Volkswagen ពិនិត្យលទ្ធភាពសាងសង់រោងចក្រដំឡើងរថយន្តដំបូងនៅកម្ពុជា

2016-08-08 17:29:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Volkswagen កំពុងស្វែងរកលទ្ធភាពក្នុងការសាងសង់រោងចក្រដំឡើងរថយន្តក្នុងប្រទេសកម្ពុជា គោលដៅបម្រើទីផ្សារក្នុងស្រុកនិងនាំចេញទៅក្រៅប្រទេស។

តាមប្រភពព័ត៌មានផ្ទៃក្នុងដែលមិនត្រូវគេទម្លាយជាសាធារណៈរបស់ក្រុមហ៊ុនហ៊ុង ហ៊ាប ដែលជាក្រុមហ៊ុនទទួលសិទ្ធនាំចូលចែកចាយរថយន្ត Volkswagen ឲ្យដឹងថា ក្រុមការងារបច្ចេកទេសរបស់ក្រុមហ៊ុន Volkswagen មួយក្រុម កាលពីពេលថ្មីៗនេះបានធ្វើដំណើរមកប្រទេសកម្ពុជា ដើម្បីសិក្សាពីស្ថានភាពទីផ្សារប្រើប្រាស់រថយន្ត ក៏ដូចជាការពិនិត្យលទ្ធភាពដើម្បីសាងសង់រោងចក្រដំឡើងរថយន្ត Volkswagen ដំបូងក្នុងប្រទេសកម្ពុជា ដើម្បីលក់លើទីផ្សារក្នុងស្រុកនិងនាំចេញទៅទីផ្សារពិភពលោក។

ប្រភពគួរឲ្យទុកចិត្តនោះបន្តថា ក្រុមហ៊ុនបានមើលឃើញពីសក្ដានុពលដែលប្រទេសកម្ពុជាអាចក្លាយជាមូលដ្ឋានដំបូងដែលក្រុមហ៊ុនផលិតរថយន្តដ៏ល្បីឈ្មោះរបស់អាល្លឺម៉ង់នេះ អាចឈានសាងសង់រោងចក្រដំឡើងរថយន្ត ដោយសារតម្លៃពលកម្មថោក និងណាមួយទីផ្សារប្រើប្រាស់រថយន្តរបស់ប្រទេសនេះក៏មានកំណើនពីមួយឆ្នាំទៅមួយឆ្នាំ។

យ៉ាងណាប្រភពដដែលបានបញ្ជាក់ថា ការចុះសិក្សានេះ ក្រុមហ៊ុនមិនទាន់បានសម្រេចនៅឡើយទេដោយរង់ចាំការវាយតម្លៃជាផ្លូវការ មុនឈានទៅដំណើរការសាងសង់រោងចក្រនៅពេលអនាគត។

វត្តមានរបស់ Volkswagen នឹងជាក្រុមហ៊ុនរថយន្តថ្មីមួយទៀត បន្ទាប់ក្រុមហ៊ុន Hyundai និង Ford ដែលបានសាងសង់រោងចក្រដំឡើងរថយន្តនៅក្នុងប្រទេសកម្ពុជាកាលពីពេលកន្លងទៅ។

ចុចអាន៖ Chevrolet បង្កើតយុទ្ធសាស្ត្រថ្មីពង្រីកទីផ្សារលក់រថយន្ត

អត្ថបទ៖ ប៊ុណ្ណារ៉ា