មន្ទីរទេសចរណ៍ខេត្តកំពត បង្កើតគេហទំព័របង្កើនការផ្សព្វផ្សាយទាក់ទាញភ្ញៀវទេសចរ

2016-11-22 07:04:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីជំរុញការផ្សព្វផ្សាយពីសក្ដានុពលទេសចរណ៍នៃខេត្តកំពត អាជ្ញាធរខេត្តកំពតគ្រោងបង្កើតគេហទំព័រផ្លូវការ ដើម្បីបង្ហាញពីតំបន់ទេសចរណ៍នានានៃខេត្តជាប់សមុទ្រមួយនេះ។

លោក សយ ស៊ីណុល ប្រធានមន្ទីរទេសចរណ៍ខេត្តកំពតបានឲ្យដឹងថា ខេត្តកំពតមានរមណីយដ្ឋានទេសចរណ៍ជាច្រើនកន្លែងទាំងធម្មជាតិ វប្បធម៌ ប្រវត្តិសាស្ត្រ និងកែច្នៃ ប៉ុន្តែភ្ញៀវទេសចរជាច្រើនមិនទាន់ស្គាល់ច្រើនក្រៅពីតំបន់កម្សាន្តមួយចំនួន ដែលភ្ញៀវដឹងតាមៗគ្នា។

លោកថា មន្ទីរកំពុងជំរុញក្នុងការបង្កើតគេហទំព័រ ដើម្បីផ្សព្វផ្សាយពីធនធានទេសចរណ៍ខេត្តកំពតដើម្បីជំរុញកំណើនភ្ញៀវទេសចរណ៍មកកម្សាន្តបន្ថែមទៀត។

ភ្នំបូកគោ

សំណង់អាណានិគមបារាំងនៅក្រុងកំពត

គម្រោងបង្កើតគេហទំព័រទេសចរណ៍ខេត្តកំពត មានការជួយគាំទ្រពីក្រសួងទេសចរណ៍ដោយផ្តោតលើខេត្តគោលដៅជាប់សមុទ្រចំនួន ៣ មានខេត្តកំពត កែប និងកោះកុង។

លោកប្រធានមន្ទីរបន្តថា ខេត្តកំពតមានសក្ដានុពលលើវិស័យទេសចរណ៍ ហើយការទាក់ទាញភ្ញៀវទេសចរមកកម្សាន្តកាន់តែច្រើន នឹងជួយដល់ការអភិវឌ្ឍសេដ្ឋកិច្ចខេត្តឆ្នេរសមុទ្រមួយនេះនិងបង្កើតប្រភពចំណូលដល់ពលរដ្ឋក្នុងមូលដ្ឋាន។

ខេត្តកំពតមានតំបន់ទេសចរណ៍ចំនួន ១៤ កន្លែង និងសហគមន៍ទេសចរណ៍ចំនួន ៤ កន្លែង សម្រាប់បម្រើភ្ញៀវទេសចរមកកម្សាន្ត។

តាមទិន្នន័យពីមន្ទីរទេសចរណ៍ខេត្តកំពតបានឲ្យដឹងថា ក្នុងឆ្នាំ ២០១៥ ចំនួនភ្ញៀវទេសចរជាតិនិងអន្តរជាតិមកកម្សាន្តខេត្តកំពតមានជិត ១ លាននាក់។ កន្លែងកម្សាន្តដែលទាក់ទាញបំផុតមានរមណីយដ្ឋានបូកគោ ទឹកឈូ ជាដើម។