សុគន្ធ ធារ៉ាត់ ចេញពី Spider Production ចូល VCine picture

2016-04-28 16:27:20
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង សុគន្ធ ធារ៉ាត់ បានប្រកាសប្រាប់ Sabay ថា ខ្លួនបានចេញពីផលិតកម្ម Spider Production ហើយ បច្ចុប្បន្នកំពុងតែច្រៀងឲ្យផលិតកម្មថ្មីមួយដែលមានឈ្មោះថា VCine picture ។

មូលហេតុនាំឲ្យ តារាចម្រៀងរូបនេះដើរចេញពីផលិតកម្មដែលធ្លាប់លើកខ្លួនឲ្យមហាជនស្គាល់នេះ ត្រូវបាន ធារ៉ាត់ ប្រាប់ថា មិនមានបញ្ហាអ្វីនឹងគ្នាឡើយ ពោល គឺលោកដើរចេញដោយខ្លួនឯង ចំណែកខាងផលិតកម្ម ក៏មិនបានហាមឃាត់លោកឡើយ ត្បិតអីកាលដែលចូលច្រៀងក្នុង Spider Production លោកមិនបានចុះកុងត្រាជាមួយគ្នាឡើយ។ "គាត់អត់ថា អីទេ ហើយក៏មិនមានបញ្ហាអ្វីនឹងគ្នាដែរ ព្រោះខ្ញុំច្រៀងក្នុង Spider អត់មានកុងត្រាទេ អីចឹងខ្ញុំចេញថ្ងៃណាក៏បានដែរ" លោក សុគន្ធ ធារ៉ាត់ លើកឡើង។

ងាកមក VCine picture ដែលជាទ្រនំថ្មីវិញ លោក សុគន្ធ ធារ៉ាត់ ប្រាប់ថា ខ្លួនបានចុះកុងត្រាជាមួយគ្នារហូតដល់ទៅ៥ឆ្នាំ ជាមួយគ្នានោះ លោកត្រូវបានផលិតកម្មលើក ឲ្យកាន់តួនាទីធំមួយក្នុងផលិតកម្មផងដែរ។ "នៅ Vcine ខ្ញុំមិនត្រឹមតែតារាចម្រៀងទេ ខាងផលិតកម្មឲ្យខ្ញុំធ្វើជាអ្នកមើលការខុសត្រូវដូចជា ឌីហ្សាញសំលៀកបំពាក់សម្រាប់តួ ឬ ពេលចុះថតស្ប៉តអីចឹងចុះទៅមើលផ្ទាល់ ជួយចាត់ចែងទាំងអស់ ព្រោះនៅទីនេះមានការងារថតស្ប៉តច្រើន"។ តារាចម្រៀងដែលធ្លាប់ប្រកាសយកបទ Original ទៅលក់លើទឹកដីអាមេរិក ថ្លែងបញ្ជាក់។

បច្ចុប្បន្ន សុគន្ធ ធារ៉ាត់ ត្រូវបាន VCine picture រៀបចំបទចម្រៀងឲ្យរហូតដល់ទៅ៣បទហើយ គឺបទ "ពេលម៉ោងរៀនចូលចិត្តធ្វើអី? " "ចាំរហូត" និងបទ "ស្រីខ្មែរគ្រប់បែប" ដោយបទខ្លះ បានថត MV រួចរាល់អស់ហើយ គ្រោងចេញលក់ក្នុងពេលឆាប់ៗនេះ។ មិនត្រឹមតែប៉ុណ្ណេះ ខាងផលិតកម្ម ក៏គ្រោងយកបទចម្រៀងរបស់លោកមួយចំនួនដែល ធារ៉ាត់ និពន្ធដោយខ្លួនឯង ក្នុងផលិតកម្មចាស់របស់លោកមកថត MV សាថ្មីផងដែរ។

តារាចម្រៀងរូបនេះ បានសម្ដែងសុទិដ្ឋិនិយមថា តាមរយៈការងារ ក៏ដូចជាបទចម្រៀងដែលទ្រនំថ្មីផ្ដល់ឲ្យនេះ ច្បាស់ជាមួយបង្កើនប្រជាប្រិយភាពរបស់ខ្លួន ឲ្យទស្សនិកជនកាន់តែស្គាល់ច្បាស់ជាក់ជាមិនខាន៕

អត្ថបទ៖ ខុត សីហា 