ថៃប៉ងចង់បានប្រាសាទដំរីទ្រោមច្រើនដង តែមិនបានសម្រេច

2016-11-08 07:36:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ថៃបានប៉ុនប៉ងគាស់រំលើងថ្មភ្នំរូបរាងដូចដំរីលុតក្រាបឲ្យស្ដេចគង់លើខ្នង តែបារមីដំរីទ្រោមធ្វើឲ្យថៃមិនអាចយកទៅបាន ស្របពេលដែលកងទ័ពខ្មែរវាយបណ្ដេញចេញកាលពីអំឡុងឆ្នាំ ២០១១ កន្លងទៅ។ នេះជាការលើកឡើងរបស់អនុសេនីយ៍ត្រី ថន ប៊ុនធឿន កងអនុសេនាធំវិស្វកម្មកងពលតូចលេខ ៤២ ប្រចាំប្រាសាទតាមាន់ ស្ថិតនៅក្នុងខេត្តឧត្តរមានជ័យ។

*ថ្មភ្នំរូបរាងដូចដំរីទ្រោម ដែលថៃចង់បាន*

ក្រោយពីសមាហរណកម្មឆ្នាំ ១៩៩៧ ហើយកងទ័ពខ្មែរក្រហមបានចុះពីលើប្រាសាទតាមាន់ស្ថិតនៅលើជួរភ្នំដងរែក នៅអំឡុងឆ្នាំ ១៩៩៩ ហើយគ្រានោះថៃបានឆ្លៀតមកលើប្រាសាទនេះហើយបានប៉ុនប៉ងដាប់យកថ្មភ្នំ រូបរាងដូចដំរីទ្រោម ប៉ុន្តែមិនបានសម្រេច ហើយកងទ័ពរាជរដ្ឋាភិបាលបានវាយរុញច្រានថៃនៅអំឡុងឆ្នាំ ២០១១។ លោក អនុសេនីយ៍ត្រី ថន ប៊ុនថឿន លើកឡើងបន្ថែម។

*កងទ័ពប្រចាំនៅប្រាសាទតាមាន់

បន្ទាប់ពីមានការប៉ះទង្គិចរវាងកងទ័ពកម្ពុជា-ថៃ រួចមក សម្ដេចព្រះអគ្គមហាសង្ឃរាជាធិបតី ទេព វង្ស សម្ដេចព្រះមហាសង្ឃរាជ នៃព្រះរាជាណាចក្រកម្ពុជា លោកគ្រូអគ្គបណ្ឌិត ប៊ុត សាវង្ស និង ឧបាសក ហែម សុខមាន បានសម្រេចកសាងវិហាររួមគ្នាមួយសម្រាប់ឧទ្ទិសដល់បារមីដំរីទ្រោម បច្ចុប្បន្នហៅថា ប្រាសាទដំរីទ្រោម។

អនុសេនីយ៍ត្រី ថន ប៊ុនថឿន មានប្រសាសន៍ប្រាប់ក្រុមការងារ "ផ្លូវទៅស្រុក" ថា ទាំងពុទ្ធបរិស័ទ ក៏ដូចជាកងទ័ពឈរជើងនៅលើខ្នងភ្នំដងរែកនេះ តែងតែមានជំនឿលើប្រាសាទដំរីទ្រោម ព្រោះការបន់ស្រន់រមែងបានជោគជ័យ។ "កងទ័ពបន់ស្រន់កុំឲ្យការពើបប្រយុទ្ធរងគ្រាប់ថៃ គឺសម្រេចដូចបំណង ហើយបញ្ចៀសការស្លាប់ផង និងឈ្នះអស់មារសត្រូវផង។ បារមីដំរីទ្រោមខ្លាំងទើបគ្រប់គ្នាជឿ ហើយថៃក៏ចង់បានដំរីទ្រោមនេះដែរ"៕