តារាជើងចាស់ម្នាក់ កើតទាចទឹកកាន់តែធ្ងន់ធ្ងរ ថ្ងូរអត់ប្រាក់ព្យាបាល

2016-06-17 14:31:14
ចំនួនមតិ 0 | ចំនួនចែករំលែក 0

ចន្លោះមិនឃើញ

"ក្មួយអើយ ពេលចុកម្ដងៗចង់តែផុតទេ ឥឡូវហ្នឹងខ្លួនកាន់តែហើមទៅៗ មិនដឹងរស់បានប៉ុន្មានទៀតទេ អ៊ីអត់មានលុយសោះសូម្បីតែ១រៀល..." តារាសម្ដែងជើងចាស់អ្នកស្រី ឈុន ណារី ដែលកើតទាចទឹកជាច្រើនឆ្នាំមកហើយ ថ្លែងទាំងទឹកភ្នែកប្រាប់ Sabay ព្រឹកនេះ។

សិល្បករជើងចាស់ដែលមានប្ដីជាយោធិនពិការផងនោះ បានបន្តថា ក្រុមគ្រួសារមិនត្រឹមតែមិនមានប្រាក់ព្យាបាលទេ បច្ចុប្បន្នថែមទាំងជំពាក់គេថែមទៀតផង ដោយសារសភាពជំងឺកាន់តែធ្វើទុក្ខខ្លាំងទៅៗ។ អ្នកស្រីប្រាប់ថា អ្នកស្រីដឹងខ្លួន ថាមិនអាចរស់រានបានយូរអង្វែងទៀតឡើយ ដូច្នេះហើយ គ្រាចុងក្រោយនេះ ប្រាថ្នាចង់ពិសាអ្វីឆ្ងាញ់មួយពេល នាគ្រាចុងក្រោយ។

ជំងឺទាចទឹក របស់អ្នកស្រី ឈុន ណារី បានចាប់ផ្ដើមធ្វើទុកខ្លាំងជាង១ឆ្នាំមកហើយ អាការជំងឺ គឺ ចុក ហត់ ពិបាកដកដង្ហើម។ កន្លងមក អ្នកស្រីបានទៅព្យាបាលនៅមន្ទីរពេទ្យជាច្រើនកន្លែង តែពេទ្យប្រាប់ថា មិនមានសង្ឃឹមឡើយ ត្បិតអីជំងឺនេះ បានចូលដល់ដំណាក់កាលធ្ងន់ធ្ងរហើយ បើព្យាបាលត្រូវការប្រាក់ច្រើន។ ដោយសារតែបែបនេះ បច្ចុប្បន្ន គឺពឹងលើការព្យាបាលដោយការលេបថ្នាំខ្មែរប៉ុណ្ណោះ ។

ងាកមកក្រុមគ្រួសារវិញ អ្នកស្រី ឈុន ណារី មានស្វាមីជា យោធិនពិការ មានកូនស្រីម្នាក់ កំពុងសិក្សានៅសាកលវិទ្យាល័យមួយ។បច្ចុប្បន្នក្រុមគ្រួសារ មិនមានផ្ទះសម្បែងផ្ទាល់ខ្លួនឡើយ គឺរស់នៅជាមួយម្ដាយក្មេកនៅឯខេត្តសៀមរាប ហើយពឹងផ្អែកទាំងស្រុង លើប្រាក់សោធននិវត្តន៍៣០ម៉ឺនរៀលក្នុងមួយខែ។

ជិត២០ ឆ្នាំហើយដែល អ្នកស្រី ឈុន ណារី បានចូលសិល្បៈ ដោយអាជីពស្ទើរមួយជីវិតនេះ មិនមានអ្វីសល់ឡើយ កម្រៃបានមកពីការថត បានត្រឹមតែដោះស្រាយជីវភាពប្រចាំថ្ងៃ និងជួយឲ្យកូនស្រីបានរៀនប៉ុណ្ណោះ។

ប្រសិនបើសប្បុរសជន មានបំណងចង់ជួយដល់តារាសម្ដែងជើងចាស់រូបនេះ អាចទាក់ទងទៅលេខទូរសព្ទអ្នកស្រីផ្ទាល់ 097 600 9297 / 015 423 553៕