ខាត់ សុឃីម៖ ឈឺចាប់ណាស់គេថា ខ្ញុំចាត់ទុកឪពុកជាមនុស្សឆ្កួត

2016-12-20 03:16:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ខាត់ សុឃីម បានរៀបរាប់ថានាងឈឺចាប់ណាស់ ដែលមានមនុស្សមួយចំនួនចោទនាង និងបងប្អូនទាំង៩នាក់ថាមើលងាយឪពុកខ្លួន រហូតមានពាក្យមួយឃ្លាថា" ឪពុកខាត់ រៀបរាប់ទាំងទឹកភ្នែកថា ពួកខ្ញុំចោទគាត់ជាមនុស្សឆ្កួត"។ ដែលការចោទនេះ ខាត់ សុឃីម ថាទើបនឹងកើតឡើងកាលពីម្សិលមិញ ក្រោយមានការផុសផុលនៅក្នុងបណ្តាញសង្គមហ្វេសប៊ុក។

"ឈឺចាប់ ហើយខឹងខ្លាំងណាស់ ទាំងបងប្អូនខ្ញុំមិនបានដឹងរឿងអីសោះ ហេតុអីសុខៗគេមកនិយាយ បញ្ឆេះគ្រួសារខ្ញុំបែបនេះ ពួកខ្ញុំរស់នៅមានសេចក្តីសុខហើយ សុំកុំព្យាយាមយកឪពុកខ្ញុំមកពាក់ព័ន្ធ គាត់ចាស់ហើយ។" សុឃីម ថ្លែង។

ឆ្លើយតបនឹងការចោទខាងលើតារាស្រីរូបនេះអះអាងថា មិនមែនជាការពិតឡើយ ឪពុកម្តាយជាអ្នកមានគុណ មានហេតុផលអីដែលនាងត្រូវនិយាយប្រមាថឪពុកបែបនេះ។ យ៉ាងណាមិញជុំវិញការចោទប្រកាន់នេះតារាពហុជំនាញរូបនេះប្រាប់ថា ស្ថិតក្នុងនិន្នាការនយោបាយ តែនាងសុំកុំយករឿង សិល្បៈនិងនយោបាយមកពាក់ព័ន្ធគ្នា។

"ឪពុកម្ដាយជាអ្នកមានគុណ គ្មានហេតុផលណាដែលពួកខ្ញុំប្រមាថគាត់បែបនេះឡើយ ហើយ មានខ្លះទៀត និយាយថា កូនទាំង ៩ នាក់អត់ប្រយោជន៍...សួរដូចឆោត?កាត់កាលគាត់បានអីមកវិញ ?បើគាត់ចំណាស់ហ្នឹងហើយ មានតែកុំអោយគាត់គិតច្រើន ខឹងច្រើន ធ្វើអោយគាត់សប្បាយចិត្ត ព្រោះ គាត់មានជំងឺលើសឈាម អញ្ចឹង ពេលគាត់ឈឺ មានអ្នកទាំងអស់គ្នាមើលថែពុកខ្ញុំអត់ គឺអត់ គឺមានតែ ពួកខ្ញុំទេដែលមើលថែគាត់ ចឹង សូមកុំរំខានពួកខ្ញុំអីពួកខ្ញុំបានសុខហើយ"។ សុឃីម បន្ថែម។

ចុងក្រោយ ខាត់ សុឃីម សំណូមពរដល់អ្នកដែលបានលើកករណីមិនសមស្របខាងលើពាក់ព័ន្ធនឹងឪពុកនាង កុំឲ្យមានការយល់ច្រឡំ ហើយសូមឲ្យបញ្ឈប់រាល់ការចុះផ្សាយអ្វីដែលមិនមែនជាការពិត និងសូមកុំយកសេចក្តីសុខគ្រួសារនាងមកលេងសើចបែបនេះទៀត៕