ម៉ូតូអត់ទាន់កាត់ឈ្មោះ បាត់សំបុត្រទិញ-លក់ ចង់ធ្វើផ្លាកលេខ ត្រូវធ្វើដូចម្ដេច?

2015-12-24 15:15:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ម៉ូតូមួយចំនួនបានសម្ដែងការព្រួយបារម្ភក្រោយការប្រកាសវិធានក្ដៅលើការរឹតបន្ដឹងច្បាប់ចរាចរណ៍ថ្មី ចាប់ពីថ្ងៃទី ០១ មករា ខាងមុខ ខណៈដែលម៉ូតូរបស់ខ្លួនបានទិញពីគេហើយមិនទាន់កាត់ឈ្មោះ និង បានបាត់ឯកសារផ្សេង ដូចជា សំបុត្រទិញ-លក់ ដោយមិនដឹងថា ត្រូវធ្វើដូចម្ដេចដើម្បីអាចទៅធ្វើផ្លាកលេខបាន។

“ខ្ញុំទិញម៉ូតូពីគេ ២-៣ ឆ្នាំហើយ ប៉ុន្តែ ម៉ូតូខ្ញុំអត់ទាន់កាត់ឈ្មោះទេ ហើយថ្ងៃមុនខ្ញុំបាត់កាបូបលុយដោយទាំងអត្តសញ្ញាណប័ណ្ណ និង ឯកសារនានា ទៅបាត់។ អ្វីដែលសំខាន់ម៉ូតូខ្ញុំទិញមកអត់ទាន់ទៅធ្វើផ្លាកលេខទៀត កាលពីមុនចេះតែជិះគេចៗអត់អី តែច្បាប់ថ្មីប្រហែលគេមិនលើកលែងឲ្យទេមើលទៅ"។ នេះជាការរៀបរាប់របស់សុឃុម។ សុឃុម បាននិយាយទៀតថា "ខ្ញុំចង់ទៅធ្វើផ្លាកលេខ ឥឡូវគិតម៉េច បាត់ទាំងអត្តសញ្ញាណប័ណ្ណ បាត់ទាំងឯកសារសំបុត្រទិញ-លក់ បែបនេះ?”

ឯបុរសម្នាក់ទៀតដែលមានរឿងរ៉ាវស្រដៀងគ្នានេះ បានចោទសួរមកកាន់ Sabay ថា "ម៉ូតូខ្ញុំបានទិញពីគេជាង ១ ឆ្នាំហើយ តែចៃដន្យខ្ញុំវង្វេងដៃ មិនដឹងទុកសំបុត្រពន្ធម៉ូតូនៅឯណា តែខ្ញុំនៅសល់វិកយបត្រទិញម៉ូតូពីហាង ដូច្នេះ អត់សំបុត្រពន្ធម៉ូតូមានវិក្កយបត្រអាចទៅធ្វើផ្លាកបានអត់"?។ ទាំងនេះជាការលើកឡើងពី យុវជន ហេង ភក្ដី។

ឆ្លើយតបទៅនឹងការលើកឡើងរបស់យុវជនទាំងពីររូបខាងលើ លោក ព្រាប ចាន់វិបុល ប្រធាននាយកដ្ឋានដឹកជញ្ជូនជើងគោក នៃក្រសួងសាធារណការនឹងដឹកជញ្ជូន បានលើកឡើងថា ចំពោះម៉ូតូទាំងឡាយណាដែលបាត់កាតគ្រី គឺម្ចាស់ម៉ូតូត្រូវដាក់ពាក្យប្ដឹងនៅប៉ុស្តិ៍នគរបាល ដើម្បីស្នើសុំធ្វើថ្មី។ តែករណី ម៉ូតូមិនមានកាត់ឈ្មោះ ម្ចាស់ម៉ូតូទិញបន្តត្រូវរកម្ចាស់ដើមឲ្យឃើញឲ្យដាក់ពាក្យបណ្ដឹងពីករណីបាត់កាតគ្រីនេះ ក្រោយមកអាចយកពាក្យបណ្ដឹងនោះទៅធ្វើថ្មី។ ប្រសិនបើម្ចាស់ម៉ូតូ អត់កាត់ឈ្មោះ ហើយរកម្ចាស់ដើមមិនឃើញ គឺម្ចាស់ម៉ូតូត្រូវដាក់ពាក្យបណ្ដឹងទៅតុលាការ ដើម្បីឲ្យចេញសាលក្រមបញ្ជាក់ថា ម៉ូតូមួយនេះ គឺជារបស់ខ្លួន។

ដោយឡែកអ្នកដែលបាត់សំបុត្រពន្ធម៉ូតូ ហើយចង់ធ្វើផ្លាកលេខ គឺម្ចាស់ម៉ូតូអាចយកឯកសារចម្លងសខ្មៅ ទៅឲ្យខាងមន្ទីរត្រួតពិនិត្យ ដូច្នេះ គឺអាចធ្វើផ្លាកលេខបានហើយ។ ប៉ុន្ដែ ប្រសិនបើសូម្បីតែឯកសារចម្លង (Copy) អត់មានទៀត គឺម្ចាស់ម៉ូតូមានដំណោះស្រាយមួយគត់ គឺត្រូវធ្វើពន្ធថ្មី ចុះឈ្មោះថ្មីឡើងវិញនៅខាងគយ។ ទាំងនេះគឺជាការលើកឡើងរបស់ លោក ព្រាប ចាន់វិបុល ប្រធាននាយកដ្ឋានដឹកជញ្ជូនជើងគោក៕

អត្ថបទ៖ ប៊ិន ប៊ុណ្ណា