គង់ សុធារិទ្ធ និយាយអ្វីខ្លះក្រោយការសម្ដែងល្ខោនខោលឈុត "ថលតយ័ន្ត"?

2016-07-13 19:57:44
ចំនួនមតិ 0 | ចំនួនចែករំលែក 0

ចន្លោះមិនឃើញ

គង់ សុធារិទ្ធ មើលឃើញថា ការសម្ដែងល្ខោនខោលរឿងរាមកេរ្តិ៍ឈុត "ថលតយ័ន្ត" ធ្វើឡើងនៅសាលាមធ្យមវិចិត្រសិល្បៈកន្លងមកនេះ បានទទួលជោគជ័យលើសការរំពឹងទុក។

មន្ត្រីក្រសួងវប្បធម៌រូបនេះបន្តថា អ្នកទស្សនាមានចំនួនច្រើន ហើយប្រសិនបើគម្រោងរបស់លោករៀបចំការសម្ដែងលើកក្រោយទៀតទាំងនៅភ្នំពេញ និងតាមបណ្ដាខេត្ត នៅតែមានការការគាំទ្រដូច្នេះ នោះជាសញ្ញាវិជ្ជមានសម្រាប់ទម្រង់សិល្បៈល្ខោនខោល ឬទម្រង់សិល្បៈផ្សេងទៀតរបស់ខ្មែរហើយ។

“ខ្ញុំចង់ឱ្យមានអ្នកចូលរួមគាំទ្រឱ្យបានច្រើនដូច្នេះ ជាជាងការណ៍ដែលយើងចាំតែថា ព្រោះសិល្បៈដើម្បីជាតិយើងទាំងអស់គ្នា"។ គង់ សុធារិទ្ធ ថ្លែងមកកាន់ Sabay។ លោកបន្តថា បន្ទាប់ពីការសម្ដែងល្ខោនខោលលើកនេះ ក៏មានតំណាងយុវជនខេត្តកំពង់ស្ពឺទាក់ទងក្នុងការនាំយកទម្រង់ល្ខោនខោលទៅសម្ដែងទីនោះផងដែរ ហើយលោកកំពុងតែពិចារណាសំណើនេះ។

ទោះបីជាយ៉ាងណា ស្ថាបនិកមូលនិធិ "មិត្តស្រឡាញ់វប្បធម៌" ដដែលអះអាងថា លោកនឹងចូលរួមជាមួយក្រុមយុវជនល្ខោនខោលបន្តទៀត ដើម្បីបង្កើតព្រឹត្តិការណ៍សិល្បៈខាងលើឱ្យបានកាន់តែធំមុន។ លោកជឿថា នឹងមានអ្នកចូលទស្សនាកាន់តែច្រើន បង្ហាញនូវការគាំទ្ររបស់ពួកគេដល់ទម្រង់សិល្បៈវប្បធម៌ និងលើកទឹកចិត្តដល់សិល្បករ។ ម្យ៉ាងទៀត ប្រសិនបើវិស័យសិល្បវប្បធម៌មានការរីកចម្រើនល្បីទូទាំងពិភពលោក នោះជាមុខមាត់ប្រទេសជាតិ និងប្រជាជនទាំងអស់គ្នា៕

អត្ថបទ៖ សំ ជំនាញ