រឿងរ៉ាវស្នេហាសិល្បករ ២ គូ ធ្វើឲ្យកក្រើកចុងខែកក្កដាកន្លងទៅ

2016-08-02 16:22:48
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីចុងខែកក្កដាកន្លងទៅនេះ រឿងរ៉ាវស្នេហាតារាប្រុសស្រី ២ គូ បានធ្វើឲ្យកក្រើកសង្គមសិល្បៈខ្មែរ។ តារាទាំង ២ គូនោះ រួមមាន ភិន សុដាលីស ជាមួយ ប៉ែន ចំរ៉ុង ហើយមួយគូទៀតគឺ ជៀស ស្រួច ជាមួយអតីតភរិយាអ្នកនាង សាត រស្មី។

១.កាលពីថ្ងៃ ២៥ កក្កដា កូនស្រីថៅកែផលិតកម្មមហាហង្ស ភិន សុដាលីស បើកបានសន្និសីទកាសែតធំមួយ និងបាននិយាយបើកកកាយពីបញ្ហាដែលធ្វើឲ្យនាងបែកបាក់ជាមួយ ប៉ែន ចំរ៉ុង។ បន្ទាប់ពីវីដេអូអ្នកមេម៉ាយខាងលើត្រូវបានបង្ហោះឡើងមានអ្នកគាំជាច្រើនបានចែករំលែកបន្ត និងបញ្ចេញជាយោបល់ផ្សេងៗគ្នា ហើយភាគច្រើនក៏បានដាក់បន្ទុកទៅភាគីខាងប្រុសដែរ។

រូបថត ភិន សុដាលីស និង ប៉ែន ចំរ៉ុង កាលនៅជុំគ្នា

៣ ថ្ងៃក្រោយមក ប៉ែន ចំរ៉ុង ក៏បានចេញមុខនិយាយ តែមិនបានបកស្រាយអ្វីច្រើននោះទេ ដោយគ្រាន់តែប្រាប់ថា លោកនៅតែចង់ជួប និងផ្គត់ផ្គង់ដល់កូនតែប៉ុណ្ណោះ។ ចំណែកទំនាក់ទំនងស្នេហាលោកនៅពេលនេះ គឺបានដើរមកដល់ផ្លូវបញ្ចប់ហើយ។

២.រីឯរឿងរ៉ាវតារាគូទី ២ នេះក៏ល្បីមិនចាញ់គូមុន ពេលដែលលោក ជៀស ស្រួច អតីតកីឡាករប្រដាល់ល្បី និងជាសិល្បករមួយដួងដែរ កាលពីជាង ១០ ឆ្នាំមុន បានលេចមុខមកសាជាថ្មី។ តួឯកប្រុសក្នុងរឿង "បេះដូងអ្នកប្រដាល់” បានរៀបរាប់ថា ការដើរចេញរហូតថ្នាក់ខ្លួនតែលតោលគ្មានគោលដៅនោះ មានពាក់ព័ន្ធនឹង ភរិយា ដែលកាលណោះ លោកសុំមិនបញ្ចេញឈ្មោះ តែក្រោយមកគេដឹងថា ជាតារាសម្ដែង សាត រស្មី។

រូបថត ជៀស ស្រួច និង កញ្ញា សាត រស្មី

មិនយូរប៉ុន្មាន តាមសារព័ត៌មានក្នុងស្រុកមួយ រស្មី បានទទួលស្គាល់ពីទំនាក់ទំនងនាង និង ជៀស ស្រួច តែនាងបានបញ្ជាក់ថា នាង និងអតីតកីឡាករខាងលើ បានដាច់ស្រេចតាមផ្លូវច្បាប់ហើយ ហើយថា ការបាក់បែកនោះ នាងមិនមែនជាដើមហេតុឡើយ៕

អត្ថបទ៖ទ្រី រ៉ាវី