អ្នកចូលរួម Ford Adventure ចែករំលែក ៦ ចំណុចពីគន្លឹះបោះជំរំលើកដំបូង

2016-12-13 10:36:50
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ក្រុមហ៊ុន RMA ដែលជាក្រុមហ៊ុននាំចូលថរយន្ត Ford មកកាន់ប្រទេសកម្ពុជាបានរៀបចំដំណើរកម្សាន្តអតិថិជន Ford ទៅកាន់ប្រទេសថៃ ដោយនៅក្នុងនោះមានកម្មវិធីបោះជំរំផងដែរ។ អតិថិជនម្នាក់ក្នុងចំណោមអ្នកចូលរួមកម្មវិធី Ford Adventure 2016 ជាង៤០០នាក់ បានចែករំលែកបទពិសោធន៍អំពីការបោះជំរំប្រកបដោយសុវត្ថិភាព និង ធ្វើឲ្យដំណើរកម្សាន្តកាន់តែរីករាយ។

លោក ឈឹម វឌ្ឍនា អាយុ ២៥ ឆ្នាំ ដែលបានចូលរួមដំណើរកម្សាន្តអតិថិជន Ford (Ford Adventure 2016) បានប្រាប់ Sabay ថា ដ្បិតតែទើបបានចូលរួមកម្មវិធីនេះលើកដំបូង ប៉ុន្ដែ លោកទទួលបានបទពិសោធន៍ដ៏អស្ចារ្យនៃដំណើរកម្សាន្តមួយនេះ ជាពិសេសការបោះជំរំប្រកបដោយសុវត្ថិភាព។ តាមរយៈបទពិសោធន៍បោះជំរំលើកនេះ លោកមាន ៦ចំណុចដើម្បីចែករំលែក គឺ៖

ទី១. ការជ្រើសរើសទីតាំង៖ យើងមានតង់ហើយ ប៉ុន្ដែ មិនមែនចេះតែបោះតង់គ្រប់ទីកន្លែងនោះទេ។ យើងត្រូវរកទីតាំងដីរាបស្មើ មិនមានសំណើម និង មិនមែនជាកន្លែងហូរជាដើម។ ដូច្នេះធ្វើការគេងរបស់យើងអាចលង់លក់ស្រួលនៅក្នុងដំណើរកម្សាន្តបែបផ្សងព្រេងមួយនេះ។

ទី២. ភ្លើង៖ យើងត្រូវតែត្រៀមឲ្យរួចរាល់នៅឧបករណ៍មួយចំនួនដូចជា ដែកកេស និង ពិលជាដើម។ ដែកកេសមានប្រយោជន៍យើងអាចប្រើបានជាការបង្កាត់ភ្នក់ភ្លើងអាំងសាច់ផង ឬ បញ្ចុះសីតុណ្ហភាពត្រជាក់ផង មួយទៀតជួយបំភ្លឺជុំវិញតង់យើងបណ្ដេញសត្វមួយចំនួនផង។ ឯពិល គឺយើងអាចប្រើប្រាស់បាននៅពេលយើងចង់បំភ្លឺផ្លូវជាដើម ឬ អាចបំភ្លឺតង់ឲ្យភ្លឺក៏បានតាមតម្រូវការផ្សេងៗគ្នា។

ទី៣. សម្ភារៈការពាររងា៖ ជាទូទៅការបោះជំរំច្រើនធ្វើនៅក្នុងព្រៃ ឬ ក្បែរភ្នំ និងវាលលំហ ក្នុងរដូវត្រជាក់ ដូច្នេះ អាកាសធាតុចង់មិនចង់គឺត្រជាក់ ហើយពេលខ្លះមានសំណើមក៏មាន។ ម៉្លោះហើយយើងត្រូវមានអាវរងា ឬ ភួយត្រៀមទុកដណ្ដប់ជាដើម។

