អគារ EXCHANGE SQUARE លំដាប់ពិភពលោក នៅកម្ពុជា បញ្ចប់ការសាងសង់គ្រោងដំបូលអគារហើយ

2016-06-29 17:20:22
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងអភិវឌ្ឍន៍អគារលំដាប់ពិភពលោក គ្រោងនឹងបញ្ចប់នៅចុងឆ្នាំ២០១៦ ដើម្បីស្វាគមន៍បណ្ដាអ្នកវិនិយោគក្នុងការជួលការិយាល័យ និងហាងទំនើបឈានមុខ

អគារ EXCHANGE SQUARE ដែលជាអគារអភិវឌ្ឍន៍ពហុមុខងារក្នុងទីក្រុងភ្នំពេញនៃប្រទេសកម្ពុជា ត្រូវបានប្រកាសជាផ្លូវការនៅក្នុងពិធីបញ្ចប់ការសាងសង់គ្រោងដំបូលអគារ ដោយវត្តមានចូលរួមពីមន្ត្រីជាន់ខ្ពស់របស់រាជរដ្ឋាភិបាល សហគមន៍ធុរកិច្ច និងដៃគូសំខាន់ៗជាច្រើនរូបទៀត។ នេះបើយោងតាមការប្រកាសរបស់ក្រុមហ៊ុន Hongkong Land។

វត្តមានថ្នាក់ដឹកនាំសំខាន់ៗ មាន លោក Y K Pang អគ្គនាយកប្រតិបត្តិក្រុមហ៊ុន Hongkong Land ឯកឧត្តម ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តំណាងឯកឧត្តម ជា សុផារ៉ា ទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោក Raymond Chow នាយកប្រតិបត្តិក្រុមហ៊ុន Hongkong Land។

លោក Y K Pang បានថ្លែងថា "នេះជាជោគជ័យដ៏សំខាន់មួយរបស់អគារ EXCHANG SQUARE ដោយយើងបានប្រារព្ធពិធីរួមគ្នាជាមួយតំណាងរាជរដ្ឋាភិបាល ដៃគូនានា និងភតិកៈរបស់យើងនៅទីតាំងអចលនទ្រព្យលំដាប់ពិភពលោកមួយនេះ ដែលស្ថិតក្នុងតំបន់ប្រកបដោយសក្ដានុពលក្នុងរាជធានីភ្នំពេញ។ កំណើននៃការចាប់អារម្មណ៍ និងការប្ដេជ្ញាចិត្តពីភតិកៈ គឺជាសញ្ញាមួយបង្ហាញថា អគារ EXCHANGE SQUARE កំពុងតែសម្រេចបានតាមចក្ខុវិស័យរបស់ក្រុមហ៊ុន ដើម្បីក្លាយជាកាតាលីករសម្រាប់សកម្មភាពជំនួញ និងហាងទំនើបនៅក្នុងរាជធានីនៃកម្ពុជា"។

ក្នុងចំណោមភតិកៈការិយាល័យក្នុងអគារ EXCHANGE SQUARE រួមមាន ស្ថាប័នហិរញ្ញវត្ថុឈានមុខក្នុងតំបន់ ដូចជា ធនាគារ CIMB Bank ធនាគារពិភពលោក និងសាជីវកម្មហិរញ្ញវត្ថុអន្តរជាតិ ព្រមទាំងក្រុមហ៊ុនជំនួញរបស់ជប៉ុន Mitsui & Co. ផងដែរ។ ចំពោះភតិកៈហាងទំនើបសំខាន់ៗវិញ រួមមាន ក្រុមហ៊ុន Starbucks ក្រុមហ៊ុន Yves Rocher និងផ្សារទំនើបលក់ម្ហូបឆ្ងាញ់ៗ ដែលគ្រប់គ្រង ដោយក្រុមហ៊ុនវិនិយោគរួមក្នុងភ្នំពេញ។

គ្រោងនឹងបញ្ចប់ការសាងសង់នៅដំណាច់ឆ្នាំនេះ អគារ EXCHANGE SQUARE ជាអគារការិយាល័យលំដាប់ថ្នាក់ទី១ (Grade A) និងជាផ្សារទំនើបបែបសម័យថ្មី។ នៅក្នុងដំណាក់កាលដំបូងអគារ EXCHANGE SQUARE នឹងផ្តល់ទំហំ ៣៩.៧០០ ម៉ែត្រការ៉េ សម្រាប់ទីតាំងការិយាល័យ និងហាងលក់ទំនិញ ព្រមទាំងចំណតសម្រាប់រថយន្តរហូតដល់ទៅ ៦៥០ គ្រឿងទៀតផង។

