ជីវិតនិស្សិតតាមបណ្តាខេត្តនៅពេលឈានជើងមករស់នៅទីក្រុង

2016-02-03 16:29:53
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបានរៀនចប់ថ្នាក់វិទ្យាល័យនៅតាមខេត្តនានានោះ យុវជន និងយុវតីកម្ពុជាមួយចំនួនបានសម្រេចវេចបង្វេចមកបន្តការសិក្សានៅទីក្រុងភ្នំពេញ ដែលការរស់នៅខុសប្លែកស្ទើរតែទាំងស្រុងពីជីវិតនៅតាមជនបទ។

យុវជន ឌឿ ពិសិដ្ឋ មានវ័យ ២១ ឆ្នាំ មានស្រុកកំណើតនៅខេត្តកំពង់ស្ពឺ ស្ថិតនៅក្នុងចំណោម និស្សិតជាច្រើននាក់ ដែលបានចាកចេញពីស្រុកកំណើតដើម្បីស្វែងរកចំណេះវិជ្ជានៅទីក្រុងភ្នំពេញដែលខុសស្រឡះពីជីវិតនៅតាមខេត្ត។ ពិសិដ្ឋ ដែលបច្ចុប្បន្នជានិស្សិតឆ្នាំទី២នៃសាកលវិទ្យាល័យជាតិគ្រប់គ្រងសិក្សាលើជំនាញ ធនាគារ និង ហិរញ្ញវត្ថុបាននិយាយថាក្នុងពេលដែលគាត់មករស់នៅទីក្រុងដំបូងនៅឆ្នាំ ២០១៤ ពេលនោះឪពុកម្ដាយរបស់ពិសិដ្ឋមានតែពេល២ថ្ងៃប៉ុណ្ណោះដើម្បីជូនប្អូនមករកសាលារៀន និងស្វែងរកបន្ទប់ជួលសម្រាប់ប្អូនស្នាក់នៅ ។

ពិសិដ្ឋនិយាយថា ជីវិតរស់នៅទីក្រុង គឺខុសគ្នាស្រឡះពីជីវិតដែលប្អូនរស់នៅខេត្តកំពង់ស្ពឺ។ ពិសិដ្ឋ ឲ្យដឹងខ្លួនថា អ្វីៗនៅភ្នំពេញគឺមានតម្លៃថ្លៃ ដែលជាកត្តាលំបាកសម្រាប់និស្សិតដែលមកពីតាមខេត្តដូចជារូបគាត់ដែលក្រុមគ្រួសារមានជីវភាពលំបាក។

ក្នុងពេលដែលពិសិដ្ឋរស់នៅភ្នំពេញ ការចំណាយទាំងការញាំការទៅរៀន នឹងថ្លៃជួលបន្ទប់ស្នាក់នៅគឺជាបន្ទុក ម្ដាយឪពុកនៅឯស្រុកជាអ្នកផ្ញើមករៀងរាល់ខែ ។ ពិសិដ្ឋបាននិយាយថា ដោយមានការលំបាកនឹងបញ្ហាជីវភាពខ្លាំង បច្ចុប្បន្នពិសិដ្ឋបានសម្រេចចិត្តធ្វើការផង និងរៀនផង ដើម្បីជួយសម្រាលបន្ទុកក្នុងការចំណាយខ្លះៗពីក្រុមគ្រួសារ ។

ជារៀងរាល់ថ្ងៃម៉ោង៧យប់ ពិសិដ្ឋ ទៅរត់តុនៅក្នុងភោជនីយដ្ឋានមួយកន្លែង (សុំមិនបង្ហាញឈ្មោះហាង) ដែលមានទីតាំងនៅម្ដុំកោះពេជ្យ ដល់ម៉ោង១២អាធ្រាតដោយទទួលប្រាក់ខែ ១២០ ដុល្លារ ក្នុង១ខែ ។

ពិសិដ្ឋបានតាំងចិត្ត និងប្ដេជ្ញាថា នឹងខិតខំប្រឹងប្រែងយកចិត្តទុកដាក់រៀនសូត្រដើម្បីទទួលទានជោគជ័យក្នុងអំឡុងពេល៤ឆ្នាំនេះ គឺថា មិនឲ្យឪពុកម្ដាយនៅឯស្រុកអស់សង្ឃឹមនោះទេ។

ពិសិដ្ឋស្ថិតនៅក្នុងចំណោមនិស្សិតកម្ពុជាជាច្រើននាក់មកពីតាមបណ្ដាខេត្តនានាដែលត្រូវចំណាយពេលវេលារៀនសូត្រផងនិងធ្វើការរកលុយដើម្បីផ្គត់ផ្គង់ការសិក្សានិងការរស់នៅទីក្រុងផង។

រូបតំណាង

សម្រាប់និស្សិតស្រីវិញ ពួកគេមិនត្រឹមតែត្រូវប្រឈមមុខនឹងរបៀបរបបថ្មីនៃការរស់នៅ និងការរៀនសូត្រនោះ ទេ ពួកគេក៏មានអារម្ភភ័យខ្លាចអំពីសន្តិសុខផ្ទាល់ខ្លួន នៅពេលដែលមករស់នៅតែម្នាក់ឯងនៅទៅក្រុងដែលសម្បូរដោយបញ្ហាគ្រឿងញៀន អំពើប្លន់ និង ការចាប់រំលោភជាដើម។

កញ្ញា លី លីនណា ជានិស្សិតស្រី មានវ័យ១៨ ឆ្នាំ មកពី ខេត្តកណ្ដាលបានរៀបរាប់ថា បច្ចុប្បន្ន កញ្ញា លីនណា ជានិស្សិតផ្នែកគ្រប់គ្រងឆ្នាំទី១ នៃសាកលវិទ្យាល័យជាតិគ្រប់គ្រង។ ចំពោះការសិក្សានៅសាកលវិទ្យាល័យ លីនណា បាននិយាយថាដើម្បីរៀនឲ្យទាន់គេនៅក្នុងសាលា លីនណា ត្រូវចំណាយ ពេលសិក្សាបន្ថែមដោយខ្លួនឯងជាមួយមិត្តភិក្ដបន្ថែមទៀត ដោយប្រើពេលវេលាស្រាវជ្រាវមេរៀនតាមបណ្ណាល័យ ចូលឆែកមើលតាមរយៈ អ៊ីនធឺណេតជាដើម ។

សម្រាប់ការរស់នៅទីក្រុងវិញលីនណាបានលើកឡើងថា “វាជាការលំបាកណាស់សម្រាប់និស្សិតដូចជារូបខ្ញុំដែលមិន ទាន់បានត្រៀមខ្លួនរស់នៅតែម្នាក់ឯងឃ្លាតចេញពីម្ដាយឪពុក។ មាន ពេលខ្លះខ្ញុំមានការភ័យខ្លាច។ ខ្លាចនោះត្រង់ថាបញ្ហាសុវត្ថិភាព” ។

អត្ថបទ៖ ឡេង ឆរលីដា