ប្រិមប្រិយ ទម្លាយរឿងនាង ត្រូវបុរសម្នាក់បោកអស់ឡាន និងប្រាក់ជាច្រើន

2016-06-24 16:01:44
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែងក្នុងក្រុមនាយកុយ នាងប្រិមប្រិយ បានត្អូញត្អែរថា ខ្លួនត្រូវបានបុរសម្នាក់ខ្ចីប្រាក់ជាច្រើន និងរថយន្តមួយគ្រឿងទៀតផង យកទៅបាត់ មិនព្រមយកមកសងវិញ។

តារាកំប្លែងរូបនេះបានទម្លាយឲ្យដឹង តាមរយៈសារលើគណនី Facebook ផ្ទាល់ខ្លួនម្សិលមិញ ដោយនាងបានសរសេររៀបរាប់ថា ខ្លួនបានស្គាល់បុរសនោះ ជាច្រើនឆ្នាំមកហើយ មិនដែលបង្ករឿងពិបាកចិត្តដល់បុរសនោះឡើយ ប៉ុន្តែផ្ទុយទៅវិញ បុរសនោះបានធ្វើបាបនាងជាច្រើនលើកច្រើនសា។

នាងថា បុរសនោះបានខ្ចីប្រាក់ជាច្រើនលើក ដោយមិនបានសងមកវិញឡើយ ហើយជាងនេះទៅទៀត សូម្បីតែឡានដែលនាងកំពុងតែជិះរាល់ថ្ងៃ ក៏ត្រូវបានបុរសនោះខ្ចីយកទៅលក់ ដើម្បីដោះស្រាយការរកស៊ីផងដែរ។

ការដែលនាំឲ្យតារាកំប្លែងរូបនេះ សម្រេចចិត្តឲ្យប្រាក់នឹងឡានឲ្យបុរសនោះខ្ចី ក៏ព្រោះតែនាងគិតថា គឺជាអ្នករាប់អានគ្នាស្មោះ មិនដែលគិតថា បុរសនោះធ្វើដាក់នាងបែបនេះឡើយ។

ខាងក្រោមនេះគឺជា សារទាំងស្រុងរបស់ប្រឹមប្រិយដែលរៀបរាប់ពីទុក្ខសោកដែលបុរសនោះបានបើកប្រាស់។

"តាំងពីចាប់ផ្ដើមស្គាល់គ្នារហូតមកដល់ពេលនេះ ខ្ញុំមិនដែលចង់បានអ្វីពីលោកឡើយ ហើយ ក៏មិនដែលទៅធ្វើអ្វីអោយពិបាកដល់លោកដែរ ប៉ុន្មានឆ្នាំមកនេះដែលខ្ញុំតែងតែជួយលោករហូតមក ក៏ព្រោះតែខ្ញុំគិតថា មនុស្សកើតមកជាប្រយោជន៍សម្រាប់ជួយគ្នាទៅវិញទៅមក នេះក៏មិនមែនជាលើកទីមួយនោះទេដែលលោកបានធ្វើបាបខ្ញុំ ហើយខ្ញុំក៏ដឹងច្បាស់ថា លោកជាមនុស្សបែបណា តែខ្ញុំតែងតែប្រាប់ខ្លួនឯងថា ( ឈ្នះមនុស្សអាក្រក់ដោយអំពើល្អ ឈ្នះមនុស្សភូតភរដោយពាក្យសច្ចៈ ) តែចំពោះលោក ខ្ញុំមិនដឹងថាត្រូវធ្វើល្អដល់កំរិតណា ទើបលោកអាចមានភាពជាមនុស្សនៅក្នុងខ្លួនខ្លះ សូម្បីតែរថយន្តផ្ទាល់ខ្លួនរបស់ខ្ញុំ ក៏ខ្ញុំសុខចិត្តអោយលោកខ្ចីយកទៅលក់ដើម្បីដោះស្រាយបញ្ហារកស៊ីរបស់លោក ព្រមទាំងលុយមួយចំនួនទៀតដែលលោកបានខ្ចីខ្ញុំ វាពិតជាច្រើនណាស់សំរាប់ខ្ញុំព្រោះ ខ្ញុំជាអ្នកក្រីក្រត្រូវទទួលបន្ទុកមើលថែរក្សាអ្នកម្ដាយដែលមានជំងឺប្រចាំខ្លួននឹងផ្គត់ផ្គង់ការរៀនសូត្ររបស់កូនថែមទៀតផង"។

តារាកំប្លែងរូបនេះបន្តថា "ខ្ញុំគ្រាន់តែចង់ប្រាប់លោកថា មនុស្សកើតមក បាតដៃទទេ ស្លាប់ទៅវិញ ក៏បាតដៃទទេដូចគ្នា ដូច្នេះសូមលោកកុំលោភលន់ខ្លាំងពេក សម្រាប់ខ្ញុំ ផ្ទះ លុយ ឡាន គ្រាន់តែជាទ្រព្យសម្បត្តិក្រៅខ្លួនតែប៉ុណ្ណោះ តែអ្វីដែលសំខាន់នោះ គឺការស្រលាញ់ ការរាប់អាន ភាពស្មោះត្រង់ នឹងការផ្ដល់តម្លៃជូនមនុស្សដូចគ្នា ទៅវិញទៅមក ទើបជាភាពសំខាន់ដែលខ្ញុំត្រូវការ បើសិនជាជាតិមុន ខ្ញុំមានជំពាក់កម្មលោកសូមអោយយើងរួចគ្នាទៅចុះ តែបើសិនជាខ្ញុំមិនបានជំពាក់កម្មលោកនោះទេ ខ្ញុំក៏សូមអោយចប់ត្រឹមជាតិនេះដែរ ខ្ញុំសូម អហោសិកម្មអោយលោកគ្រប់យ៉ាងបើទោះបីជាលោកមិនទាន់ស្លាប់ក៏ដោយ"។

ជាមួយនឹងការបង្ហោះសារអមដោយរូបថត១សម្លឹងផងនេះ នាយកុយ ដែលជាមេក្រុមក៏បាន Comment ថា សូមឲ្យបុរសនោះ សងប្រាក់មកប្រឹមប្រិយវិញព្រោះ នាងកំពុងតែជួបការលំបាក ដោយនាងត្រូវមើលថែម្ដាយកំពុងឈឺ និងកូនទៅសាលារៀន។Comment នាយកុយ "បើប្អូនមានលុយ សងគាត់ទៅ ពេលដែលគាត់មកពីអាមរិកវិញ បងមើលទៅដូចជាពិបាកភ្នែកណាស់ ព្រោះអីសព្វថ្ងៃ ជិះឡានជាមួយនាយក្រិនទេ ណាមួយម្ដាយឈើ និងកូនរៀនគ្រប់ច្រក"។

ឆ្លើយតបជាមួយ Sabay ជុំវិញការលើកឡើងខាងលើ ប្រឹមប្រិយ បាននិយាយដោយខ្លីថា ខ្លួនមិនអាចបញ្ចេញឈ្មោះបុរសនោះឲ្យដឹងជាសាធារណៈឡើយ ហើយនាងក៏មិនចង់រំលឹករឿងនេះឡើងវិញដែរ ដោយមិនចង់ឲ្យរឿងនេះវែងឆ្ងាយ នាងសូមអហោសិកម្មឲ្យបុរសនោះចុះ៕

អត្ថបទ៖ ខុត សីហា 