អ៊ុង វីរៈ ក្លាយជាម្ចាស់ខ្សែក្រវាត់នៅ PNN ក្រោយពីឈ្នះថៃមុននេះបន្តិច
- 2016-12-24 06:50:38
- ចំនួនមតិ 0 | ចំនួនចែករំលែក 0
អ៊ុង វីរៈ ក្លាយជាម្ចាស់ខ្សែក្រវាត់នៅ PNN ក្រោយពីឈ្នះថៃមុននេះបន្តិច
ចន្លោះមិនឃើញ
អ្នកលេងគុនខ្មែរ អ៊ុង វីរៈ បានក្លាយជាម្ចាស់ខ្សែក្រវាត់សមរភូមិអ្នកប្រយុទ្ធភេសជ្ជៈគោជល់ របស់ស្ថានីយទូរទស្សន៍ PNN ក្រោយពីយកឈ្នះកីឡាករជើងខ្លាំងថៃ កាំឡៃផេត ដោយពិន្ទុនៅមុននេះបន្តិច។
ការប្រកួតវគ្គផ្ដាច់ព្រ័ត្ររវាងជើងខ្លាំងខ្មែរនិងថៃ នៅសង្វៀន PNN នេះ ពិតជាកក្រើកមែនទែន ដោយធ្វើឱ្យអ្នកគាំទ្រអង្គុយមិនជាប់កៅអីនោះទេ។ អ៊ុង វីរៈ បើកការវាយសម្រុកតាំងពីទឹកទី១ ខណៈដែលថៃវិញ ក៏មិនណយដែរ ដោយទាត់កីឡាករមកពីក្លឹបទ័ពពិសេសឆ័ត្រយោង៩១១ ចំៗចំណុចតែម្ដង។ យ៉ាងណាមិញ កូនសិស្សរបស់លោកគ្រូ ហង្ស ស៊ឺន ហាក់ដូចជាដឹងក្បាច់កីឡាករថៃហើយ ដោយបិទមុំជាប់បានល្អវិញ នៅទឹកក្រោយៗ រហូតទទួលបានលទ្ធផលជ័យជម្នះដោយពិន្ទុ។
ចំពោះប្រាក់រង្វាន់សម្រាប់ម្ចាស់ខ្សែក្រវាត់ខាងលើនេះ គឺទឹកប្រាក់ចំនួន២០លានរៀល ខណៈដែលកីឡាករថៃ កាំឡៃផេត ដែលបានជើងឯករកទទួលបាន១០លានរៀល។ ដោយឡែក កម្មវិធីសមរភូមិអ្នកប្រយុទ្ធភេសជ្ជៈគោជល់នឹងសម្រាកមួយសប្ដាហ៍ នៅថ្ងៃទី៣០ ខែធ្នូ ដោយសារតែជាប់រវល់កម្មវិធីពិសេស។ រដូវកាលថ្មី នឹងវិលមកវិញនៅថ្ងៃអាទិត្យ ទី០៨ ខែមករា ឆ្នាំ២០១៧ ចាប់ពីម៉ោង៤ដល់ម៉ោង៦ល្ងាច ដូចគ្រាដើមឡើងវិញ៕