បេក្ខជនអូឡាំពិករបស់កម្ពុជា Neko បានលេខ១ចម្ងាយ២១គ.មពីភ្នំពេញម៉ារ៉ាតុងព្រឹកនេះ

2016-06-12 17:31:49
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាកររត់ម៉ារ៉ាតុងជម្រើសជាតិកម្ពុជាដែលមានដើមកំណើតជប៉ុន Neko ដែលជាបេក្ខភាពម៉ារ៉ាតុងរបស់កម្ពុជាទៅអូឡាំពិកហ្គេមនៅប្រទេសប្រេស៊ីលទទួលបានចំណាត់ថ្នាក់លេខ១សម្រាប់វិញ្ញាសារត់ចម្ងាយ២១គីឡូម៉ែត្រក្នុងព្រឹត្តិការណ៍ពាក់កណ្តាលម៉ារ៉ាតុងភ្នំពេញអន្តរជាតិនាព្រឹកថ្ងៃទីអាទិត្យ ទី១២ ខែមិថុនា ឆ្នាំ២០១៦។

អ្នករត់ប្រណាំងជម្រើសជាតិកម្ពុជា Neko ធ្វើបានយ៉ាងល្អសម្រាប់ការរត់ចម្ងាយ២១គីឡូម៉ែត្រដែលនេះជាការត្រៀមខ្លួន និងកំណត់យកចំណាត់ថ្នាក់លេខ១ដែលកីឡាករដើមកំណើតជប៉ុនរូបនេះបានដាក់ទិសដៅមុនពេលធ្វើដំណើរទៅហ្វឹកហាត់នៅប្រទេសជប៉ុនដើម្បីចូលរួមប្រកួតក្នុងព្រឹត្តិការណ៍កីឡាអូឡាំពិកនាពេលខាងមុខនេះនៅប្រទេសប្រេស៊ីល។

ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា Neko ទៅចូលរួមប្រកួតក្នុងព្រឹត្តិការណ៍អូឡាំពិកហ្គេមក្នុងនាមជាជនជាតិកម្ពុជា។

សម្រាប់ព្រឹត្តិការណ៍រត់ប្រណាំងនេះ រៀបចំឡើងជារៀងរាល់ឆ្នាំក្នុងគោលបំណងអបអរថ្ងៃបុណ្យចម្រើនព្រះ ជន្មសម្តេចព្រះអគ្គមហេសី ព្រះវររាជមាតាជាតិខ្មែរ អបអរសាទរទិវាអូឡាំពិកលើកទី១២២ និងរត់ដើម្បីទីក្រុងស្អាត ប្រមូលប្រាក់សម្រាប់មូលនិធិជួយដល់មន្ទីរពេទ្យគន្ធបុប្ផា។

ព្រឹត្តិការណ៍រត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិលើកទី៦ ឆ្នាំ២០១៦ នេះ នឹងត្រូវរៀបចំឡើងនៅមុខព្រះបរមរាជវាំង តាមដងទន្លេមេគង្គដែលមានអ្នកចូលរួមទាំងជាតិ និងអន្តរជាតិប្រហែលជាជិត១ម៉ឺននាក់៕