អគារ EXCHANGE SQUARE មានទីតាំងស្ថិតនៅចំកណ្ដាលភ្នំពេញ ក្នុងតំបន់កំពុងរីកលូតលាស់ផ្នែកហិរញ្ញវត្ថុ និងជាតំបន់ហ៊ុមព័ទ្ធទៅដោយមហាវិថីសំខាន់ៗ។ អចលនទ្រព្យនេះរួមចំណែកដល់យុទ្ធសាស្ត្ររបស់ក្រុមហ៊ុន Hongkong Land ក្នុងការបន្តជំរុញកំណើនប្រតិបត្តិការពាណិជ្ជកម្មអចលនទ្រព្យរបស់ក្រុមហ៊ុនមេ ក្នុងតំបន់ប្រមូលផ្ដុំដោយអាជីវកម្មនៅទូទាំងអាស៊ី។

Hongkong Land មានឈ្មោះល្បីល្បាញចំពោះស្នាដៃសំណង់ ការគ្រប់គ្រងអចលនទ្រព្យ និងសេវាអតិថិជនដែលប្រកបដោយគុណភាព ហើយក្រុមហ៊ុនកំពុងអនុវត្តនូវបទដ្ឋាន និងជំនាញឈានមុខក្នុងឧស្សាហកម្មនេះ ដើម្បីអភិវឌ្ឍ ដែលនឹងកំណត់បានជាបទដ្ឋានថ្មីមួយសម្រាប់ការអភិវឌ្ឍផ្នែកពាណិជ្ជកម្មនៅកម្ពុជា។

លោក Y K Pang អគ្គនាយកប្រតិបត្តិក្រុមហ៊ុន Hongkong Land ស្វាគមន៍តំណាងរាជរដ្ឋាភិបាល ភ្ញៀវកិត្តិយស និងដៃគូអាជីវកម្មនៅក្នុងពិធីបញ្ចប់ការសាងសង់គ្រោងដំបូលអគារ EXCHANGE SQUARE

ពិធីបញ្ចប់ការសាងសង់គ្រោងដំបូលអគារដែលមានការចូលរួមពី (ពីឆ្វេងទៅស្ដាំ)៖ លោក James Robinson នាយកប្រតិបត្តិក្រុមហ៊ុន Hongkong Land, លោក Yong Bin Lim អនុប្រធានប្រតិបត្តិក្រុមហ៊ុន POSCO, លោក Y K Pang អគ្គនាយកប្រតិបត្តិក្រុមហ៊ុន Hongkong Land, ឯកឧត្តម ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់, លោក Raymond Chow នាយកប្រតិបត្តិក្រុមហ៊ុន Hongkong Land, លោក Simon Dixon នាយកផ្នែកហិរញ្ញវត្ថុក្រុមហ៊ុន Hongkong Land, ឯកឧត្តម កើត សារ៉េត អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងឯកឧត្ដម ម៉ម សុផាន់ណា ទីប្រឹក្សាក្រសួងរៀបចំដែនដី នគរូបនីយកម្ម និងសំណង់

អគារ EXCHANGE SQUARE ដែលជាអគារការិយាល័យលំដាប់ថ្នាក់ទី១ (Grade A) និងជាផ្សារទំនើបបែបសម័យថ្មី គ្រោងនឹងបញ្ចប់ការសាងសង់នៅដំណាច់ឆ្នាំនេះ

* ព័ត៌មានអំពីគម្រោង

ឈ្មោះគម្រោង៖ EXCHANGE SQUARE
ទីតាំង៖ ទល់មុខផ្លូវ១០៦, ៥១, ៦១ ហើយមានទីតាំងនៅចំកណ្ដាលភ្នំពេញ ក្នុងតំបន់កំពុងរីកលូតលាស់ផ្នែកហិរញ្ញវត្ថុ។
ការទទួលបានទីតាំង៖ ខែវិច្ឆិកា ឆ្នាំ២០១១
ក្រុមហ៊ុនអភិវឌ្ឍ៖ ក្រុមហ៊ុន Hongkong Land (Premium Investments) Limited
អ្នកគូរប្លង់៖ Aedas
ក្រុមហ៊ុនម៉ៅការធំ៖ Posco Engineering and Construction Limited
ផ្ទៃក្រឡាទីតាំង៖ ១០.៧០០ ម៉ែត្រការ៉េ
ផ្ទៃក្រឡាជាន់សរុប៖ ៣៩.៧០០ ម៉ែត្រការ៉េ
សមាសធាតុ៖ ហាងទំនើបចំនួន ៤ ជាន់ និងការិយាល័យលំដាប់ទី១ (Grade A )ចំនួន ១៦ ជាន់
ទំនាក់ទំនង៖ អគារ EXCHANGE SQUARE ហ៊ុមព័ទ្ធដោយសួនច្បារ និងមហាវិថីសំខាន់ៗដែលបង្កភាពងាយស្រួលដល់ការចូលទៅកាន់តំបន់សំខាន់ៗ និងកន្លែងដែលមានការទាក់ទាញកំពុងពេញនិយមនៅក្នុងរាជធានី។ គម្រោងនេះមានចម្ងាយមិនដល់ ១០ គ.ម ពីព្រលានយន្តហោះ ហើយវាផ្តល់កន្លែងចតយានយន្តប្រមាណ ៦៥០ គ្រឿង។
គម្រោងនឹងបញ្ចប់៖ នៅចុងឆ្នាំ២០១៦
វិបសាយ៖