ព្រះអង្គខ្មៅ សល់ពីសម័យស្ដេចកន ធ្វើពីសំរឹទ្ធព្រះនេត្រដាំពេជ្រ ល្បីមានបារមីខ្លាំងក្លា

2016-12-23 01:01:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រះអង្គខ្មៅ ជាព្រះពុទ្ធរូបតែមួយអង្គគត់ ដែលនៅសល់តាំងពីសម័យហ្លួងព្រះស្ដេចកន នៅចន្លោះសតវត្សទី១៥-១៦។ ព្រះអង្គខ្មៅ បច្ចុប្បន្នស្ថិតនៅវត្តព្រៃអង្គរក្នុង ភូមិបន្ទាយព្រៃនគរ ឃុំដូនតី ស្រុកពញាក្រែក ខេត្តត្បូងឃ្មុំ គឺធ្វើឡើងពីមាសខ្មៅ លាយជាមួយសំរឹទ្ធិ និងព្រះនេត្រដាំពេជ្រ ហើយល្បីថាមានបារមីសក្ដិសិទ្ធិណាស់ ខណៈអ្នកធំៗមន្ត្រីរាជការ និងអ្នកនៅក្រៅប្រទេស ក៏តែងទៅបន់ស្រន់បានសម្រេចដូចបំណង។

ព្រះអង្គខ្មៅ តែមួយអង្គគត់ ដែលសល់ពីសម័យស្តេចកន

ព្រះតេជគុណ មុំ កុសល គ្រូសូត្រនៅវត្តព្រៃអង្គរ មានសង្ឃដីកាប្រាប់ដល់ក្រុមការងារ «ផ្លូវទៅស្រុក» ថា ព្រះអង្គខ្មៅមួយអង្គនេះ គឺជាព្រះពុទ្ធរូបតែមួយគត់ ដែលសល់ពីសម័យហ្លួងព្រះស្ដេចកន។ តាមពិតសម័យស្ដេចកន ព្រះអង្គបានសាងរូបសំណាកព្រះពុទ្ធរូបជាច្រើនអង្គសុទ្ធតែធ្វើពីមាសខ្មៅលាយសំរឹទ្ធិ ប៉ុន្តែរហូតដល់សព្វថ្ងៃបាត់បង់ស្ទើរទាំងអស់ហើយ នៅសល់តែព្រះអង្គខ្មៅមួយអង្គនេះប៉ុណ្ណោះ។

«សម័យស្ដេចកន ព្រះអង្គខ្មៅមានបារមីឫទ្ធិខ្លាំងក្លាណាស់ នៅពេលដែលមេទ័ពចេញច្បាំងជាមួយសៀមតែងបន់ស្រន់ និងទទួលបានជ័យជម្នះ។ បច្ចុប្បន្នប្រជាពលរដ្ឋនៅខេត្តត្បូងឃ្មុំ ខេត្តផ្សេងៗ ឬអ្នកក្រៅប្រទេសក៏តែងមកបន់ស្រន់សុំសេចក្ដីសុខ និងបួងសួងសុំឲ្យក្ដីប្រាថ្នាជាដើម ហើយពេលខ្លះមានអ្នកមកបន់ដល់ម៉ោង១២យប់ក៏មាន ព្រោះតែពួកគេនៅឆ្ងាយ។ ភាគច្រើនពួកគេតែងទទួលបានសម្រេច ហើយក៏មកថ្វាយព្រះពុទ្ធរូបនៅវត្តនេះ»។ ព្រះតេជគុណ កុសល មានសង្ឃដីកាបន្ថែម។

សូមទស្សនាវីដេអូ៖

គ្រូសូត្រនៅវត្តព្រៃអង្គរ បានបន្ថែមថា ព្រះអង្គខ្មៅ ធ្លាប់មានចោរលួចច្រើនដងមកហើយ ប៉ុន្តែមិនបានសម្រេចទេ។ ចោរទាំងនោះមិនអាចយកព្រះអង្គចេញពីតំបន់បន្ទាយព្រៃនគរស្ដេចកនបានឡើយ។ ព្រះអង្គខ្មៅមានរូបរាងតូចទេ ប៉ុន្តែមនុស្ស៣នាក់មិនអាចលើករួច។ ព្រះតេជគុណ កុសល បន្តថា សព្វថ្ងៃព្រះវិហារបើកតែមានពុទ្ធបរិស័ទទៅបន់ស្រន់ប៉ុណ្ណោះ ហើយតែងបិទទ្វារជាប្រចាំ។ ពេលយប់គឺចាក់សោដាក់គន្លឹះក្នុង និងមានសង្ឃ៤ទៅ៥អង្គ សឹងនៅក្នុងព្រះវិហារ ដើម្បីការពារព្រះអង្គខ្មៅ ក្រែងមានចោរលួច៕