ស្នាដៃចុងក្រោយ វណ្ណ មករា បើកសម្ពោធល្ងាចមិញ

2016-03-17 17:27:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តរឿង “ដៃគូកំចាត់ខ្មោច” របស់ផលិតកម្ម BKS ដែលអតីតសពតារាចម្រៀង វណ្ណ មករា បានចូលរួមសម្ដែងនោះ បានបើកសម្ពោធហើយកាលពីល្ងាចមិញនេះ រោងភាពយន្តលីជិនទួលគោក។

នៅក្នុងខ្សែភាពយន្តនេះ លោក វណ្ណ មករា បានដើរតួជាបងធំម្នាក់នៅក្នុងភូមិ ប៉ុន្តែមានចិត្តល្អចេះយកអាសាគេឯង ប្រជាជនក្នុងភូមិស្រលាញ់រាប់អាន។ ក្នុងសាច់រឿងដែល BKS ប្រើពេលថតជិត១ខែនោះ លោក វណ្ណ មករា មានប្លង់ថត៤ថ្ងៃ ដោយលោកទទួលបានតម្លៃខ្លួន២៥០ដុល្លារ។

លោក ឈុន សុវណ្ណភក្ដី អ្នកចាត់ការទូទៅផលិតកម្ម BKS បានលើកឡើងថា លោកក៏ដូចគ្នាថ្នាក់ដឹងនាំក្នុងផលិតកម្មទាំងមូល ពិតជាមានសោកស្ដាយខ្លាំងណាស់នូវមរណភាពលោក វណ្ណ មករា ក្នុងហេតុការណ៍គ្រោះថ្នាក់ចរាចរណ៍កាលពីពេលកន្លងទៅ។

លោកបានរំលឹកថា អតីតតារាចម្រៀងវណ្ណ មករា គឺជាតួអង្គម្នាក់មានអត្តចរិតរួសរាយរាក់ទាក់ គោរពពេលវេលា ហើយសម្ដែងបានល្អខ្លាំងណាស់ មិនត្រឹមតែប៉ុណ្ណោះដោយសារតែលោកមានបទពិសោធន៍ស្រាប់ វណ្ណ មករា ថែមទាំងជួយណែនាំប្លង់ថតខ្លះថែមទៀតផង។

ក្នុងថ្ងៃបើកសម្ពោធល្ងាចមិញនេះ ក្បាលដំបូងនៃផលិតកម្ម BKS បានធ្វើឲ្យអ្នកដែលចូលរួមទាំងអស់ ធ្វើកិច្ចគោរពវិញ្ញាណក្ខន្ធ លោក វណ្ណ មករា ចំនួន៥ វិនាទី ដើម្បីជាការដឹងគុណថែមទៀតផង។ ជាមួយគ្នានោះដែរ ក្រុមគ្រួសាររបស់លោក វណ្ណ មករា ក៏ត្រូវបានផលិតកម្មអញ្ជើញមកទស្សនាផងដែរ។

រឿង “ដៃគូកំចាត់ខ្មោច” ក្រៅពី លោក វណ្ណ មករា ក៏មានតារាសម្ដែងជាច្រើនទៀតចូលរួមផងដែរ ក្នុងនោះមានដូចជា តារាទឹកភ្នែក នី មុន្នីនាថ លោក ប៉ែន ចំរ៉ុង កញ្ញា ពៅ លីដា កញ្ញា ញឹម ចាន់ថន នាយ គ្រឿន អ្នកនាង ខ្ញុង ជាដើម។ ខ្សែភាពយន្តមួយនេះ បានចំណាយការផលិតរបស់ខ្ទង់៦ម៉ឺនដុល្លារ។

លោក ឈុន សុវណ្ណភក្ដី បានលើកឡើងទៀតថា ខ្សែភាពយន្តខាងលើនេះ គឺជាវណ្ណកម្មទី១របស់ BKS ដូច្នេះហើយលោកបានពិនិត្យឃើញថា មិនទាន់បានល្អខ្លាំងនៅឡើយទេ។ "យើងមានប្លង់ល្អៗច្រើន តែក្នុងហ្នឹងក៏មានកន្លែងខ្លះឆ្គងដែរ ដូចជាសំឡេងយើងធ្វើមិនទាន់បានល្អទេ តែនេះជាមេរៀនរបស់យើងក្នុងការធ្វើរឿងក្រោយៗទៀត" លោក ឈុន សុវណ្ណភក្ដី ថ្លែង។

រឿង “ដៃគូកំចាត់ខ្មោច” និងចាក់បញ្ចាំងចាប់ពីថ្ងៃទី ១៧ ខែ មីនា ឆ្នាំ ២០១៦ នេះតទៅនៅតាមរោងភាពយន្តទំនើបនានា ក្នុងរាជធានី ភ្នំពេញ និង ខេត្ត សៀមរាប ដែលគម្រោងនៃការចាក់បញ្ចាំងមានរយៈពេល១ខែឯណោះ។

សូមទស្សនាវីដេអូ

តាមការបញ្ជាក់ពី អ្នកចាត់ការទូទៅខាងលើ ក្រៅពីរឿង“ដៃគូកំចាត់ខ្មោច” ផលិតកម្មBKS មានមហិច្ឆតាផលិតខ្សែភាពយន្តនិងបទចម្រៀងជាច្រើនទៀត ។ ថ្មីៗនេះផលិតកម្មទើបតែបញ្ជាប់ថតខ្សែភាពយន្តទី២របស់ខ្លួន គឺរឿង “អាសុយទ្រីស្មោះស្នេហ៍” ដោយរឿងមួយនេះគ្រោងចំណាយខ្ទង់ជាង៧ម៉ឺនដុល្លារឯណោះ ចំពោះការចាក់បញ្ចាំងនៅមិនទាន់កំណត់បាននៅឡើយទេ៕