កីឡដ្ឋានស្វាយរៀង នឹងធ្វើដំបូលថ្មីឱ្យហើយនៅចុងខែនេះ

2016-07-19 22:13:27
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីត្រូវខ្យល់កន្ទ្រាក់ខ្លាំងប៉ើងដំបូលកាលពីប៉ុន្មានខែកន្លងទៅនេះ កីឡដ្ឋានស្វាយរៀងបានរៀបចំសាងសង់ដំបូលថ្មីឡើងវិញហើយ ដោយតាមគម្រោងនឹងធ្វើឱ្យរួចរាល់នៅចុងខែនេះ ដើម្បីត្រៀមខ្លួនធ្វើជាកន្លែងប្រកួតផ្ដាច់ព្រ័ត្រពានរង្វាន់ ស្វាយរៀងខាប់ លើកទី២ ឆ្នាំ២០១៦។

លោក ម៉ៅ សុនិដេន អ្នកផ្ដល់ព័ត៌មានពីខេត្តស្វាយរៀង បានប្រាប់ Sabay ថាកីឡដ្ឋានស្វាយរៀងនេះ កំពុងតែជួសជុលឡើងវិញហើយ ដោយរំពឹងថានឹងធ្វើឱ្យហើយនៅចុងខែនេះ។ ក្រុមជាងជួសជុល ដែលជួសជុលថ្មីនេះគឺទៅពីរាជធានីភ្នំពេញទៅ ដោយសុទ្ធតែអ្នកមានបទពិសោធន៍ច្រើនក្នុងការធ្វើដំបូល។ មួយវិញ ការដែលប្រញាប់ជួសជុលឱ្យលឿននេះ គឺដោយសារតែខេត្តស្វាយរៀង នឹងរៀបចំការប្រកួតផ្ដាច់ព្រ័ត្រពានរង្វាន់ ស្វាយរៀងខាប់ នៅកីឡដ្ឋានស្វាយរៀងនេះតែម្ដង។

កីឡដ្ឋានស្វាយរៀងជាទីលានប្រកួតមួយដែលមានស្មៅធម្មជាតិ ហើយមានការប្រកួតច្រើននៅទីនោះ។ ខណៈដែលកន្លែងអង្គុយវិញ ត្បិតតែមិនទាន់បានធ្វើជុំវិញ ប៉ុន្តែបច្ចុប្បន្នអាចផ្ទុកមនុស្សបានជាង២ពាន់នាក់ហើយ។ ចំណែកឯការប៉ើងដំបូលនេះ គឺដោយសារតែមានខ្យល់កន្ទ្រាក់ខ្លាំងអំឡុងពេលភ្លៀង កាលពីប៉ុន្មានខែមុននេះ៕