ទី៤.ក្រូចសើច៖ ក្រូចសើចត្រូវមានជាប់ខ្លួន ព្រោះក្រូចសើចអាចការពារសត្វពស់មិនឲ្យមកក្បែរតង់របស់យើងព្រោះតែក្លិននៃក្រូចសើចនេះ។ វាពិតជាសំខាន់ យើងត្រូវជិតខ្លះ និង ដាក់ទាំងមូលខ្លះនៅជុំវិញ ឬក្នុងតង់របស់យើងកំពុងដេកជាដើម។

ទី៥. ព្រីភ្លើង៖ ការធ្វើដំណើរផ្លូវឆ្ងាយ យើងមានឧបករណ៍អេឡិចត្រូនិក ជាច្រើនដូចជា ទូរសព្ទ Power bank ឡេបថប ម៉្លោះហើយ យើងត្រូវមានព្រីភ្លើង ទុកសម្រាប់ដោតសាកថ្ម នូវវត្ថុទាំងនោះ។ ម្យ៉ាងវិញទៀតយើងដើរផ្លូវឆ្ងាយ និង ជាក្រុមធំ អីចឹង មិនមែនមានព្រីភ្លើងឲ្យគ្រប់គ្នាទេ ព្រោះគេក៏ប្រើ យើងក៏ប្រើ ដូច្នេះ បើយើងមានខ្លួនឯង អាចជួយសម្រួលបានច្រើនសម្រាប់ទុកដោតភ្លើង នៅពេលកន្លែងណាមានភ្លើងយើងអាចត រួចយកមកដោតភ្លើងសាកនូវឧបករណ៍របស់យើងបាន។

ទី៦. ស្បែកជើង៖ ការធ្វើដំណើរផ្លូវឆ្ងាយដែលត្រូវឆ្លងកាត់តំបន់ព្រៃភ្នំជាច្រើន ដូច្នេះ គួរមានស្បែកជើងសម្រាប់ឡើងភ្នំ ដូចជា ស្បែកជើងប៉ាតា និងស្បែកជើងផ្ទាត់ សម្រាប់ដើរនៅផ្លូវវាលទំនាបជាដើម។ ធ្វើដូចនេះធ្វើការធ្វើដំណើរបានលឿនផង និង មិនសូវឈឺជើងផង។ បើយើងគេងបោះតង់នៅពេលត្រូវការចេញទៅបត់ដៃ បត់ជើង យើងអាចប្រើស្បែកជើងផ្ទាត់បាន មិនចាំបាច់ប្រើស្បែកជើងប៉ាតារហូតនោះទេ។

លោក វឌ្ឍនា បាននិយាយទៀតថា តាមពិតទៅនៅមានចំណុចជាច្រើនទៀត ប៉ុន្តែ អ្វីដែលបានលើកឡើងខាងលើនេះ គ្រាន់តែជាបទពិសោធន៍មួយ ទទួលបានពីការចូលរួមដំណើរកម្សាន្តអតិថិជន Ford (Ford Adventure 2016) កាលពីថ្ងៃទី ៨-១១ ខែធ្នូ ដែលបានធ្វើដំណើរពីភ្នំពេញទៅបោះជំរំ នៅខេត្តឧត្តរមានជ័យ១យប់ និង បោះជំរំ ២យប់ នៅខេត្តសុរិន្ទ ប្រទេសថៃ។

ក្រៅពីបទពិសោធន៍នៃការបោះជំរំ ដ៏ល្អឥតខ្ចោះ លោក ឈីង បាននិយាយថា ដំណើរកម្សាន្ត Ford Adventure 2016 កាលពីពេលថ្មីៗនេះ លោកបានដឹងច្រើនអំពីតំបន់កម្សាន្ត ក៏ដូចជា បង្កើតទំនាក់ទំនងល្អរវាងក្រុមហ៊ុន និង អតិថិជន Ford ជាច្រើនទៀត ដែលបានចូលរួមកម្មវិធីនេះ៕

សូមទស្សនាវីដេអូខាងក្រោមនេះ