ជិតចប់កុងត្រា សៅ ឧត្តម បង្ហើបគម្រោងថ្មី

2016-07-01 16:19:08
ចំនួនមតិ 0 | ចំនួនចែករំលែក 0

ចន្លោះមិនឃើញ

សៅ ឧត្តម ថ្លែងមកកាន់ Sabay ថា នៅសល់ប្រហែល ៣ទៅ៤ខែទៀត លោកចប់កុងត្រាជាមួយកម្មវិធី Cambodian Idol ហើយ។ ក្នុងនោះ លោកក៏មានគម្រោងថាច្រៀងតែបទ Original ប៉ុណ្ណោះ នៅទ្រនំថ្មី ប៉ុន្តែលោកសុំមិនទាន់បញ្ជាក់ថាផលិតកម្មណា។

"កុងត្រានៅហង្សមាស សល់ប្រហែល ៣ទៅ៤ខែទៀតទេ ហើយបើសិនខ្ញុំចេញ គឺខ្ញុំច្រៀងតែបទ Original ប៉ុណ្ណោះនៅផលិតកម្មថ្មី"។

ជាមួយគ្នានេះ អតីត Top3 កម្មវិធី Cambodian Idol បញ្ជាក់ផងដែរថា ជុំវិញរឿងផលិតកម្ម គឺមានច្រើនទាក់ទងលោកឲ្យទៅច្រៀង ប៉ុន្តែក្នុងនោះមាន ផលិតកម្មមួយ ដែលលោកកំពុងពិចារណា។ សៅ ឧត្តម អះអាងថា សព្វថ្ងៃលោកច្រៀងតែបទស្នាដៃនិពន្ធថ្មីប៉ុណ្ណោះ លែងច្រៀងបទចម្លងទៀតហើយ។ ឆាប់ៗខាងមុខនេះ លោកនឹងមានបទស្នាដៃថ្មី និពន្ធដោយខ្លួនឯងផ្ទាល់ ចែកជូនប្រិយមិត្តស្តាប់កម្សាន្តតាមរយៈការផុសក្នុងបណ្តាញសង្គមទៀតផង។

"មានផលិតកម្មច្រើនដែរ គេទាក់ទង ប៉ុន្តែក្នុងនោះ មានមួយ ដែលខ្ញុំកំពុងពិចារណា ព្រោះផលិតកម្មនោះត្រូវនឹងចិត្តគំនិតខ្ញុំដោយសារតែគេធ្វើតែបទស្នាដៃនិពន្ធថ្មី។ យ៉ាងណាមិញខាង ហង្សមាស ខ្ញុំក៏មិនទាន់ប្រាកដដែរ ខាងពួកគាត់(ហង្សមាស)ក៏ធ្លាប់បានហៅខ្ញុំដែរ ប៉ុន្តែរឿងរ៉ាវយ៉ាងណានោះ ចាំពេលផុតកុងត្រា ទស្សនិកជននឹងបានឃើញ"។ សៅ ឧត្តម បន្ថែម៕

អត្ថបទ៖ ថា ម៉ាលីដា