ប្រាក់ សុផាន់ណា មានស្នាដៃបទនិពន្ធថ្មី ជាង៣០បទទៀតមិនទាន់បញ្ចេញ

2016-10-26 17:58:42
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងជនពិកា ប្រាក់ សុផាន់ណា បានប្រាប់sabay ថា លោកមានបទស្នាដៃនិពន្ធថ្មីជាង៣០បទ គ្រោងនឹងបញ្ចេញនាពេលខាងមុខនេះ។

Original Songsទាំងនោះលោកបានសរសេរ និងហាត់ច្រៀងរួចខ្លះៗហើយ គ្រាន់តែមិនទាន់ចេញតែប៉ុណ្ណោះ៖ "ខ្ញុំនឹងបញ្ចេញម្ដងមួយៗ បទទាំងអស់ហ្នឹងសរសេរអស់ហើយ តែអត់ទាន់អាចចាំអស់ទេ តែវាជាOriginal Songs ទាំងអស់ "ប្រាក់ សុផាន់ណា លើកឡើង។

ម្ចាស់បទ “បរាជ័យជាមេរៀន” បានបន្តឲ្យដឹងថា បទចម្រៀងដែលលោកគ្រោងនឹងបញ្ចេញនោះ មិនចេញលើផលិតកម្មណាមួយទេ គឺចេញលើបណ្ដាញសង្គមតែប៉ុណ្ណោះ ត្បិតអីលោកមិនទាន់មានផលិតកម្មជ្រកនៅឡើយ។

ដើមហេតុដែលនាំឲ្យ ប្រាក់ សុផាន់ណា អាចក្លាយជាតារាចម្រៀង និងនិពន្ធបទភ្លេងក៏ដូចជាទំនុកច្រៀងដោយខ្លួនឯង ហើយទទួលបានការចាប់អារម្មណ៍ជាបន្តបន្ទាប់បែបនេះ ត្រូវបានតារាចម្រៀងរូបនេះប្រាប់ថា ក៏ព្រោះតែលោកបានយក សិល្បៈមកធ្វើជាមិត្តជាប់នឹងខ្លួនជានិច្ច បូកផ្សំការព្យាយាម ។

"ពេលអផ្សុក ខ្ញុំយកហ្គីតាមកកេះលេងដដែលៗ វាជាមិត្តរបស់ខ្ញុំ ហើយពេលខ្លះក៏អាចបង្កើតបទចម្រៀងថ្មីបាន តែអត់ដឹងថា វាហ្នឹងទទួលការគាំទ្រកម្រិតណាឡើយ"។ សុផាន់ណា រៀបរាប់ឲ្យដឹង។

អ្នកនិពន្ធខាងលើប្រាប់ថា កន្លងមកធ្លាប់មានបទចម្រៀង៤ទៅ៥បទមកហើយ ដែលសុទ្ធសឹងជាបទស្នាដៃនិពន្ធថ្មី ហើយទទួលបានគាំទ្រជាបន្តបន្ទាប់។ បទចម្រៀងទាំងនោះមានដូចជា បទ "បរាជ័យជាមេរៀន" បទ "យប់ស្ងាត់នឹកសង្សារ" បទ "ពីជនពិការតស៊ូម្នាក់" បទ "ទឹកចិត្តជនពិការ" និងបទ "បុប្ផាក្នុងចិត្ត" ជាដើម៕

អត្ថបទ៖ ខុត សីហា

រូបភាព៖ ផ្តល់ឲ្យដោយ សុផាន់ណា