ធ្វើម៉េចទើបកូនធំឡើងមានកម្ពស់ខ្ពស់សង្ហា និងឆ្អឹងរឹងមាំ?
- 2016-08-12 20:56:40
- ចំនួនមតិ 0 | ចំនួនចែករំលែក 0
ធ្វើម៉េចទើបកូនធំឡើងមានកម្ពស់ខ្ពស់សង្ហា និងឆ្អឹងរឹងមាំ?
ចន្លោះមិនឃើញ
បន្ទាប់ពីការផ្តល់កំណើតដល់បុត្រធីតាដោយសុវត្ថិភាពហើយនោះ ឪពុកម្ដាយគ្រប់រូបតែងតែចង់ឲ្យបុត្រធីតារបស់ខ្លួនពេលធំឡើងមានកម្ពស់ខ្ពស់ស្រស់សង្ហា និងឆ្អឹងរឹងមាំ។ ពេលខ្លះពួកគាត់មិនបានយកចិត្តទុកដាក់អំពីរបបអាហាររបស់កូនៗ ដែលអាចជះឥទ្ធិពលអាក្រក់ដល់ការលូតកម្ពស់ និងឆ្អឹងរបស់កូនតាំងពីវ័យកុមារភាព។
មាតាបិតាគ្រប់រូបគប្បីផ្ដល់អាហារដែលសម្បូរសារធាតុកាល់ស្យូមតាំងពីកូនរបស់ខ្លួននៅក្នុងផ្ទៃមកម្ល៉េះ ហើយវារឹតតែសំខាន់ថែមទៀតនៅពេលកុមារស្ថិតក្នុងវ័យលូតលាស់។ អ្វីដែលរឹតតែគួរឲ្យព្រួយបារម្ភនោះគឺ កុមារខ្លះរើសចំណី និងមិនចូលចិត្តបរិភោគបន្លែបៃតងចាស់ដែលជាប្រភពនៃសារធាតុកាល់ស្យូម។
កាល់ស្យូមជាសារធាតុមួយដែលជីវិតត្រូវការជាចាំបាច់ដែលមិនត្រូវមើលរំលងជាពិសេសសម្រាប់ការលូតលាស់ឆ្អឹង និងកម្ពស់របស់កុមារ។ យោងទៅតាមទិន្នន័យរបស់ការអង្កេតផ្នែកសុខភាព និងប្រជាសាស្ត្រកម្ពុជា(CDHS) ឆ្នាំ២០១៤ របស់ក្រសួងសុខាភិបាល និងក្រសួងផែនការ ថា នៅកម្ពុជា ៣២% នៃកុមារអាយុក្រោម ៥ ឆ្នាំ មានបញ្ហាកម្ពស់មិនស្របនឹងវ័យ (ក្រិន)។ ដើម្បីធានាដល់ការលូតលាស់ជាអតិបរមា និងជៀសផុតពីជំងឺក្រិន មាតាបិតាគួរយកចិត្តទុកដាក់ពីការផ្ដល់សារធាតុកាល់ស្យូមឲ្យបានគ្រប់គ្រាន់ជាពិសេសក្នុងរយៈពេល ១០០០ ថ្ងៃដំបូងនៃជីវិត។ អ្វីខ្លះជាវិធីចិញ្ចឹមកូនឲ្យលូតកម្ពស់បានល្អ?
