ឃុន វុត្ថា ចំណាយខ្ទង់ម៉ឺនដុល្លារបើកមុខរបរថ្មី

2016-07-07 23:01:10
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងប្រចាំ We Production ឃុន វុត្ថា ថ្លែងមកកាន់ Sabay មុននេះថា លោកបានបង្កើតមុខរបរថ្មី ឈ្មោះថា "ឃុន វុត្ថា តន្ត្រីសម័យ" ដោយចំណាយទុនប្រហែលជាង៣ម៉ឺនដុល្លារអាមេរិក។

ឃុន វុត្ថា ថ្លែង៖ “ចំពោះវង់តន្ត្រីមួយនេះ ខ្ញុំទើបតែបើកថ្មីៗនេះទេបង គឺបើកត្រៀមសម្រាប់ខែប្រាំងខាងមុខដែលជារដូវការ បុណ្យទាន ជប់លៀងជាដើមមកដល់បង"។

ជុំវិញការបើកជំនួញផ្នែកតន្ត្រីសម័យនេះ អតីត The Voice រដូវកាលទី១ ប្រាប់ថា មិនមែនបើកតែម្នាក់ឯងទេ គឺមានការចូលហ៊ុនជាមួយបងប្រុសបង្កើត ដែលមានដុងខាងនិស្ស័យសិល្បៈដូចវុត្ថាដែរ។ ជាមួយគ្នានេះ តារាចម្រៀងមកពីខេត្តព្រៃវែង បញ្ជាក់ថា គម្រោងបើកវង្សតន្ត្រីនេះ បានគ្រោងទុកតាំងពីជាងមួយឆ្នាំមុន ប៉ុន្តែដោយសារមិនទាន់មានថវិកាគ្រប់គ្រាន់ទើបទុកចោលសិន។

ពាក់ព័ន្ធនឹងការបើករបរថ្មីនេះ ម្ចាស់បទ "ចង់ត្រឡប់ទៅអតីត" អះអាងថា ខ្ទង់ចំណាយខាងលើ បានមកពីការសន្សំក្នុងវិស័យសិល្បៈនេះ បូករួមនឹងថវិការបស់បងប្រុសផងដែរ។ វង់តន្រ្តីមួយនេះ ស្ថិតនៅខេត្តព្រៃវែង ដែលជាស្រុកកំណើតរបស់ ឃុន វុត្ថា ក្នុងនោះ លោកបញ្ជាក់ថា មានបម្រើបងប្អូនគ្រប់ ២៥ខេត្ត-ក្រុង និងមានតម្លៃសមរម្យ។

“វង់តន្ត្រីមួយនេះ ខ្ញុំជឿថា មានការគាំទ្រច្រើន ដោយសារបងប្រុសធ្លាប់ដើរច្រៀង និងធ្វើការផ្នែកនេះដែរ។ សម្រាប់តម្លៃនៃការជួលគឺសមរម្យបំផុតបង អាចថាធូរថ្លៃទៀតផង"៕

អត្ថបទ៖ ថា ម៉ាលីដា រូបថត៖ ផ្តល់ដោយ វុត្ថា