ឆ្នាំនេះ អ្នកដាំស្លាមានហាងឆេងខ្ពស់

2016-05-19 14:07:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្លា គឺជាគ្រឿងផ្សំដ៏សំខាន់សម្រាប់លោកយាយ-លោកតា ដែលបរិភោគម្លូ។ ដើមស្លាមិនសូវជាមានគេដាំច្រើនទេ បើមានក៏មានតែនៅតាមផ្ទះណា ដែលមានចាស់ៗជាអ្នកហូបស្លាដែរ។ ប៉ុន្តែនៅស្រុកត្បូងឃ្មុំ ក្នុងខេត្តត្បូងឃ្មុំ មានឃុំមួយដែលប្រជាជននៅទីនោះដាំដើមស្លាសឹងតែគ្រប់ផ្ទះក្លាយទៅជាប្រពៃណីតាំងពីដូនតាយូរយារណាស់មកហើយនោះ គឺឃុំជប់។

បើអ្នកទាំងអស់គ្នាឆ្លងកាត់តាមផ្លូវជាតិលេខ៧ ត្រង់ឃុំជប់ អ្នកនឹងមានប្លែកអារម្មណ៍ភ្លាម ព្រោះនៅអមសងខាងផ្លូវ អ្នកនឹងឃើញមានដើមស្លាយ៉ាងច្រើន តែបើអ្នកចូលតាមផ្លូវទៅចម្ការកៅស៊ូជប់វិញ គឺវាមានច្រើនស្អេកស្កះតែម្ដង។

អ្នកស្រី ទៀង ជាពលរដ្ឋម្នាក់នៅភូមិច្រកចំបក់ ឃុំជប់ បានប្រាប់ថា គាត់មានដើមស្លា ២០០ ដើម ក្នុងនោះមានស្លាខ្លះអាយុ ១៥ឆ្នាំ និងខ្លះទៀតជិត ៣០ឆ្នាំហើយ។ អ្នកស្រីបន្តថា ស្លាអាចផ្ដល់ផលបាន នៅពេលវាមានអាយុ ៣ ទៅ ៥ ឆ្នាំ និងជាមធ្យមស្លា ១ដើមអាចផ្ដល់បរិមាណស្លាស្ងួតបានប្រហែល ១គីឡូក្រាម។ សព្វថ្ងៃមានឈ្មួញដើរទិញស្លាស្រស់ក្នុងតម្លៃជាង ១០ ០០០៛ ដោយថ្លឹងទាំងស្មែងតែម្តង។

នៅខ្ទង់ខែ កក្កដា ឬសីហា លែងមានឈ្មួញដើរទិញ កសិករចាប់ផ្តើមធ្វើស្លាកាត់ (ស្ងួត)វិញម្ដង។ សម្រាប់ឆ្នាំនេះ តម្លៃស្លាស្ងួតបានហក់ឡើងខ្ពស់ជាងរាល់ឆ្នាំទៅទៀត ដោយបច្ចុប្បន្ន ស្លាស្ងួត ១គីឡូថ្លៃ ៥០ ០០០៛ ខណៈពីឆ្នាំទៅមានតម្លៃត្រឹមតែ ៣០ ០០០៛ ទៅ ៤០ ០០០៛ប៉ុណ្ណោះ។ ដើមស្លាក្រៅពីផ្ដល់ជាផ្លែ គេក៏អាចយកធាងរបស់វាទៅធ្វើជាអំបោសបានទៀតផង។ អ្នកស្រីទៀងថា “អំបោសហ្នឹងធ្វើខ្លួនឯងខ្លះ ជួនលក់ធាងឲ្យគេខ្លះ។ ស្លឹក ១ធាងលក់បាន ៥០៛ តែបើសកហើយអាចលក់បាន ១៥០៛ ទៅ ២០០៛។ អំបោស ១ធ្វើអស់ ៥ធាង ថែមសក់វា ៥ធាងអីទៀតទៅ បានអំបោស ១ហើយ។ អំបោស ១ដើមអាចលក់បាន ២ ៥០០៛ ទៅ ៣ ០០០៛។

ចំណែកឯ លោកស្រូយ វុទ្ធី ជាឈ្មួញកណ្ដាលទិញស្លា រស់នៅភូមិជប់ក្រៅ ឃុំជប់ បានប្រាប់ Sabay ថា គាត់ដើរប្រមូលទិញស្លាពីអ្នកភូមិ រួចលក់បន្តទៅឲ្យឈ្មួញវៀតណាម។ ផ្ទះរបស់គាត់ផ្ទាល់ក៏មានដើមស្លា ៣០០ដើមដែរ។ បុរសវ័យ ៥០ប្លាយរូបនេះ បាននិយាយាថា ក្នុងឃុំរបស់គាត់មានស្លាច្រើនណាស់ គឺរាប់ពាន់ហិចតាឯណោះ។ គាត់បន្តថា តម្លៃស្លាចាប់ផ្ដើមមានហាងឆេងនៅពេលដែលជនជាតិវៀតណាមចូលមកទិញ ព្រោះកាលពីប៉ុន្មានឆ្នាំមុនស្លា១គីឡូតម្លៃប្រមាណតែ ៣ ០០០៛ប៉ុណ្ណោះ។ ចំពោះ ប្រភេទស្លា(ស្រស់)ដែលគាត់ទិញសព្វថ្ងៃមាន៣ប្រភេទគឺ ស្លាលេខ១ មានផ្លែធំ(ប៉ុន១ចំហៀងកដៃមនុស្សចាស់) ទិញថ្លៃ ១៥ ០០០៛ ឯស្លាលេខ២ (ប៉ុនមេជើង) ទិញថ្លៃ ១២ ០០០៛ ទៅ ១៣ ០០០៛ និងចុងក្រោយ គឺស្លាលេខ៣ (តូច)ទិញក្នុងតម្លៃ១០ ០០០៛៕