បំណែកយន្តហោះរកឃើញនៅឆ្នេរម៉ូសំប៊ិក ជារបស់ MH370

2016-04-21 16:22:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បំណែកយន្តហោះចំនួនពីរបំណែក ត្រូវបានរកឃើញនៅតាមឆ្នេរសមុទ្រប្រទេសម៉ូសំប៊ិក(ប្រទេសក្នុងទ្វីបអាហ្វ្រិក) គឺជារបស់យន្តហោះជើងហោះហើរបាត់ខ្លួន MH370 របស់ម៉ាឡេស៊ី នេះបើតាមការថ្លែងរបស់រដ្ឋមន្ត្រីដឹកជញ្ជូនប្រទេសអូស្ត្រាលី Darren Chester កាលពីថ្ងៃអង្គារកន្លងទៅ។

តាមសារព័ត៌មានReuters លោក Chester បានឲ្យដឹងថារបាយការណ៍ចេញពីការិយាល័យសុវត្ថិភាពដឹកជញ្ជូនអូស្ត្រាលីបានបញ្ជាក់ចំពោះបំណែកទាំងពីរខាងលើ។

លោករដ្ឋមន្ត្រី Chester បានបញ្ជាក់ទៀតថា លេខនិងអក្សរលើបំណែកនោះគឺដូចគ្នាទាំងស្រុងទៅនឹងលេខនិងអក្សរដែលបានបោះពុម្ពលើយន្តហោះជើងហោះហើរ MH370 របស់ម៉ាឡេស៊ី។

ចំពោះបំណែកទាំងពីរខាងលើ បំណែកទី១ត្រូវបានរកឃើញដោយយុវជនមកពីប្រទេសអាហ្វ្រិកខាងត្បូងម្នាក់នៅលើឆ្នេរសមុទ្រប្រទេសម៉ូសំប៊ិកពេលរូបគេទៅកម្សាន្តនៅទីនោះកាលពីខែធ្នូឆ្នាំ២០១៥កន្លងទៅ ចំណែកបំណែកទីពីរត្រូវបានបុរសអ្នកទេសចរជនជាតិអាម៉េរិកាំងម្នាក់រកឃើញនាចុងខែកុម្ភៈ ឆ្នាំ២០១៦កន្លងទៅនេះ។ រំលឹកផងដែរថា យន្តហោះដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ី បានបាត់ខ្លួនយ៉ាងអាថ៌កំបាំងកាលពីថ្ងៃទី០៨ ខែមីនា ឆ្នាំ២០១៤ ហើយឆក់យកជីវិតមនុស្ស ២៣៩នាក់ ពេលធ្វើដំណើរពីទីក្រុងកូឡាឡុំាពួរ ទៅកាន់ទីក្រុងប៉េកាំង ប្រទេសចិន។ ការរុករកជើងហោះហើរ MH370 គឺជាប្រតិបត្តិការធំបំផុតក្នុងប្រវត្តិសាស្ត្រ ដែលចំណាយប្រាក់អស់រាប់រយលានដុល្លារ និងមានការចូលរួមពីក្រុមការងារចម្រុះជាតិសាសន៍ជាច្រើនប្រទេស៕