សំណួរ ១៖ អ្វីទៅជាសារធាតុកាល់ស្យូម? ចម្លើយ៖ កាល់ស្យូម ជាសារធាតុរ៉ែដែលសំខាន់សម្រាប់ការលូតលាស់ឆ្អឹង និងធ្វើឲ្យឆ្អឹងរឹងមាំ។ ជាង ៩៩% នៃកាល់ស្យូមផ្ទុកនៅក្នុងឆ្អឹង និងធ្មេញ ហើយមានតួនាទីផ្សេងទៀតនៅក្នុងរាងកាយ រាប់បញ្ចូលទាំងមុខងារបេះដូង។
សំណួរ ២៖ បើខ្វះសារធាតុកាល់ស្យូម កុមារអាចទទួលរងផលវិបាកអ្វីខ្លះ? ចម្លើយ៖ កុមារដែលមិនទទួលបានសារធាតុកាល់ស្យូមគ្រប់គ្រាន់ អាចប្រឈមមុខខ្លាំងជាមួយបញ្ហានៃការលូតលាស់ឆ្អឹង និងធ្មេញជាពិសេសប្រឈមជាមួយរោគក្រិស និងក្រិន។
សំណួរ ៣៖ អ្វីទៅជារោគក្រិស? តើវាបណ្ដាលមកពីមូលហេតុអ្វី? ចម្លើយ៖ រោគក្រិសស្ដែងឡើងដោយមានភាពមិនប្រក្រតីនៃការរីកលូតលាស់ឆ្អឹង ហើយភាគច្រើនកើតមានចំពោះកុមារ។ វាបណ្ដាលមកពីកង្វះកាល់ស្យូម កង្វះវីតាមីន D កង្វះផូស្វាត និងមិនបានត្រូវពន្លឺថ្ងៃគ្រប់គ្រាន់។
សំណួរ ៤៖ រោគក្រិសមានអាការៈយ៉ាងដូចម្ដេច? ចម្លើយ៖ ជាទូទៅ រោគក្រិសមានអាការៈដូចជា៖ · ឈឺឆ្អឹងដៃ ជើង ត្រគាក និងខ្នង · ភាពក្រិន · បាក់ឆ្អឹង · រមួលក្រពើ · ធ្មេញដុះមិនប្រក្រតី · ទ្រង់ទ្រាយឆ្អឹងខុសប្រក្រតី · ប្រកាច់។
សំណួរ ៥៖ កុមារណាខ្លះប្រឈមនឹងរោគក្រិស? ចម្លើយ៖ · កុមារដែលមានសភាពរាងកាយតិច · កុមារដែលបរិភោគអាហារូបត្ថម្ភមិនគ្រប់គ្រាន់ ដូចជា អាហារពុំសូវមានជាតិកាល់ស្យូម និងវីតាមីន D · ទារក ឬកុមារដែលបៅដោះម្ដាយ ដែលមិនត្រូវពន្លឺថ្ងៃ · ២០% កុមារដែលមានពូជអម្បូរក្រិស ឬក្រិន។
សំណួរ ៦៖ មានវិធីសាស្ត្រអ្វីខ្លះ អាចការពាររោគក្រិស? ចម្លើយ៖ · ទទួលទានអាហារសម្បូរកាល់ស្យូម · ទទួលទានអាហារសម្បូរវីតាមីន D · ទទួលទានអាហារសម្បូរផូស្វាត · ចំណាយពេលខ្លះហាលថ្ងៃ។
សំណួរ ៧៖ អ្វីជាការលូតលាស់មិនប្រក្រតី (ភាពក្រិន)? ចម្លើយ៖ ភាពក្រិន ស្តែងឡើងដោយមានកម្ពស់ទាប បើធៀបជាមួយនឹងអាយុ ដោយសារតែមានការប៉ះពាល់ដល់ការរីកលូតលាស់ ពេលដែលកុមារមិនបានទទួលរបបអាហារ ឬអាហារូបត្ថម្ភគ្រប់គ្រាន់ ជាពិសេសជាតិកាល់ស្យូមក្នុង ១០០០ ថ្ងៃដំបូងនៃជីវិត។
សំណួរ ៨៖ ត្រូវធ្វើដូចម្ដេចដើម្បីសម្គាល់ថាកូនរបស់អ្នកលូតកម្ពស់មិនប្រក្រតី? ចម្លើយ៖ មាតាបិតាអាចតាមដានមើលការលូតលាស់របស់កូនដោយផ្អែកលើប័ណ្ណលឿង (ប័ណ្ណចាក់ថ្នាំបង្ការ) របស់កូនដែលចេញដោយមន្ទីរពេទ្យបាន។ បើកូនៗលូតលាស់មិនតាមស្តង់ដាររបស់ប័ណ្ណលឿង សូមទៅពិគ្រោះជាមួយគ្រូពេទ្យកុមារ។
សំណួរ ៩៖ ឪពុកម្ដាយត្រូវធ្វើដូចម្ដេច ដើម្បីការពារបុត្រធីតាខ្លួនពីការលូតលាស់មិនប្រក្រតី (ក្រិន) នេះ? ចម្លើយ៖ · មាតាត្រូវទទួលទានអាហារូបត្ថម្ភឲ្យបានត្រឹមត្រូវមុនពេល អំឡុងពេល និងក្រោយពេលមានផ្ទៃពោះ · បំបៅដោះកូនឲ្យបានគ្រប់គ្រាន់ · មានអនាម័យល្អក្នុងការរស់នៅ។
