អ្នកទស្សនាថាបានមកទស្សនាពិព័រណ៍រថយន្តភ្នំពេញទើបដឹងរថយន្តប្លែកៗឥតខ្វះមានលក់ពេញស្រុកខ្មែរ
- 2014-11-02 01:19:09
- ចំនួនមតិ 0 | ចំនួនចែករំលែក 0
អ្នកទស្សនាថាបានមកទស្សនាពិព័រណ៍រថយន្តភ្នំពេញទើបដឹងរថយន្តប្លែកៗឥតខ្វះមានលក់ពេញស្រុកខ្មែរ
ចន្លោះមិនឃើញ
ព្រឹត្តិការណ៍ពិព័រណ៍រថយន្តអន្តជាតិនៅមជ្ឈមណ្ឌលពាណិជ្ជកម្មកោះពេជ្រនៅថ្ងៃទី ៣ មានមនុស្សកាន់តែច្រើនមកទស្សនា ដែលធ្វើឲ្យសាលពិព័រណ៍មានភាពអ៊ូអរ។ អ្វីធ្វើឲ្យពួកគេភ្ញាក់ផ្អើលនោះ គឺពួកគេមិនដឹងថាមានម៉ាករថយន្តប្លែកៗជាច្រើនកំពុងលក់ពាសពេញស្រុកខ្មែរ បើមិនបានចូលទស្សនាពិព័រណ៍ដ៏អស្ចារ្យនេះ។
យុវតី ឆាយ ចាន់សុភីវត្តី ជាបុគ្គលិកក្រុមហ៊ុនឯកជនមួយបានប្រាប់ Sabay ថា នេះជាលើកដំបូងហើយដែលកញ្ញាបានចូលរួមពិព័រណ៍រថយន្តដ៏ធំបែបនេះ។ កញ្ញាមានការចាប់អារម្មណ៍ជាខ្លាំងទៅលើរថយន្តថ្មីៗជាច្រើនដែលបានដាក់តាំងបង្ហាញ ដែលមួយចំនួនកញ្ញាមិនដែលបានស្គាល់ពីមុនទាល់តែសោះ។
បើទោះបីនៅមិនទាន់មានលទ្ធភាពទិញប្រើប្រាស់ក៏ដោយ កញ្ញាឲ្យដឹងថា ការចូលរួមពិព័រណ៍នេះធ្វើឲ្យកញ្ញាអាចស្គាល់ពីម៉ាករថយន្តនានាដែលកំពុងចរាចរលក់នៅក្នុងទីផ្សារប្រទេសកម្ពុជា ជាពិសេសក៏ទទួលបានព័ត៌មានច្បាស់លាស់សម្រាប់ការជ្រើសរើសរថយន្តដែលសមស្របតាមតម្រូវការប្រើប្រាស់ ដោយមិនប្រថុយប្រថានទិញរថយន្តដែលគ្មានប្រភពច្បាស់លាស់ នាំឲ្យខាតពេលវេលា លុយកាក់និងខ្វះទំនុកចិត្ត។
ចំណែកលោក គីម ថេង បុគ្គលិកទីផ្សារក្រុមហ៊ុនឯកជនមួយរូបទៀតឲ្យដឹងដែរថា ទើបតែថ្ងៃនេះទេ ដែលលោកទំនេរដៃពីការងារមកចូលរួមទស្សនាពិព័រណ៍រថយន្តនេះ។
យុវជនវ័យ ២៤ ឆ្នាំមានការពេញចិត្តជាខ្លាំង ក្នុងការបានមកទស្សនារថយន្តនានាដែលបានដាក់តាំងបង្ហាញ។ "រថយន្តខ្លះខ្ញុំមិនបានដឹងថាមានលក់នៅទីផ្សារប្រទេសកម្ពុជាផង។ ការចូលរួមពិព័រណ៍នេះ ជាឱកាសដ៏ល្អដែលខ្ញុំបានស្គាល់ម៉ាករថយន្តប្លែកៗ ថ្មីៗ ដែលកំពុងមានលក់នៅទីផ្សារប្រទេសកម្ពុជា"។
បែរមកលោក ប៊ុន រ៉ាត់ វេជ្ជបណ្ឌិតមួយរួបក៏មានការចាប់អារម្មណ៍រថយន្តប្លែកៗដែលតាំងបង្ហាញនៅក្នុងពិព័រណ៍រថយន្តភ្នំពេញនេះដែរ។
លោកបង្ហាញការចាប់អារម្មណ៍ថា៖ "ពិតជាអស្ចារ្យខ្លាំងណាស់ ដែលខ្ញុំបានឃើញម៉ាករថយន្តប្លែកៗក្នុងពិព័រណ៍រថយន្តភ្នំពេញ"។ លោកចង់ឲ្យឆ្នាំក្រោយៗឲ្យមានការរៀបចំពិព័រណ៍បែបនេះទៀត ជាពិសេសឲ្យមានក្រុមហ៊ុនកាន់តែច្រើនថែមទៀតចូលរួម។
ពិព័រណ៍រថយន្ត Phnom Penh International Auto Show 2014 បានបើកដំណើរការចំនួន ៣ ថ្ងៃហើយ។ ថ្ងៃស្អែកនេះជាថ្ងៃបញ្ចប់ សម្រាប់ប្រិយមិត្តមិនទាន់បានមកទស្សនា អាចមកចូលរួមបានដើម្បីទស្សនារថយន្តម៉ូដប្លែកៗ ជាពិសេសឱកាសថតរូបជាមួយរថយន្តដែលប្រិយមិត្តពេញចិត្ត រួមទាំងតារាម៉ូដែលដ៏ស្រស់ស្អាតដែលឈរចាំញញឹមទទួលស្វាគមន៍យ៉ាងរីករាយ។
អត្ថបទ៖ ឆានី
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
