងចង់ស្វែងយល់ការសិក្សាបន្ថែមទៅលើមេរៀន ដែលបានរៀនរួច។ ប្រព័ន្ធបច្ចេកវិទ្យានេះចាប់ផ្ដើមដាក់ឲ្យនិស្សិតសិក្សាបណ្តើរៗ តាំងពីឆ្នាំទី១ រហូតដល់ពួកគេឡើងដល់ឆ្នាំបន្តបន្ទាប់។

នៅព្រឹកមិញនេះ មជ្ឈមណ្ឌល Korea Software HRDបានចុះអនុសារណៈយោគយល់ជាមួយក្រសួងអប់រំយុវជននិងកីឡា ដើម្បីលើកកម្ពស់ការអនុវត្តប្រព័ន្ធបច្ចេកវិទ្យាទំនើបនៅក្នុងវិស័យអប់រំនៅក្នុងប្រទេសកម្ពុជា។

គោលបំណងសំខាន់នៃអនុស្សរណៈយោគយល់គ្នានេះគឺដើម្បីលើកកម្ពស់វិស័យអប់រំ ចូលរួមចែករំលែកធនធាននៅកម្ពុជាតាមរយៈកម្មវិធីសិក្សាលើប្រព័ន្ធអ៊ីនធឺណិត (E-Learning) ដែលអាចជួយដល់ការសិក្សាស្រាវជ្រាវរបស់ប្រជាជនកម្ពុជាឱ្យកាន់តែមានភាពងាយស្រួល។