សំណួរ ១០៖ អាហារអ្វីខ្លះសម្បូរកាល់ស្យូម? ចម្លើយ៖ អាហារដែលសម្បូរជាតិកាល់ស្យូមមាន៖ ទឹកដោះគោស្រស់/ជូរ តៅហ៊ូ ទឹកសណ្តែក ត្រីសាឌីន និងបន្លែពណ៌បៃតងចាស់ (ស្ពៃតឿ ខាត់ណា និងស្ពៃ Broccoli)-ល-។
សំណួរ ១១៖ ឪពុកម្ដាយគួរធ្វើដូចម្ដេចដើម្បីធានាថាបុត្រធីតារបស់ខ្លួនទទួលបានសារធាតុកាល់ស្យូមគ្រប់គ្រាន់? ចម្លើយ៖ កុមារមួយចំនួនជាប្រភេទក្មេងរើសចំណី រអ៊ូរទាំ និងមិនចូលចិត្តញ៉ាំអាហារប្រភេទសាច់ ឬបន្លែនោះទេ។ ឪពុកម្ដាយដ៏ឆ្លាតវៃប្រាកដជាមានការព្រួយបារម្ភពីការលូតលាស់របស់កូន។ ដូច្នេះ ពួកគាត់អាចជ្រើសរើសយកការផ្ដល់សារធាតុបំប៉នកាល់ស្យូមនានា ដើម្បីបំពេញការខ្វះខាត និងជួយដល់ការលូតលាស់ជាអតិបរមារបស់កូនៗពួកគាត់។
សំណួរ ១២៖ សារធាតុកាល់ស្យូមជួយអ្វីខ្លះដល់ការលូតលាស់របស់កុមារមុនចូលសាលារៀន? ចម្លើយ៖ ក្នុងវ័យនេះកុមារត្រូវការអាហារបំប៉ន ក៏ដូចជាអាហារូបត្ថម្ភជាច្រើន ដើម្បីទ្រទ្រង់ដល់ការលូតលាស់ទាំងផ្នែករាងកាយ ស្មារតី និងសតិបញ្ញា។ បើកូនលោកអ្នកខ្វះជាតិកាល់ស្យូមរ៉ាំរ៉ៃ វានឹងធ្វើឲ្យសារធាតុរ៉ែរបស់ឆ្អឹងមិនប្រក្រតី ភាពរឹងមាំរបស់ឆ្អឹងថយចុះ ឬបាត់បង់អាចបណ្ដាលឲ្យមានភាពក្រិន និងរោគក្រិស។ ជាការពិត អ្នកម្ដាយគ្រប់រូបពិតជាមិនចង់ឲ្យកូនរបស់ខ្លួនលូតលាស់មិនប្រក្រតី និងមានភាពក្រិននោះទេ ដូច្នេះអ្នកម្ដាយគួរផ្ដល់អាហារូបត្ថម្ភទាំងឡាយណាដែលសម្បូរជាតិកាល់ស្យូមដល់កូន។
សំណួរ ១៣៖ កុមារត្រូវការកាល់ស្យូមប្រចាំថ្ងៃប៉ុន្មាន ដើម្បីធានាដល់ការលូតលាស់ល្អប្រសើរ? ចម្លើយ៖ យោងតាម National Academy Pressឆ្នាំ២០១០ បានណែនាំថា៖ · កុមារចាប់ពី ១-៣ ឆ្នាំ ត្រូវការកាល់ស្យូមចំនួន ៧០០ មិល្លីក្រាមជាប្រចាំថ្ងៃ · កុមារចាប់ពី ៤-៨ ឆ្នាំ ត្រូវការកាល់ស្យូមចំនួន ១០០០ មិល្លីក្រាមជាប្រចាំថ្ងៃ · កុមារចាប់ពី ៩-១៨ ឆ្នាំ ត្រូវការកាល់ស្យូមចំនួន ១៣០០ មិល្លីក្រាមជាប្រចាំថ្ងៃ។
សំណួរ ១៤៖ មាតាបិតាប្រាកដទេថា កូនរបស់អ្នកញ៉ាំកាល់ស្យូមគ្រប់គ្រាន់តាមតម្រូវការប្រចាំថ្ងៃ?
ចម្លើយ៖ បើមិនប្រាកដទេ មាតាបិតាគួរកុំចាំដល់កូនរបស់អ្នកមានបញ្ហាទាក់ទងនឹងការលូតលាស់ ដូចជា កម្ពស់ទាបជាងអាយុ ការលូតលាស់មិនប្រក្រតីដែលបង្កទៅជារោគក្រិស និងក្រិន ជាដើម។ អ្នកគួរចាប់ផ្ដើមផ្ដល់សារធាតុបំប៉នកាល់ស្យូមឲ្យបានគ្រប់គ្រាន់ទៅតាមតម្រូវការប្រចាំថ្ងៃ។ ដូច្នេះ អ្នកនឹងរីករាយពេលឃើញកូនៗធំលូតលាស់មានកម្ពស់ខ្ពស់ស្រស់សង្ហានាថ្ងៃខាងមុខ៕
អត្ថបទ៖ ពាណិជ្ជកម្ម
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
