ប្រុសឡា ប្រាប់ហេតុផលចោលទឹកដីសម្បូរដុល្លារ ស្រវាសិល្បៈស្រុកខ្មែរ
- 2016-04-18 17:53:17
- ចំនួនមតិ 0 | ចំនួនចែករំលែក 0
ប្រុសឡា ប្រាប់ហេតុផលចោលទឹកដីសម្បូរដុល្លារ ស្រវាសិល្បៈស្រុកខ្មែរ
ចន្លោះមិនឃើញ
ផល ដារ៉ាឡា ហៅ ប្រុសឡា អ្នកនិពន្ធបទថ្មីម្នាក់ ប្រាប់ថាមូលហេតុដែលលោកសុខចិត្តចាកចេញពីទឹកដីសម្បូរទៅដោយដុល្លារ(សហរដ្ឋអាមេរិក)វិលត្រឡប់មកស្រុកខ្មែរនោះ គឺទឹកចិត្តស្រលាញ់សិល្បៈ និងចង់ក្លាយជាចំណែកមួយលើបេសកកម្មលើកកម្ពស់សិល្បៈខ្មែរ។
ប្រុសឡា បន្ថែម៖ "ការចាកចេញនេះ ទី១ ខ្ញុំស្រលាញ់សិល្បៈ ទី២ ខ្ញុំចង់ក្លាយជាមនុស្សម្នាក់ដែលមានការរួមចំណែកស្រោចស្រង់សិល្បៈ សម័យយើងមកវិញ ព្រោះពីមុន ខ្ញុំគ្មានបទចម្រៀងសម័យទុកអួតមិត្តភ័ក្ដិខ្ញុំនៅស្រុកគេទេ មានតែចម្លងលួចស្ដាប់ពីក្រោយខ្នងគេ។ ក្រោយមក ដោយសារចង់ចេះចង់ដឹង ខ្ញុំរៀនតាម Online ស្រាវជ្រាវដោយខ្លួនឯង ចំណែករៀននៅសាលាបានត្រឹមតែមួយឆ្នាំទេ ដោយសារគ្មានថវិការៀនបន្ត "។
រយៈពេល២ឆ្នាំនៅស្រុកខ្មែរ ប្រុសឡា បានធ្វើឲ្យទស្សនិកជនស្គាល់លោកតាមរយៈបទចម្រៀង "ជិះស៊ីក្លូ" ថ្មីៗនេះមាន បទ "នារីសក់ខ្លី" និងបទ "ធុងបាសភូមិខ្ញុំ" កំពុងតែស្ទុះ និងមានទស្សនិកជនស្គាល់លោក កាន់តែខ្លាំង។
ដំបូងឡើយ ម្ចាស់បទ "ជិះស៊ីក្លូ" អះអាងថា លោករស់នៅ និងមានស្រុកកំណើតក្នុងស្រុកខ្មែរនេះឯង ប៉ុន្តែលុះដល់ឆ្នាំ ២០០៣ រូបគេត្រូវម្ដាយធានាយកទៅនៅអាមេរិក ដោយសារឪពុកម្ដាយបានចែកផ្លូវគ្នា។
នៅទីនោះ លោក បញ្ចប់ត្រឹមថ្នាក់ទី១២ សាលា Henry Sibley High School ប៉ុន្តែបានចូលមហាវិទ្យាល័យមួយឆ្នាំក៏ឈប់វិញ ហើយសម្រេចចិត្តធ្វើការ។ លុះដល់ ខែ វិច្ឆិកា ចុងឆ្នាំ ២០១៤ ម្ចាស់បទ "នារីសក់ខ្លី" សាកល្បងត្រឡប់មកនៅខ្មែរវិញដើម្បីប្រឡូកក្នុងវិស័យសិល្បៈ។
មកដល់ពេលនេះ ម្ចាស់បទ "នារីសក់ខ្លី" និពន្ធបានប្រមាណជាង១០បទ ។ ការប្រឹងប្រែងទាំងអស់នេះ ប្រុសឡា ប្រាប់ថា ដោយសារតែមានការជួយជំរុញ លើកទឹកចិត្ត និងជឿជាក់លើស្នាដៃរបស់លោក ពីមិត្តភ័ក្ដិ ទើបលោក មានទំនុកចិត្តខ្លាំងក្នុងការនិពន្ធបទថ្មី និងបន្តរស់នៅស្រុកខ្មែរបន្តទៀត៕
អត្ថបទ៖ ថា ម៉ាលីដា រូបភាព៖ ហេ្វស ប៊ុក ប្រុសឡា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
