ជយលាភីមេដាយមាសផ្នែកអក្សរសិល្ប៍ខ្មែរ៖ "ខ្ញុំប្រឹងរៀនរហូតជោគជ័យ ដើម្បីអ្នកមានគុណ"

2016-05-03 12:27:23
ចំនួនមតិ 0 | ចំនួនចែករំលែក 0

ចន្លោះមិនឃើញ

“លទ្ធផលដែលខ្ញុំទទួលបាននៅពេលនេះ គឺដោយសារខ្ញុំប្រឹងប្រែងរៀនសូត្រ ដើម្បីក្រុមគ្រួសារ សាលា និង ខេត្ត របស់ខ្ញុំ ដូច្នេះខ្ញុំប្រឹងរហូតទទួលបានជោគជ័យ"។ នេះជាសម្ដីរបស់ កញ្ញា ជៀម សៀវគីម ដែលជាម្ចាស់ជយលាភីមេដាយមាសផ្នែកអក្សរសិល្ប៍ខ្មែរ និង ជាបេក្ខនារីមកពីខេត្តបាត់ដំបង។

ជាកូនពៅគេក្នុងចំណោមបងប្អូន ៥នាក់ សៀវគីម បានរៀបរាប់ប្រាប់ថា "កម្លាំងជំរុញអោយខ្ញុំខិតខំប្រឹងប្រែងរៀនយ៉ាងខ្លាំងកន្លងមកនេះ គឺអ្នកមានគុណខ្ញុំ ដូច្នេះខ្ញុំចង់អោយម្ដាយសប្បាយចិត្តពេលដែលខ្ញុំបានទទួលជោគជ័យនៅក្នុងការប្រលង។ មួយទៀត ខ្ញុំក៏មិនចង់អោយលោកគ្រូ ដែលតែងតែខិតខំប្រឹងប្រែងយកចិត្តទុកដាក់បង្រៀនខ្ញុំអស់សង្ឃឹមនោះដែរ។ ពិសេស គឺខ្ញុំក៏ចង់អោយសាលា និងខេត្តរបស់ខ្ញុំមានកិត្តិយសមុខមាត់ដោយមានសិស្សរបស់ខ្លួនបានជាប់ក្នុងការប្រលងសិស្សពូកែផងដែរ។ ដូច្នេះហើយទើបខ្ញុំខំប្រឹងដើម្បីមនុស្សដែលខ្ញុំស្រលាញ់ និងគោរពបានសប្បាយចិត្ត និងដើម្បីខេត្ត និងសាលាខ្ញុំទទួលបានកិត្តិយស និងការកោតសរសើរពីមជ្ឈដ្ឋានខាងក្រៅ។

កញ្ញាបានរៀបរាប់ប្រាប់អំពីមូលហេតុដែលនាំអោយខ្លួនជ្រើសរើសប្រលងមុខវិជ្ជាអក្សរសិល្ប៍ខ្មែរនេះថា "ក្នុងចំណោមមុខវិជ្ជាទាំងអស់ មុខវិជ្ជានេះ ខ្ញុំចូលចិត្តជាងគេ។ មានពេលខ្លះ មានគេអោយយោបល់ថា ខ្ញុំគួរតែជ្រើសរើសប្រលងមុខវិជ្ជាវិទ្យាសាស្ត្រទើបល្អជាង ប៉ុន្តែខ្ញុំយល់ថា មនុស្សម្នាក់ៗមានចំណង់ចំណូលចិត្តខុសៗគ្នា ជួនកាលអ្វីដែលគេពេញចិត្តអ្វីដែលល្អសម្រាប់គេ វាមិនមែនសុទ្ធតែល្អសម្រាប់យើងនោះទេ ដូច្នេះហើយទើបខ្ញុំសម្រេចចិត្តជ្រើសយកអ្វីដែលខ្ញុំស្រលាញ់ និងពេញចិត្តជាជាងស្ដាប់តាមគំនិតអ្នកដទៃ"។

សិស្សថ្នាក់ទី ១២Pនៃវិទ្យាល័យព្រះមុនីវង្សរូបនេះបានចាប់ផ្តើមរៀនគួរបំប៉នអក្សរសិល្ប៍ខ្មែរនៅពេលរៀនចប់ថ្នាក់ទី១០។ ដោយសិក្សាជាមួយនឹងក្ដីស្រលាញ់ពេញចិត្តចំពោះមុខវិជ្ជាខ្លួន កញ្ញាតែងតែចំណាយពេលវេលាទិញសៀវភៅសំណេរ និងស្វែងរកសុំឯកសារពីសិស្សច្បងដើម្បីសិក្សាស្វែងយល់បន្ថែមទៀតដោយខ្លួនឯង ពីលើការរៀននៅក្នុងម៉ោងគួរថែមទៀត។

កញ្ញាក៏បានអោយយោបល់ផងដែរ សម្រាប់សិស្សជំនាន់ក្រោយថា បើសិនជាចង់ប្រលងអោយបានជាប់ គួរតែរៀនត្រៀមយ៉ាងហោចណាស់ ២ឆ្នាំមុនដែរ។ កុំរង់ចាំដល់ពេលជិតប្រលង ទើបខិតខំរៀន ព្រោះភាគរយទទួលបានជោគជ័យអាចមានតិចជាងអ្នកដែលខំប្រឹងតាំងពីដើមទីមក។ ហើយមួយវិញទៀត សិស្សត្រូវចេះស្វែងយល់និង រកឯកសារផ្សេងៗមកស្វែងយល់បន្ថែមពីលើការបង្រៀនរបស់គ្រូក្នុងថ្នាក់ផងដែរ ដើម្បីពង្រីកចំណេះដឹងរបស់ខ្លួនអោយកាន់តែរឹងមាំទៀត៕

សូមចុចអាន៖ ខេត្តបាត់ដំបងដណ្ដើមជយលាភីសិស្សពូកែទូទាំងប្រទេសច្រើនជាងគេ

អត្ថបទ៖ ហួន ទីណារ័ត្ន