ចូលរួមពិព័រណ៌វិទ្យាសាស្រ្ត វិស្វកម្មសិស្សសាលាវត្តស្វាយស្អែកនេះ អាចរៀនចេះផលិតសាប៊ូទៀតផង

2017-01-04 03:38:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអ្នកវិទ្យាសាស្ត្រវ័យក្មេងប្រចាំនៅវិទ្យាល័យហ៊ុន សែន វត្តស្វាយ ខេត្តសៀមរាប នឹងរៀបចំពិព័រណ៍វិទ្យាសាស្ត្រ បច្ចេកវិទ្យា វិស្វកម្ម STEM Fair 2017 ជាលើកទីមួយនៅខេត្តសៀមរាបថ្ងៃស្អែកនេះ។

យុវជន ស ហុកលី ប្រធានក្រុមវិទ្យាសាស្ត្រ និងវិស្វកម្មវ័យក្មេងប្រចាំនៅវិទ្យាល័យហ៊ុន សែន វត្តស្វាយដែលដឹកនាំរៀបចំកម្មវិធីពិព័រណ៍បានឲ្យដឹងថា ការរៀបចំពិព័រណ៍វិទ្យាសាស្ត្រ បច្ចេកវិទ្យា វិស្វកម្មនេះ គោលដៅចម្បងគឺចង់ជំរុញឲ្យយុវជនងាកមកចាប់អារម្មណ៍ផ្នែកវិទ្យាសាស្ត្រវិស្វកម្ម និងបង្កើតឱកាសឲ្យពួកគេអាចដាក់បង្ហាញស្នាដៃបច្ចេកវិទ្យានានា។

យុវសិស្សថ្នាក់ទី ១២ នេះបន្តថា ពិព័រណ៌ដែលនឹងរៀបចំពេញមួយព្រឹកបែងចែកជា ៥ កម្មវិធីធំៗមានដូចជាផ្នែកវិទ្យាសាស្ត្រ បច្ចេកវិទ្យា វិស្វកម្ម សិល្បៈគំនូរ និងគណិតវិទ្យា។

យុវសិស្សវ័យក្មេងពោរពេញដោយមហិច្ឆតារូបនេះបន្តទៀតថា ក្នុងពិព័រណ៍អ្នកចូលរួមក្រៅពីអាចទស្សនាការបង្ហាញស្នាដៃដូចជាការធ្វើរ៉ូបូត ការធ្វើឡានដោយប្រើចំហាយទឹក ការផលិតសាប៊ូ ការទស្សនាសិល្បៈគំនូរផ្សេងៗ ក៏អាចចូលរួមរៀនអនុវត្តជាមួយក្រុមការងារថែមទៀតផង។

បើតាមយុវជនរូបនេះមានការរំពឹងទុកសម្រាប់ការរៀបចំពិព័រណ៌នេះ ដែលនឹងជួយពញ្ញាក់ស្មារតីដល់យុវជនផ្តោតអារម្មណ៍មកសិក្សាស្រាវជ្រាវផ្នែកវិទ្យាសាស្ត្រឲ្យបានច្រើន ដើម្បីអភិវឌ្ឍប្រទេសជាតិឲ្យរីកចម្រើន។

ពិព័រណ៍វិទ្យាសាស្ត្រ បច្ចេកវិទ្យា វិស្វកម្ម (STEM Fair 2017 ) នឹងធ្វើឡើងពេញមួយព្រឹកនៅថ្ងៃស្អែកនេះចាប់ពីម៉ោង ៧ ០០ ដល់ ១១ ០០ ដែលទីតាំងនៅវិទ្យាល័យហ៊ុន សែនវត្តស្វាយក្នុងទីរួមខេត្តសៀមរាប៕

អត្ថបទ៖ ប៊ុណ្ណារ៉ា