ឈីន រតនៈ ហូរទឹកភ្នែកទាំងមិនដឹងខ្លួន បានច្រៀងបទខ្លួនឯង

2016-08-22 20:40:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈីន រតនៈ ប្រាប់ថា ពេញមួយយប់នាងគេងមើលតែវីដេអូ Trailer បទទើបចេញថ្មី "អ្នកមិនអន់ទេ" រំភើបលាយឡំទឹកភ្នែក ដោយមិននឹកស្មានថា រូបនាងអាចមានបទចម្រៀងច្រៀង រួមទាំងមានរូបខ្លួនឯងក្នុងវីដេអូបែបហ្នឹងទេ។

“យប់មិញ ដល់ឥលូវនៅតែគេងញញឹម ហើយពេលខ្លះហូរទឺកភ្នែកទាំងមិនដឹងខ្លួន ព្រោះសប្បាយចិត្តពេក មិននឹកស្មានថា ខ្លួនឯងមានបទចម្រៀង និងឃើញរូបខ្លួនឯង នៅក្នុងបទចម្រៀងចឹងទេ។ ម្យ៉ាងទៀតឃើញមានការគាំទ្រច្រើនពីបងប្អូន គាត់បានឆាតមក សរសើរ និងលើកទឹកចិត្តសឹងតែគ្រប់ៗគ្នាបង។ ខ្ញុំខ្លួនឯងស្ដាប់សារចុះឡើងមិនដឹងជាប៉ុន្មានដងទេបង អត់ធុញសោះ (សើច)"។

ជាមួយគ្នានេះ អតីតបេក្ខភាព Top4 ក្នុងកម្មវិធី The Voice Cambodia បន្តឲ្យដឹងទៀតថា ក្តីស្រមៃលើវិថីសិល្បៈមួយរបស់ក្មេងស្រីម្នាក់កាលនៅរៀនវិទ្យាល័យ រហូតបានចេញធ្វើការច្រៀងនៅតាមភោជនីយដ្ឋាន រតនៈ ថាការខំប្រឹងប្រែងទាំងអស់នេះបានជំរុញទឹកចិត្តនាងសព្វបែបយ៉ាងរហូតបានដាក់ពាក្យប្រឡងក្នុងកម្មវិធី The Voice Camboida ដើម្បីឈានទៅដល់ការសម្រេចក្តីស្រមៃក្លាយជាតារាចម្រៀង។

ស្តាប់ការបកស្រាយពី ឈីន រតនៈ ក្នុងវីដេអូខាងក្រោម៖

ឈីន រតនៈ បន្ថែម៖ "ដំបូងឡើយ គ្រាន់តែខាងបងផលិតកម្មប្រាប់ថា ខ្ញុំមានបទចម្រៀងមួយច្រៀងខ្លួនឯង បងអើយខ្ញុំសប្បាយចង់ហោះហើយ។ ពេលថតបទនេះ ទោះពេលខ្លះមានអារម្មណ៍ថាហត់បន្តិចមែន ប៉ុន្តែខ្ញុំសប្បាយចិត្ត ណាមួយខ្ញុំមិនចង់ឲ្យមានខុសច្រើន ព្រោះបងៗអ្នកដឹកនាំ ពួកគាត់ហត់ជាងខ្ញុំទៀត"។

តារាស្រីមកពីខេត្តត្បូងឃ្មុំរូបនេះ បន្តទៀតថា អះអាងថា គ្រប់យ៉ាងដែលនាងបានមកដល់ថ្ងៃនេះ ក៏ដោយសារ The Voice Cambodia និងជាពិសេស អរគុណទៅដល់គ្រូបង្វឹកនាងលោក ណុប បាយ៉ារិទ្ធ រួមទាំងបណ្តាអ្នកគាំទ្រនាងផង៕

អត្ថបទ៖ ថា ម៉ាលីដា