២ សំណួររបស់ Fans ធ្វើឲ្យ Nick ស្ទើរស្រឡាំងកាំងយប់មិញ!

2014-11-01 18:18:57
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាល្បីថៃ Nick ស្ទើរស្រឡាំងកាំង ខណៈអ្នកគាំទ្រស្រីម្នាក់បានសាកសួរ ២ សំណួរជាភាសាអង់គ្លេសទៅកាន់រូបគេ ដែលមានជាភាសាខ្មែរថា តើយល់យ៉ាងណា រវាងប្រទេសកម្ពុជា និង ប្រទេសថៃ? ហើយតើស្រលាញ់ទីកន្លែងណាជាងគេ នៅប្រទេសកម្ពុជា?

ទោះបីជាយ៉ាងណា នៅក្នុងកម្មវិធីជួបជុំជាមួយ Fans រៀបចំឡើងដោយរោងភាពយន្ត Major Cineplex by Cellcard តារាថៃរូបនេះមិនបានឆ្លើយតបនោះទេ ព្រោះភាសាអង់គ្លេសមានកម្រិត និង មិនសូវយល់ច្បាស់ពីកម្ពុជា ដោយមានសមាជិករួមក្រុមម្នាក់ ដែលអាចនិយាយបានចេញមុខឆ្លើយជំនួសទៅវិញ។ តំណាងរូបនោះបានឆ្លើយតបចំពោះសំណួរបន្ទាប់ថា៖ "ពូកគេស្រលាញ់គ្រប់ទីកន្លែងទាំងអស់ក្នុងប្រទេសកម្ពុជា"។

ពេលវេលានៃការសាកសួររបស់អ្នកគាំទ្រមានកំណត់ ប៉ុន្តែ ភាគច្រើនបាញ់ឆ្ពោះទៅរកតារាល្បីរបស់ថៃ Nick ខណៈអ្នកសម្របសម្រួលកម្មវិធីបានតម្រូវឲ្យសួរសំណួររាក់ៗហើយ ព្រោះតារាទាំងអស់មិនមែនជាអ្នកជំនាញ។ យុវតីម្នាក់បាននិយាយភាសាថៃយ៉ាងល្អ ហើយថែមទាំងសម្ដែងការលើកទឹកចិត្តសម្រាប់វត្តមានរបស់ពូកគេ និងស្វាគមន៍សម្រាប់ដំណើរនេះ។ "ខ្ញុំស្រលាញ់តារាថៃទាំងអស់ និងសូមឲ្យជោគជ័យសម្រាប់ដំណើរលើកនេះ"។

ទន្ទឹមនឹងនេះ អ្នកគាំទ្រជាច្រើនផ្សេងទៀតបានស្រែកគាំទ្រយ៉ាងពេញទំហឹងចំពោះវត្តមានតារាថៃ មកកាន់ប្រទេសកម្ពុជា។ យុវជន វណ្ណា បាននិយាយថា "ខ្ញុំគាំទ្រគាត់ ព្រោះពួកគាត់មានសមត្ថភាពក្នុងការសម្ដែង ហើយសាច់រឿងនិមួយៗ គាត់សម្ដែងបានល្អ ខ្ញុំនិយាយឲ្យត្រង់គាត់សម្រស់ក៏ស្អាត សម្ដែងក៏អស់ទាស់ ខ្ញុំពេញចិត្ត"។

តារាថៃទាំងអស់ហាក់សម្ដែងនូវមោទនភាពសម្រាប់ដំណើរមកកាន់កម្ពុជា លើកទី ២ របស់ពូកគេ តបតាមការអញ្ជើញរបស់ Westec Media ក្នុងគោលបំណងផ្សព្វផ្សាយភាពយន្តថ្មីរឿង"ក្មេងស្ទាវអ្នកលេងខោខ្លី" ឬ "Dangerous Boys” ដែលនឹងចែកចាយចាក់បញ្ចាំងគ្រប់រោងភាពយន្តទំនើបទាំងអស់នៅភ្នំពេញ។

នៅរោងភាពយន្តMajor Cineplex by Cellcard កាលពីយប់មិញនេះ គឺជាការកម្មវិធីសម្ពោធជាផ្លូវការ និង ត្រៀមចាក់បញ្ចាំងតាមការកំណត់ នូវភាពយន្តបែបកំប្លែង និង លាយឡំដោយការអប់រំស៊ីជម្រៅចំពោះយុវវ័យ ឲ្យមានគុណធម៌ ចេះកែប្រែខ្លួន និងស្រលាញ់ឪពុកម្ដាយមួយនេះ។ ក្រៅពីនេះ គឺជាការជួបជុំរវាងតារាថៃទាំង១២នាក់ និងអ្នកគាំទ្រដែលខំស្កាត់ទៅរង់ចាំតាំងពីរសៀល និងថតរូបជុំគ្នាទៀតផង៕