ស្រាយចម្ងល់សិស្សម្នាក់បានលំដាប់ពិន្ទុ 00.000 ទាំងគីមីវិទ្យាបាននិទ្ទេស A

2016-09-12 22:39:52
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវសិស្សម្នាក់មានឈ្មោះ វ៉ាត់ ជិញយូ មកពីវិទ្យាល័យសុខអានថ្នល់បំបែកក្នុងខេត្តតាកែវ បានទទួលលំដាប់ពិន្ទុ 00.000 ពីការប្រឡងបាក់ឌុបដែលទើបបញ្ចប់ថ្មីៗនេះ ជាលំដាប់ពិន្ទុមួយគួរឲ្យភ្ញាក់ផ្អើលយ៉ាងខ្លាំង ខណៈមុខវិជ្ជាគីមីវិទ្យាបានដល់ទៅនិទ្ទេស A។

លំដាប់ពិន្ទុនេះបានធ្វើឲ្យសិស្សជាច្រើនមានការងឿងឆ្ងល់យ៉ាងខ្លាំង និងខ្លះទៀតគិតថាក្រសួងប្រហែលមានការភ័ន្តច្រឡំ ធ្វើឲ្យអ្នកប្រើប្រាស់បណ្ដាញសង្គមបានចែករំលែកលំដាប់ពិន្ទុនេះតៗគ្នាពាសពេញអ៊ីនធឺណេត។

ដើម្បីបំបាត់នូវមន្ទិលនេះ រដ្ឋមន្ត្រីក្រសួងអប់រំយុវជននិងកីឡា លោក ហង់ ជួនណារ៉ុន បានចូលមកបកស្រាយថា ដោយសារបេក្ខជនរូបនេះបានយកទូរសព្ទចូលអំឡុងពេលប្រឡង។ ដូច្នេះបេក្ខជនរូបនេះមិនអាចជាប់បានឡើយ បើទោះបីមុខវិជ្ជាមួយចំនួនទទួលបាននិទ្ទេសល្អក៏ដោយ។

ក្រសួងអប់រំបានចេញបទបញ្ញត្តិតាំងពីមុនប្រលងថា ចំពោះសិស្សណាយកទូរសព្ទ ម៉ាស៊ីនគិតលេខ សំណៅឯកសារ ឬចម្លងគេនិងឲ្យគេចម្លងក្នុងពេលប្រលង នោះនឹងត្រូវធ្លាក់ជាស្វ័យប្រវត្តិ។

កាលប្រឡងបាក់ឌុបថ្ងៃទី១ បេក្ខជនមួយរូបនៅបន្ទប់លេខ២ តុលេខ២៧៦ ក្នុងមណ្ឌលវិទ្យាល័យស្ទឹងសែន ខេត្តកំពង់ធំ ក៏ត្រូវបានក្រុមការងារក្រសួងអប់រំធ្វើកំណត់ហេតុពិសេស ធ្លាក់ដោយស្វ័យប្រវត្តិ និងមិនអនុញ្ញាតឲ្យប្រឡងបន្តនៅថ្ងៃបន្ទាប់ឡើយ បន្ទាប់ពីល្មើសបទបញ្ញត្តិនាំយកទូរសព្ទ iPhone 5 មួយគ្រឿងចូលក្នុងមណ្ឌលប្រលង។

ចុចអាន៖ ស្វែងយល់ពីលំដាប់ពិន្ទុបាក់ឌុប ដែលនៅតែភ័ន្តច្រឡំពេញបណ្ដាញសង្គម

អត្ថបទ៖ លឹម សុនា