វិធីសាស្ត្រធ្វើឯកឲ្យមានសំឡេងពីរោះ

2016-11-07 21:30:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកគឺជាឧបករណ៍មួយសម្រាប់ដាក់ភ្ជាប់លើក្បាលរបស់ខ្លែងឯក ហើយពេលដែលខ្លែងកំពុងហើរ វានឹងបញ្ចេញសំឡេងយ៉ាងពីរោះរណ្ដំនៅលើអាកាសដោយសារការបោកប៉ះនឹងកម្លាំងខ្យល់។ ឯកគឺជាបេះដូងនៃខ្លែងឯកទាំងមូល ហើយក៏ជាឧបករណ៍ដែលពិបាកធ្វើជាងគេ ក្នុងចំណោមតួនានានៃខ្លែងឯកខ្មែរ។ ខាងក្រោមនេះជាបច្ចេកទេសមួយចំនួន ដែលបានលើកឡើងដោយលោក រឿង សារ៉េត អនុប្រធាន នាយកដ្ឋានអភិវឌ្ឍន៍វប្បធម៌ ក្នុងការធ្វើអោយឯកមានសំឡេងពីរោះ។

១- តម្រូវតាមទំហំខ្លែង ជាធម្មតា បើខ្លែងឯកមានស្លាប២ម៉ែត្រ គឺត្រូវធ្វើឧបករណ៍ឯកនេះ មានប្រវែងប្រមាណ២ម៉ែត្រលើសបន្តិចបន្តួច។

២- អត់ធ្មត់ និង ស្ងៀមស្ងាត់

ជាការពិតណាស់ ដើម្បីបិតដងឯក និងអណ្ដាតឯកឲ្យស្ដើងល្អបាន គេត្រូវមានភាពអំណត់ព្យាយាម សមាធិផងដែរ ដើម្បីអាចសម្រេចកិច្ចការងារនេះបាន ព្រោះថាបើបិតលំអៀងតែបន្តិច គឺច្បាស់ជាធ្វើឲ្យឯកប្ដូរសំឡេងមិនខាន។

៣- ជ្រើសរើសឫស្សីសម្រាប់ដងឯក

ចំពោះឫស្សី ដែល ត្រូវយកមកធ្វើជាដងឯក គឺវាជាប្រភេទឫស្សីស្រុក ឫស្សីពីងពុង ឬ តំបន់ខ្លះគេយកដើមត្រាំងមកធ្វើក៏បាន។ អ្វីដែលល្អជាងគេគឺឫស្សីស្រុកមានដើមត្រង់ល្អ មានសាច់ក្រាស់និងចាស់ល្អ ព្រោះវាមានលក្ខណៈរលាស់ល្អជាងឈើដទៃ។ ពេលកាប់បានហើយ គេត្រូវយកវាមកដាំទឹក រួចហាលថ្ងៃប្រមាណមួយខែ ទៅមួយខែកន្លះដើម្បីកុំអោយខ្មូតស៊ី។

៤- ជ្រើសរើសផ្ដៅសម្រាប់ អណ្ដាតឯក

ផ្ដៅដែលយកមកប្រើសម្រាប់អណ្ដាតឯក គឺត្រូវតែមានដើមត្រង់ មានសាច់ម៉ត់ល្អ និង ខ្លឹមទៀតផង។

៥- អណ្ដាតឯក

ប្រសិនបើខ្លែងតូច គេអាចធ្វើអណ្ដាតឯកពីស្លឹកត្នោត ហើយបើខ្លែងធំវិញ គឺគេធ្វើពីផ្ដៅ។ ចំណែកខ្លែងធំៗបំផុត គេក៏អាចយកឫស្សីមកធ្វើផងដែរ។ អណ្ដាតឯកនេះគឺមានលក្ខណៈស្ដើង បំផុត ហើយចំណុចពកនៅចុងសងខាងនៃអណ្ដាតនេះ គេហៅថា "បូ" សម្រាប់ដាក់ថែមថយ ក្រមួនពេលថ្លឹងអណ្ដាតឯក។

៦- ជ្រើសរើសខ្សែឯក (សាយ) ខ្សែឯកគឺជាខ្សែដែលចងភ្ជាប់អណ្ដាតឯកទៅនឹងដងឯកសម្រាប់ឲ្យវាមានចលនាវិលទៅមកពេលខ្យល់បក់ហើយខ្សែមួយនេះគេអោយឈ្មោះថា "សាយ"។ ខ្សែឯកដែលយកមកចង អាចជាខ្សែនីឡុងក៏បាន ឬ ខ្សែសូត្រដែលត្របាញ់ពីសរសៃនៃស្លឹកម្នាស់ក៏បាន។

៧- សាកល្បងគ្រវី បន្ទាប់ពីធ្វើឯករួចរាល់ហើយ ជាចាំបាច់គេត្រូវធ្វើការគ្រវីសាកល្បង ដើម្បីឲ្យដឹងពីសំឡេងរបស់ឯកដែលទើបធ្វើរួច។ ប្រសិនបើសំឡេងមិនទាន់ល្អ គេត្រូវថែមថយដោយបិតក្រមួន ទៅលើបូ គឺធ្វើយ៉ាងណារហូតទាល់តែឯកមានសំឡេងពីរោះ។

លោកបន្ថែមថា ខ្លែងឯកខ្មែរដែលល្អបំផុតគឺអាចមានសំឡេងដល់ទៅ៦ ឬ ៧បែបឯណោះនៅពេលបង្ហោះឡើងលើអាកាស។ ប៉ុន្តែសម្រាប់ការគ្រវីនៅផ្ទាល់ដីវិញគឺវាមានត្រឹមតែ៣ ឬ ៤ សំឡេងប៉ុណ្ណោះ៕