ជម្រើសជាតិថៃ និង SCG Muangthong United ៣នាក់បង្ហាញចំណាប់អារម្មណ៍មុនមកកម្ពុជា
- 2016-01-11 15:31:14
- ចំនួនមតិ 0 | ចំនួនចែករំលែក 0
ជម្រើសជាតិថៃ និង SCG Muangthong United ៣នាក់បង្ហាញចំណាប់អារម្មណ៍មុនមកកម្ពុជា
ចន្លោះមិនឃើញ
សមាជិកក្រុមជម្រើសជាតិថៃ និងក្រុម SCG Muangthong United ចំនួន៣រូបបានចាប់អារម្មណ៍ខ្លាំងចំពោះដំណើរការប្រកួតទេសចរណ៍ SCG Muangthong United Asean Tour 2016 ដែលនឹងជួបក្រុម K-Cement Cambodian All Stars នាថ្ងៃទី១៦ ខែមករា ឆ្នាំ២០១៦ខាងមុខនេះនៅរាជធានីភ្នំពេញ ហើយពួកគេសុទ្ធតែសង្ឃឹមថា វិស័យកីឡានៅតំបន់អាស៊ានកាន់តែលេចធ្លោលើឆាកអន្តរជាតិ។
អ្នកចាំទីជម្រើសជាតិថៃ និង SCG Muangthong United កីឡាករ Kawin Thamsatchanan បានផ្តល់បទសម្ភាសន៍ដល់អ្នកសារព័ត៌មានកម្ពុជាថា សម្រាប់ការប្រកួតមិត្តភាពអន្តរជាតិជាមួយក្រុម K-Cement Cambodian All Stars នាថ្ងៃទី១៦ ខែមករាខាងមុខនេះជាការត្រៀមខ្លួនរបស់ក្រុមលោកសម្រាប់ការបើករដូវកាលថ្មី និងជាបទពិសោធន៍ថ្មីមួយទៀតដែលបានប្រកួតជាមួយក្រុមកម្ពុជា។
អ្នកចាំទីរូបនេះបាននិយាយថា ៖«ខ្ញុំធ្លាប់ជួបក្រុមកម្ពុជាច្រើនប្រកួតហើយ ហើយខ្ញុំគិតថា សម្រាប់ការប្រកួតខាងមុខនេះក៏មិនងាយស្រួលប៉ុន្មានឡើយ។ បច្ចុប្បន្ននេះ កីឡាករកម្ពុជាក៏មានសមត្ថភាពខ្លាំងដែរ»។
ចំណែកខ្សែបម្រើល្បីឈ្មោះរូបសង្ហា Sarach Yooyen ក៏ធ្លាប់បានលេងតទល់នឹងក្រុមកីឡាករកម្ពុជាច្រើនប្រកួតដែរ។ ខ្សែបម្រើជម្រើសជាតិថៃ និង SCG Muangthong United បានឲ្យដឹងថា លោកបានចាប់អារម្មណ៍នឹងខ្សែបម្រើកម្ពុជាមួយរូបដែលមានជំនាញជើងឆ្វេង ប៉ុន្តែលោកមិនចាំឈ្មោះ តែបើឃើញមុខ លោកនឹងស្គាល់។
Yooyen បាននិយាយថា ៖«ទោះជាក្រុមខ្ញុំខ្លាំង ក៏ក្រុមរបស់ខ្ញុំនៅតែមិនធ្វេសប្រហែសឡើយ គឺប្រឹងឲ្យអស់ពីសមត្ថភាពដើម្បីស្វាគមន៍តំបន់សេដ្ឋកិច្ចអាស៊ាន។ ខ្ញុំមើលឃើញថា មិនត្រឹមតែកីឡាបាល់ទាត់កម្ពុជាទេ សូម្បីតែបាល់ទាត់នៅតំបន់អាស៊ានផ្សេងទៀតក៏រីកចម្រើនគួរឲ្យចាប់អារម្មណ៍ដែរ។ ខ្ញុំមានគោលបំណងចង់ឲ្យបាល់ទាត់នៅតំបន់អាស៊ានលេចមុខលើឆាកអន្តរជាតិដូចជាតំបន់អឺរ៉ុបដែរ»។
ខ្សែបម្រើដ៏ប្រជាប្រិយរូបនេះរីករាយដែលបានមកលេងនៅកម្ពុជា និងសំណូមពរឲ្យអ្នកគាំទ្រនៅកម្ពុជា ទាំងអ្នកគាំទ្ររបស់ K-Cement Cambodian All Stars និងអ្នកគាំទ្រ SCG Muangthong United ចូលរួមទាំងទស្សនាឲ្យបានច្រើនកុះករ។
ចំណែកខ្សែប្រយុទ្ធល្បីប្រចាំជម្រើសជាតិថៃ Teerasil Dangda បានផ្តោតសំខាន់លើការប្រកួតដើម្បីមិត្តភាព សាមគ្គីភាព និងផ្លាស់ប្តូរបទពិសោធន៍។ ខ្សែប្រយុទ្ធ SCG Muangthong United ដែលធ្លាប់ទៅលេងនៅលីកកំពូលអេស្ប៉ាញរូបនេះនិយាយថា ៖«សម្រាប់ការប្រកួតនេះគឺជាការជំរុញលើកកម្ពស់វិស័យកីឡាបាល់ទាត់មួយ។ ទោះជាដឹងថា ក្រុមខ្ញុំខ្លាំង តែក៏មិនមែនគិតតែវាយសម្រុករឿងចាញ់ឈ្នះដែរ តែគិតលើមិត្តភាព សាមគ្គីភាពជាធំ»។
សូមទស្សនា វីដេអូអំពីចមណាប់អារម្មណ៍កីឡាករទាំង៣នាក់
ក្រុម K-Cement Cambodian All Stars ដែលប្រមូលផ្តុំដោយកីឡាករកម្ពុជា និងកីឡាករបរទេសប្រកបអាជីពនៅលីគកម្ពុជានឹងទទួលស្វាគមន៍ក្រុមលេខ២របស់ថៃគឺ SCG Muangthong United នាថ្ងៃទី១៦ ខែមករា ឆ្នាំ២០១៦ខាងមុខនេះនៅពហុកីឡដ្ឋានជាតិអូឡាំពិក រាជធានីភ្នំពេញ។ សំបុត្រចូលទស្សនាតម្លៃ១ដុល្លារ និង២ដុល្លារ ហើយចំណូលទទួលបានការលក់សំបុត្រទាំងអស់នឹងបរិច្ចាគជួយដល់មន្ទីរពេទ្យកុមារគន្ធបុប្ផា៕
ព័ត៌មានបន្ថែម សូមចុច៖ SCG MTUTD ASEAN TOUR Cambodia
អត្ថបទ៖ ជាន ចាន់រ៉ា