Galaxy C5 ក្រៅពីរាងដូច iPhone 6s មានលក្ខណៈសម្បត្តិអីខ្លាំងជាង?

2016-06-01 19:00:07
ចំនួនមតិ 0 | ចំនួនចែករំលែក 0

ចន្លោះមិនឃើញ

សប្ដាហ៍កន្លងទៅនេះក្រុមហ៊ុន Samsung បានបញ្ចេញវត្តមានទូរសព្ទ Galaxy C5 ដោយឃើញមានការចាប់អារម្មណ៍ខ្លាំងពីអ្នកប្រើប្រាស់ ព្រោះតែវាមានរូបរាងដូចទៅនឹង iPhone 6s។ ក្រៅពីរូបរាង ចុះចំពោះលក្ខណៈសម្បត្តិវិញមួយណាមានប្រៀបជាង?

@ផ្ទៃអេក្រង់៖

Galaxy C5 មានបំពាក់អេក្រង់ប្រភេទ Super AMOLED ទំហំ ៥,២អ៊ីញ ដែលអាចបង្ហាញរូបភាពក្នុងកម្រិត 1080 x 1920 ភីកសែល និងមានដង់ស៊ីតេរូបភាព ៤២៤ ppi។

ចំពោះ iPhone 6s វិញនៅតែប្រើប្រាស់អេក្រង់ស៊េរីចាស់ LCD ទំហំ ៤,៧អ៊ីញ អាចបង្ហាញរូបភាពដែលមានដង់ស៊ីតេ ៣២៦ ppi ក្នុងកម្រិត 750 x 1334 ភីកសែលតែប៉ុណ្ណោះ។ អ្វីដែលពិសេសនោះគឺមានបំពាក់មុខងារ 3D Touch ដែលបញ្ជាកម្មវិធីបានកាន់តែងាយស្រួល។ @Software៖

iPhone 6s មានដំឡើងមកស្រាប់ដោយប្រព័ន្ធប្រតិបត្តិការ iOS 9 ហើយក៏អាចដំឡើងទៅកាន់ជំនាន់ចុងក្រោយ iOS 9.3 បានផងដែរ។ ចំណែកឯ Galaxy C5 ឯណេះវិញដើរដោយប្រព័ន្ធប្រតិបត្តិការ Android ជំនាន់ចុងក្រោយ Marshmallow ដែលមានផ្ទៃ Interface កាន់តែងាយស្រួលប្រើ រួមបញ្ចូលមុខងារថ្មីៗមួយចំនួន។

@ល្បឿនរបស់ម៉ាស៊ីន៖

Galaxy C5 មានបំពាក់ដោយបន្ទះ Chip Qualcomm MSM8952 Snapdragon 617 ដែលមាន CPU Cortex-A53 Octa-core ល្បឿន ១,៥GHz និង GPU Adreno 405។ អ្វីដែលពិសេសគឺមាន RAM ទំហំដល់ ៤GB ដែលធ្វើឲ្យការប្រើប្រាស់កម្មវិធី ឬ លេងហ្គេម 3D ប្រព្រឹត្តទៅយ៉ាងរលូន។

សម្រាប់ទូរសព្ទជំនាន់ថ្មីរបស់ Apple វិញមានបំពាក់នូវបន្ទះ Chip A9 និងមាន RAMទំហំ ២GB ហើយប្រៀបទៅនឹង Galaxy C5 ហាក់មានសភាពទាបជាងបន្តិច។ ក្រុមហ៊ុនបានបញ្ជាក់ដែរថា បន្ទះ Chip A9 នេះមានល្បឿនលឿនជាងមុនដល់ទៅ៧០ភាគរយ។

@កាមេរ៉ា៖

កាមេរ៉ារបស់ 6s Plus បានពង្រីកឲ្យមានទំហំធំជាងមុនគឺ ១២MP ដែលវាជួយឲ្យ iPhone ថតវីដេអូក្នុងកម្រិត 4K បានជាលើកដំបូង។ អ្វីដែលពិសេសនោះគឺគេបានបន្ថែមនូវមុខងារមួយគឺ Retina Flash ដោយមុខងារនេះប្រើប្រាស់អេក្រង់ទូរសព្ទជាភ្លើងរបស់កាមេរ៉ាខាងមុខ ដើម្បីជំនួយដល់ការថតរូប Selfie។ មិនតែប៉ុណ្ណោះក៏មានមុខងារ Live Photo ដែលធ្វើឲ្យរូបថតមានចលនាបាន។

Galaxy C5 ដែលមានកាមេរ៉ាខាងក្រោយទំហំ ១៦MP និង ខាងមុខទំហំដល់ ៨MP ជួយឲ្យរូបថត និងវីដេអូដែលថតបានច្បាស់ល្អ ទោះស្ថិតនៅក្នុងស្ថានភាពណាក៏ដោយ។

@ថាមពលថ្ម៖

ត្បិតថាទំហំថ្មរបស់ iPhone 6s តូចជាងមុនដោយមានត្រឹម (១៧១៥mAh) ប៉ុន្តែរយៈពេលនៃការប្រើប្រាស់គឺដូចគ្នាទៅនឹង iPhone 6 ដែរ គឺប្រើប្រាស់បាន១០ម៉ោងចំពោះការលេងអ៊ីនធឺណិត។ សម្រាប់ថាមពលថ្មរបស់ Galaxy C5 គឺមានទំហំដល់ ២៦០០mAh ដែលមានបំពាក់ដោយបច្ចេកវិទ្យាសាកថ្មបានលឿន Quick Charge 3.0 របស់ Qualcomm។

@តម្លៃ៖

Galaxy C5 នឹងមានដាក់លក់នៅប្រទេសចិន ក្នុងតម្លៃពីរផ្សេងគ្នា ដោយប្រភេទអង្គផ្ទុកទិន្នន័យទំហំ ៣២GB តម្លៃប្រហែល ៣៣៥ដុល្លារ និង ៦៤GB តម្លៃប្រហែល ៣៦៥ដុល្លារ។ ដោយឡែកបើក្រឡេកមើលតម្លៃបច្ចុប្បន្នរបស់ iPhone 6s គឺមានចាប់ពី ៦៤៩ដុល្លារ (១៦GB), ៧៤៩ដុល្លារ (៦៤GB) និង ៨៤៩ដុល្លារ (១២៨GB)។

បើតាមការប្រៀបធៀបខាងលើឃើញថារវាង iPhone 6s និង Galaxy C5 សុទ្ធតែមានលក្ខណៈសម្បត្តិពិសេសរៀងៗខ្លួន ដែលអាចយកប្រៀបលើគ្នាទៅវិញទៅមកបាន៕ ចុះប្រិយមិត្តយល់យ៉ាងណាដែរ?

ចុចអាន៖ Galaxy C5 ចេញជាផ្លូវការ កម្លាំងខ្លាំង តែតម្លៃធូរថ្លៃ

ប្រែសម្រួល៖ ហៃ សុខហេង ប្រភព៖ GSMArena, PhoneArena