វណ្ណ មករា នៅសល់ស្នាដៃរឿងធំមួយទៀតមិនទាន់សម្ពោធ

2016-02-05 17:20:31
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង វណ្ណ មករា ដែលបានស្លាប់ដោយសារឧប្បត្តិហេតុគ្រោះថ្នាក់ក្រឡាប់រថយន្ត នៅម្ដុំពេជ្រនិលកាលពីពេលកន្លងទៅនោះ លោកនៅស្នាដៃខ្សែភាពយន្តមួយទៀតមិនទាន់សម្ពោធ។

ខ្សែភាពយន្តមួយនោះ មានចំណងជើងថារឿង “ដៃគូកំចាត់ខ្មោច” ដែលជាវណ្ណកម្មរបស់ផលិតកម្ម BKS។ រឿងមួយនេះ បានថតជិតរួចរាល់ហើយ ដោយមានតារាសម្ដែងជាច្រើនបានចូលរួមសម្ដែងដូចជា តារាទឹកភ្នែក នី មុន្នីនាថ លោក ប៉ែន ចំរ៉ុង កញ្ញា ពៅ លីដា លោក វណ្ណ មករា ព្រមទាំងតារាកំប្លែងល្បីឈ្មោះដូចជានាយ គ្រឿន អ្នកនាង ខ្ញុង និង អ្នកមានទេពកោសល្យសមត្ថភាពផ្សេងទៀត។

តាមការឲ្យដឹងពីលោក ឈុន សុវណ្ណភក្ដី ម្ចាស់ផលិតកម្ម BKS រឿង “ដៃគូកំចាត់ខ្មោច” លោក វណ្ណ មករា បានដើរតួជាបងធំក្នុងភូមិ ប៉ុន្តែមានចិត្តល្អចេះយកអាសាគេឯង ប្រជាជនក្នុងភូមិស្រលាញ់រាប់អាន។ក្នុងរយៈពេលជិត១ខែដែលផលិតកម្មចេញថត លោក វណ្ណ មករា មានប្លង់ថត៤ថ្ងៃ ហើយលោកគឺជាតួសំខាន់ម្នាក់នៅក្នុងសាច់រឿងនេះតែម្ដង។ រយៈពេលនៃការថត៤ថ្ងៃរបស់វណ្ណ មករា បានតម្លៃខ្លួន២៥០ដុល្លារ។

ចាងហ្វាងផលិតកម្មរូបនេះ បានរំលឹកឡើងវិញថា អតីតតារាចម្រៀងវណ្ណ មករា គឺជាតួអង្គម្នាក់មានអត្តចរិតរួសរាយរាក់ទាក់ គោរពពេលវេលា ហើយសម្ដែងបានល្អខ្លាំងណាស់។

ចង់គាំទ្រលោក វណ្ណ មករា សូមកុំភ្លេចខ្សែភាពយន្តមួយនេះ គ្រោងចាក់បញ្ចាំងនៅថ្ងៃទី ១៧ ខែ មិនា ឆ្នាំ ២០១៦ ខាងមុខ នៅតាមរោងភាពយន្តទំនើបនានា ក្នុងរាជធានី ភ្នំពេញ និង ខេត្តសៀមរាប៕