Cam-Tiger ជើងទី២ នាំយកកីឡាករថ្មីតែម្នាក់គត់
- 2016-06-14 21:25:50
- ចំនួនមតិ 0 | ចំនួនចែករំលែក 0
Cam-Tiger ជើងទី២ នាំយកកីឡាករថ្មីតែម្នាក់គត់
ចន្លោះមិនឃើញ
ក្រុម Cambodian Tiger នឹងនាំយកកីឡាករ គួច ដានី មកជួយក្រុមសម្រាប់ជើងទី២ ដោយតាមគម្រោងក្រុមដែលមានម្ចាស់ជាជនជាតិជប៉ុនមួយនេះមានកីឡាករថ្មីតែម្នាក់នេះទេ។
លោក ហុក សុជីវ័ន្ត គ្រូបង្វឹកក្លឹបបាល់ទាត់ Cambodian Tiger បានបញ្ជាក់ថាក្រុមរបស់លោកមិនមានការផ្លាស់ប្ដូរអ្វីច្រើននោះទេ សម្រាប់ជើងទី២ពានរង្វាន់លីគកំពូលកម្ពុជានេះ។ ដោយតាមគម្រោងមានតែយក គួច ដានី ពីក្រុមស៊ីម៉ាក់មកជួយតែម្នាក់គត់។
ក្នុងជុំទីមួយ ក្រុម Cam-Tiger ទទួលបានលទ្ធផលមិនសូវល្អមែន ប៉ុន្តែលោក ហុក សុជីវ័ន្ត រំពឹងថាកូនក្រុមរបស់ខ្លួននៅជុំទី២នឹងបង្ហាញទម្រង់លេងល្អជាងនេះ ព្រោះពួកគេបានយល់ពីគ្នាច្រើន។ គ្រូបង្វឹករូបនេះបន្ដថាបាល់ទាត់មិនត្រឹមតែមានបច្ចេកទេសមួយមុខទេ សំខាន់គឺកីឡាករម្នាក់ៗចេះយល់ចិត្តគ្នាទៅវិញទៅមក ទើបលេងសហការគ្នាបានជោគជ័យ។
បន្ថែមពីលើនេះដែរ អតីតគ្រូបង្វឹកក្រុមជម្រើសជាតិកម្ពុជាក្រោមអាយុ ១៩ឆ្នាំខាងលើទទួលស្គាល់ដែរថាក្រុមរបស់លោកប្រឹងប្រែងលេងខ្លាំងពេក ដោយកីឡាករម្នាក់ៗប្រឹងរត់ដណ្ដើមបាល់ខ្លាំង ដែលធ្វើឱ្យបាត់បង់ទម្រង់លេងអស់។ ដូច្នេះជើងទី២ លោកនឹងប្រឹងប្រែងស្វែងរកកីឡាករនាំលេង ហើយរក្សាទម្រង់ឱ្យបានច្បាស់។
ប្រកួតដំបូងបើកឆាកជុំទី២ របស់ក្រុម Cambodian Tiger នឹងត្រូវប៉ះជាមួយក្រុមភ្នំពេញក្រោននៅថ្ងៃសុក្រសប្ដាហ៍នេះ វេលាម៉ោង៦ល្ងាចនៅពហុកីឡដ្ឋានជាតិ៕
អត្ថបទ៖ មុន្នី រម្យ