វឌ្ឍនាកា និង បែ មករា នឹងមកកម្ពុជាវិញរសៀលថ្ងៃនេះ

2016-11-08 03:44:03
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីទៅហ្វឹកហាត់ និងពិភាក្សាការងារមួយចំនួននៅក្លឹប Fujieda MYFC មួយរយៈពេលខ្លីមក អ្នកចាត់ការទូទៅក្លឹបបឹងកេតអង្គរ បែ មករា និងកីឡាករ ចាន់ វឌ្ឍនាកា ត្រូវវិលត្រឡប់មកស្រុកកំណើតថ្ងៃនេះវេលាម៉ោង៣:៤៥នាទី។

លោក បែ មករា បានឲ្យដឹងពីដំណើរទស្សនកិច្ចហ្វឹកហាត់នៅប្រទេសជប៉ុនជាមួយក្លឹប Fujiedaថា ការងារដែលលោកបានពិភាក្សាជាមួយក្លឹបនៅជប៉ុននេះមានដូចជា ការបង្កើតសាលាបាល់ទាត់ថ្នាលរួមគ្នា ការដោះដូរកីឡាករទៅវិញទៅមក និងគ្រោងការប្រកួតមិត្តភាពរវាងក្រុមទាំងពីរ។

លោកបន្តឲ្យដឹងទៀតថា ការហ្វឹកហាត់របស់ ចាន់ វឌ្ឍនាកានៅទីនោះទទួលបានការចាប់អារម្មណ៍ខ្លាំងពីគ្រូបង្វឹកក្លឹប Fujieda ហើយក្លឹបជប៉ុននេះក៏ចង់បានកីឡាករកម្ពុជារូបនេះក្នុងលក្ខណៈខ្ចីជើងដើម្បីជួយក្លឹបនៅរដូវកាល២០១៧។

ចំណែកព័ត៌មានដែលលើកឡើងថា ក្លឹប Fujieda ចង់ជួយជ្រោមជ្រែង ចាន់ វឌ្ឍនាកាឲ្យបានលេងនៅលីគជប៉ុននោះ ត្រូវបានអ្នកចាត់ការទូទៅរបស់បឹងកេតអង្គរបញ្ជាក់ថា តាមពិតប្រធានក្លឹប Fujieda ពេលញុំាអាហារជុំគ្នាបាននិយាយលេងជាមួយ ចាន់ វឌ្ឍនាកាថា មកលេងនៅទីនេះទៅ ហើយបើលេងបានល្អ លោកនឹងជួយឲ្យបានលេងនៅលីគជប៉ុន។ នេះគ្រាន់តែជាការនិយាយលេងតែប៉ុណ្ណោះ។

សម្រាប់ដំណើរការទៅហ្វឹកហាត់នៅជប៉ុនរបស់ ចាន់ វឌ្ឍនាកា ប្រៀបដូចជាទៅធ្វើតេស្តដូច្នោះដែរដោយទទួលបានការចាប់អារម្មណ៍យ៉ាងខ្លាំងពីអ្នកគាំទ្រនៅកម្ពុជា ហើយបណ្តាញសារព័ត៌មានផ្សេងៗនៅអាស៊ីក៏បានចុះផ្សាយដែរ៕

អត្ថបទ៖ ជាន ចាន់រ៉ា