ស្រីស្អាត អ៊ុន ម៉ាលីស មានផែនការថតបទ "មហោរី" តម្កល់លើ Youtube
- 2016-09-10 18:23:20
- ចំនួនមតិ 0 | ចំនួនចែករំលែក 0
ស្រីស្អាត អ៊ុន ម៉ាលីស មានផែនការថតបទ "មហោរី" តម្កល់លើ Youtube
ចន្លោះមិនឃើញ
តារាចម្រៀងស្រីស្អាតមកពីខេត្តស្វាយរៀង ដែលទទួលបានការចាប់អារម្មណ៍ខ្លាំងដោយសារនិយមច្រៀងបទពីដើមៗបង្ហោះលើបណ្ដាញសង្គមនោះ ថ្មីៗនេះ បានបង្ហាញមហិច្ឆតាថ្មីមួយទៀត ដោយនាងត្រៀមប្រមូលបទ "មហោរី" មួយចំនួន ថត ហើយបង្ហោះចូលប្រព័ន្ធ Youtube។
ផែនការនេះ សាមីខ្លួនអះអាងថា ធ្វើតាមនិស្ស័យរបស់ខ្លួនដែលស្រឡាញ់សិល្បៈនេះ ដើម្បីតម្កល់ទុក នៅទីកន្លែងមួយដែលគ្រប់គ្នាអាចរកបាន សម្រាប់ការសិក្សា និងស្រាវជ្រាវនាពេលខាងមុខ ព្រោះថា តាមធម្មតា មានការពិបាកណាស់ ក្នុងការស្វែងរកសិល្បៈចម្រៀងប្រភេទនេះនៅលើបណ្ដាញសង្គមទំនើបដូចជា Facebook និង Youtube ជាដើម។
ដូច្នេះហើយ ផ្សំនឹងនាងមាននិស្ស័យស្រឡាញ់ចូលចិត្តវិស័យសិល្បៈមួយនេះផង ស្រពពេលមានមិត្តភក្ដិជាច្រើនសំណូមពរផង នាងសម្រេចចិត្តថា នឹងធ្វើកិច្ចការនេះតែម្ដង ទុកជាការចូលរួមអភិរក្សសិល្បៈមហោរីយើង។
តាមគម្រោង យុវតីវ័យ ២៣ឆ្នាំរូបនេះ នឹងថតបទចម្រៀង មហោរី ចំនួន១២ ដែលបានមកពីការសិក្សាជាមួយលោកគ្រូ អ្នកគ្រូរបស់នាង។ យ៉ាងណា នាងមិនទាន់ច្បាស់ថា នឹងបញ្ចប់នៅពេលណានៅឡើយទេ។ "យើងមានគម្រោង តែមិនទាន់ច្បាស់ថាចប់ពេលណា ដោយត្រូវចាំបង យឹង យន ត្រឡប់មកពីអាមេរិកវិញសិន តែបើតាមអាច គឺក្នុង១១"។
ក្រៅពីគម្រោងប្រមូលបទមហោរីថតហើយតម្កល់ទុកលើប្រព័ន្ធទំនើប ម៉ាលីស នៅបានបង្ហើបថា នាងក៏គ្រោងផលិត Original Song ថ្មីៗខ្លះៗដែរ ប៉ុន្តែមិនទាន់អាចបញ្ជាក់ថា គម្រោងនេះសម្រេចបាននៅពេលណានៅឡើយទេ។
អ៊ុន ម៉ាលីស ទើបបានបញ្ចប់ការសិក្សាឆ្នាំនេះលើឯកទេសចម្រៀងមហោរីពីសាកលភូមិន្ទវិចិត្រសិល្បៈ ដែលចំណុចនេះ នាងប្រាប់ថា ដើម្បីចូលរួមថែរក្សាសិល្បៈកេរតំណែលដូនតាមួយផ្នែក។ ដោយឡែកផែនការថ្មីរបស់នាងនេះ ក៏ដើម្បីចូលរួមអភិរក្សសិល្បៈមហោរីមួយនេះដែរ បន្ថែមជាមួយគោលបំណងមួយទៀត ធ្វើឲ្យសិល្បៈខ្មែរយើងកាន់តែសម្បូរបែប ហើយអាចងាកចេញពីការប្រើប្រាស់របស់គេបាន៕
អត្ថបទ៖ ទារិកា