នាយកវិទ្យាល័យបាក់ទូកបកស្រាយមូលហេតុលំហាត់អនុគមន៍ក្រសួងដាក់មកលំបាក

2016-08-31 23:10:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយប្រលងបាក់ឌុបរួច សិស្សភាគច្រើនបានរអ៊ូថាលំហាត់អនុគមន៍លើវិញ្ញាសាគណិតវិទ្យា លំបាកខ្លាំងហួសពីសមត្ថភាពរបស់ពួកគេ។

លំហាត់ដែលមានពិន្ទុដល់ទៅ៣៥នេះ បានធ្វើឲ្យសិស្សជាច្រើនពិបាកចិត្ត ហើយខ្លះថែមទាំងសុំឲ្យក្រសួងពិចារណាឡើងវិញលើការដាក់លំហាត់នេះទៀតផង។

ពាក់ព័ន្ធនឹងចម្រូងចម្រាស់នេះ លោក តូច កន្តាល់ នាយកវិទ្យាល័យបាក់ទូកដែលទទួលបន្ទុកកំណែលើវិញ្ញាសាគណិតវិទ្យា បានប្រាប់ថា វិញ្ញាសានេះគេដាក់តាមកម្រិតលំហាត់ មានស្រួលលាយលំបាក គឺដំបូងស្រួល បន្តបន្ទាប់មកគឺលំបាក។

ចំណែកអនុគមន៍ដែលជាលំហាត់ចុងក្រោយ លោកគ្រូទទួលស្គាល់ថា សិស្សមធ្យមនិងបង្គួរធ្វើមិនបាននោះទេ ទាល់តែសិស្សនោះស្រាវជ្រាវខ្លាំងទើបអាចធ្វើបាន។ "គេឲ្យលទ្ធភាពទៅលើសិស្សពូកែ ចឹងលំហាត់ហ្នឹងគេធ្វើឲ្យសិស្សស្រាវជ្រាវ មិនមែនរៀនតាមតែសៀវភៅពុម្ពអាចបានពិន្ទុពេញ១២៥ នោះទេ"។ លោក អះអាងដូច្នេះ។

លំហាត់នោះ គឺគេចង់ឲ្យសិស្សមានការស្រាវជ្រាវច្រើន ដោយមិនរៀនតែតាមសៀវភៅមួយមុខ ពោលគឺអាចទៅប្រលងសមត្ថភាពជាមួយប្រទេសជិតខាងបាន។

សូមស្តាប់សម្លេងលោកនាយក៖

[audio m4a="http://media.sabay.com/uploads/2016/08/New-Recording-358-Copy.m4a"][/audio]

សម្រាប់យុវសិស្ស ស្រេង ស៊ុនឡុង សិស្សនៅវិទ្យាល័យបាក់ឌុបប្រាប់ថា "សម្រាប់ខ្ញុំគិតថា លំបាកល្មមទេបង អត់ខ្លាំងទេ។ តែសិស្សភាគច្រើនរួមទាំងខ្ញុំធ្វើអត់ចេញគឺដោយសារពាក្យពេចន៍ក្នុងការសួរមើលទៅមិនសូវយល់ អាចច្រឡំជាដើម។ ណាមួយលំហាត់ហ្នឹងអត់ដែលឃើញ ព្រោះវារៀងច្រើនគន្លាក់ជាដើម"។ ស៊ុនឡុងថា អនុគមន៍នោះគេធ្វើបានតែ២០% ប៉ុណ្ណោះ។

យ៉ាងណាលោកគ្រូបានបញ្ជាក់ថា តាមរយៈកំណែប៉ុន្មានថ្ងៃនេះឃើញថា សិស្សធ្វើគណិតត្រូវបានច្រើនបើធៀបនឹងឆ្នាំមុន។ មុខវិជ្ជានេះអ្នកបានពិន្ទុ សូន្យក៏អត់ ពិន្ទុពេញ១២៥ ក៏អត់ផងដែរ។