ជៀស ស្រួច៖ បើ សិរីមន្ត និយាយពិតមែន មិនដឹងសប្បាយចិត្តយ៉ាងម៉េចទេខ្ញុំ!

2016-08-01 20:30:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះមានព័ត៌មានមកថា ខេមរៈ សិរីមន្ត កំពុងរៀបចំឱ្យអ្នកនិពន្ធធ្វើបទចម្រៀងថ្មី ដើម្បីផ្ដល់ឱកាសដល់ ជៀស ស្រួច បានរួមសម្ដែងជាមួយលោកម្ដងទៀតក្នុងពេលឆាប់ៗខាងមុខនេះ។

ប៉ុន្តែពាក់ព័ន្ធទៅនឹងចំណុចនេះ អតីតកីឡាករខាងលើអះអាងថា លោកនៅមិនទាន់បានទទួលដំណឹងជាផ្លូវពីតារាចម្រៀងល្បីឈ្មោះរូបនេះនៅឡើយទេ។ ក្នុងនោះលោក ជៀស ស្រួច និយាយថា ប្រសិនបើព័ត៌មាននេះជាការពិតមែននោះ គឺមានន័យថា ជីវិតលោកមិនឯកាទៀតទេ។

“ប្រសិនបើប្អូន សិរីមន្ត គាត់និយាយមែននោះ ខ្ញុំមិនដឹងជាសប្បាយចិត្តយ៉ាងណាទេ ព្រោះខ្ញុំអាចមានការងារធ្វើឡើងវិញមិនតែលតោលទៀតទេ"។ ជៀស ស្រួច ថ្លែងមកកាន់ Sabay។

ជៀស ស្រួច រំលឹកបន្តថា នៅក្នុងជំនួបទទួលទានអាហារពេលល្ងាចមួយ ដែលរៀបចំឡើងដោយ ខេមរៈ សិរីមន្ត កន្លងមកនេះ រូបលោកបានទទួលការលើកទឹកចិត្តជាច្រើនពីតារាចម្រៀងល្បីឈ្មោះខាងលើ ក្នុងការបញ្ឈប់ភាពអស់សង្ឃឹមតទៅទៀត ព្រោះមានរូបគេនៅជួយជ្រោមជ្រែងជានិច្ច។

“កាលនោះ ក្រៅពីជួយជាលុយកាក់ហើយ ប្អូន សិរីមន្ត គាត់បានលើកទឹកចិត្តខ្ញុំច្រើនណាស់ ហើយថា ឈប់អោយខ្ញុំអស់សង្ឃឹមទៀតទៅ បន្តិចទៀតនឹងល្បីឡើងវិញហើយ"។ លោកបន្តថា សំដីនេះធ្វើឱ្យលោកហាក់មានភាពកក់ក្ដៅឡើងវិញ ហើយប្រសិនមានឱកាសសម្ដែងជាមួយ ខេមរៈ សិរីមន្ត ម្ដងទៀតពិតមែននោះ គឺជារឿងល្អបំផុត។

ទោះបីជាយ៉ាងណា មិនអាចសុំការបញ្ជាក់បន្ថែមពីតារាចម្រៀង ខេមរៈ សិរីមន្ត បានទេដោយសារលេខទូរសព្ទរបស់លោកគ្មានអ្នកទទួល។ ប៉ុន្តែនៅក្នុងជំនួបរវាងអ្នកទាំងពីរកាលពីពេលថ្មីនេះ តារាចម្រៀងប្រចាំផលិតកម្មសាន់ដេខាងលើបានជួយឧបត្ថម្ភថវិកាចំនួន២លានរៀលដល់អតីតកីឡាករ រូបនេះ។

ក្នុងនោះដែរកាលពីចុងសប្ដាហ៍កន្លងទៅនេះ ផលិតកម្មGalaxy ក៏បានផ្ដល់ឱកាសឱ្យ ជៀស ស្រួច ចូលរួមសម្ដែងក្នុង MV បទថ្មីរបស់ពួកគេផងដែរ ខណៈសប្បុរសជនក៏ចូលរួមចំណែកឧបត្ថម្ភដល់រូបលោកជាបន្តបន្ទាប់៕

អត្ថបទ៖ សំ ជំនាញ