សុវណ្ណ គិរី អតីតកីឡាករ មេដាយមាសស៊ីហ្គេម

2016-05-17 17:30:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីករ សុវណ្ណ គិរី ថ្លែងមកកាន់ Sabay ថា លោកធ្លាប់ជាអតីតកីឡាការ៉ាតេដូ និងទទួលបានមេដាយមាសស៊ីហ្គេមកាលពីឆ្នាំ២០១១ នៅប្រទេសឥណ្ឌូនេស៊ី ។

តារាមានស្រុកកំណើតនៅរាជធានីភ្នំពេញថ្លែង ៖ “មុនបងចូលសិល្បៈ បងធ្លាប់ជាកីឡាករការ៉ាតេដូ ហើយក្រោយៗមក ក៏ធ្លាប់បានទទួលមេដាយមាសស៊ីហ្គេមនៅឥណ្ឌូនេស៊ីកាលពីឆ្នាំ២០១១ និងធ្លាប់បានមេដាយមាសនៅជប៉ុនដែរអូន"។

(សុវណ្ណ គិរី រូបកណ្តាលខាងលើទទួលបានមេដាយមាសលេខ១ នៅឥណ្ឌូនេស៊ី ឆ្នាំ២០១១)

មិនបានយូរប៉ុន្មានក្រោយជាប់មេដាយលេខ១ រួចមក លោកត្រូវបានគេឲ្យបំពេញភារកិច្ចបន្តរៀនការ៉ាតេដូមួយឆ្នាំនៅជប៉ុន។ ប៉ុន្តែក្រោយត្រឡប់មកស្រុកវិញ ពិធីកររូបនេះបានហក់ចូលសិល្បៈ បន្ទាប់ពីធ្លាប់បានប្រឡងក្នុងកម្មវិធីយុវតារាឆ្នាំ២០០៨រួចមក។ ពិធីករប៉ុស្តិ៍បាយ័នបន្ថែម៖ "រាល់ថ្ងៃបងនៅតែលេងតិចៗ ប៉ុន្តែឥឡូវអត់ដូចពីមុនទេ អាយុច្រើន រូបរាង ក៏ចាស់ជាងមុន ហើយការងារសិល្បៈរវល់ដកឃ្លាមិនចង់បាន ដូច្នេះកម្រិតនៃការលេង ក៏មិនដូចមុនដែរអូន "។

សុវណ្ណ គិរី មោទននឹងចរិតពីធម្មជាតិ

ពិធីករក្នុងកម្មវិធី The Style Cambodia បញ្ជាក់ថា លោកចេះលេងកីឡាមួយនេះ ដោយសារមានលោកឪពុកជាជើងឯក ការ៉ាតេដូសម័យសង្គមរាស្ត្រនិយម ក្រោយមកក៏បានបណ្ដុះលោកឲ្យក្លាយជាកីឡាករឆ្នើមម្នាក់នៅកម្ពុជា។ជាមួយគ្នានេះ គិរី បន្តឲ្យដឹងថា ឪពុកលោកឈ្មោះ ឡាច ច័ន្ទសុវណ្ណ ធ្លាប់ប្រកួតឈ្នះបានលេខ១ក្នុងចំណោមកីឡាគ្រប់ប្រភេទនៅកម្ពុជា ឆ្នាំ១៩៧៤។

(លោក ឡាច ច័ន្ទសុវណ្ ឪពុករបស់ សុវណ្ណ គិរី)

យ៉ាងណាមិញ ឆន្ទៈស្រឡាញ់កីឡាការ៉ាតេដូមួយនេះ តារាសម្ដែងក្នុងរឿង "ក្រមុំសៅកែ" អះអាងថា បើមានកម្មវិធីប្រកួតធំៗនៅក្រៅស្រុក លោកនឹងទៅហ្វឹកហាត់បន្ថែមដើម្បីនាំយកកីឡាការ៉ាតេដូនេះទៅ បង្ហាញនៅក្រៅស្រុក ប៉ុន្តែសេចក្ដីរំពឹងថានឹងទទួលបានមេដាយមាសដូចពីមុន លោកថា មិនហ៊ានរំពឹងទេ៕ អត្ថបទ៖ ថា ម៉ាលីដា

រូបថត៖ ផ្តល់ដោយ គិរី