ទូរសព្ទដំឡើង Android 7.0 ដំបូងគេ ទើបប្រកាសអម្បាញ់មិញ

2016-09-07 15:59:56
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅទីបំផុត LG V20 ទូរសព្ទដំបូងគេដែលមានដំឡើងមកស្រាប់នូវប្រព័ន្ធប្រតិបត្តិការ Android 7.0 Nougat បានបង្ហាញវត្តមានជាផ្លូវការកាលពីប៉ុន្មានម៉ោងមុននេះ។

រូបរាងរបស់ LG V20 ហាក់មិនខុសប្លែកគ្នាពី LG G5 ប៉ុន្មានឡើយ ប៉ុន្តែទូរសព្ទជំនាន់ថ្មីនេះមិនអាចដោះដូរផ្នែកនីមួយៗដូចជា G5 ឡើយ។ យ៉ាងណាក្ដីសម្បកខាងក្រោយអាចបើកបាន ដែលអាចឲ្យអ្នកប្រើប្រាស់ដោះដូរថ្មបាន។

V20 ក្រាលដោយបន្ទះអេក្រង់កម្រិត Quad HD ដែលមានទំហំ ៥,៧ អ៊ីញ។ ពិនិត្យមើលនៅផ្នែកខាងលើនៃអេក្រង់គេឃើញអេក្រង់ទីពីរសម្រាប់បង្ហាញ Notificationដែលមានលក្ខណៈដូចគ្នានឹង LG V10។ នៅពីក្នុងទូរសព្ទនេះមានប្រើប្រាស់បន្ទះ Chip Snapdragon 820 ហើយមាន RAM ទំហំ 4GB រួមជាមួយអង្គផ្ទុកទិន្នន័យទំហំ ៦៤ GB។ លក្ខណៈពិសេសរបស់ V20 គឺមានរន្ធសម្រាប់ដោតកាតដើម្បីបន្ថែមទំហំអង្គផ្ទុកទិន្នន័យ។

ការបំពាក់កាមេរ៉ាដូចគ្នានឹង LG G5 ដែលជាប្រព័ន្ធកាមេរ៉ាភ្លោះ ដោយមានកាមេរ៉ាមួយកម្រិត ១៦ MP មានបច្ចេកវិទ្យារក្សាលំនឹងរូបភាព អមដោយកាមេរ៉ាទីពីរប្រភេទ Wide-Angle កម្រិត ៨ MP អាចថតរូបភាពកម្រិត ១៣៥ ដឺក្រេ។ កាមេរ៉ាសម្រាប់ថត Selfie មានកម្រិត ៥ MP ដែលអាចថតជាប្រភេទធម្មតា និង Wide-Angle។

LG V20 មានថាមពលថ្មទំហំ ៣ ២០០ mAh អាចសាកបញ្ចូលឆាប់ពេញជាមួយនឹងបច្ចេកវិទ្យា QuickCharge 3.0។ ចំណុចពិសេសជាងគេរបស់ស្មាតហ្វូនម៉ូដែលនេះ គឺមានដំឡើងមកស្រាប់នូវប្រតិបត្តិការ Android 7.0 Nougat ដំបូងគេ ដែលប្រតិបត្តិការជំនាន់នេះមានបន្ថែមចំណុចថ្មីៗជាច្រើន។