អ្នកប្រើទន្ទឹងចាំកំណែប្រែថ្មីក្តារចុចឆ្លាតវៃ តែស្ថាបនិកនៅស្ងាត់ដំណឹងឈឹង

2017-01-05 04:28:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រហែលជាជិត ៤ ខែហើយតាំងពីចុងឆ្នាំ ២០១៦ ដែលស្ថាបនិកក្តារចុចឆ្លាតវៃ (Khmer Smart Keyboard) លោក គ្រុយ វណ្ណា បាត់ដំណឹងឈឹងគ្មានអ្នកដឹង បន្សល់ទុកក្តារចុចក្នុងកំណែប្រែចាស់គ្មានការអាប់ដេតថ្មី។

ក្រោយបាត់ដំណឹងលោក គ្រុយ វណ្ណា ក្តារចុចឆ្លាតវៃក៏បាត់ពី App Store ឯកំណែប្រែលើ Play Store ក៏មិនមានការអាប់ដេតថ្មីទាល់តែសោះ ធ្វើឲ្យអ្នកប្រើប្រាស់ជាច្រើនត្អូញត្អែរ។ មិត្តភ័ក្ដិ និងអ្នកប្រើជាច្រើនទន្ទឹងរង់ចាំវត្តមានស្ថាបនិក ក្រុម ALiEN DEV រូបនេះយ៉ាងអន្ទះសា ដោយអ្នកខ្លះមិនចង់ឲ្យលោកនិងក្រុមការងារ Khmer Smart Keyboard បោះបង់ក្តីស្រមៃចោលពាក់កណ្ដាលទីឡើយ។

មកទល់ពេលនេះ Sabay នៅតែមិនអាចទាក់ទងលោក គ្រុយ វណ្ណា បាន។ ទូរសព្ទពេលខ្លះខលចូល តែគ្មានអ្នកលើក ឯបណ្ដាញសង្គមផ្ញើសាទៅ ក៏គ្មានការឆ្លើយតប។

សម្រាប់កំណែប្រែក្តារចុចឆ្លាតវៃលើ iOS នៅតែ 2.1.3 ដដែល ឯ Android កំណែប្រែ 2.1.16 ដែលអាប់ដេតតាំងពីកញ្ញាឆ្នាំ ២០១៦ មកម្ល៉េះ។ លើ Play Store ក្ដារចុចឆ្លាតវៃ មានចំនួនទាញយកចន្លោះពី ៥០ម៉ឺន ដល់ ១លានដងឯណោះ។

ជុំវិញបញ្ហា ក្តារចុចឆ្លាតវៃបាត់ពី App Store ឯលោកគ្រុយ វណ្ណាក៏ស្ងាត់វត្តមានប៉ុន្មានខែចុងក្រោយនេះ អ្នកស្គាល់លោក វណ្ណា ច្រើននាក់ក៏ងឿងឆ្ងល់ដូចគ្នា។ អ្នកខ្លះថា ស្ថាបនិក ALiEN DEV រូបនេះទៅបរទេស (ជប៉ុន) ឯខ្លះទៀតថាក្រុមលោក មានបញ្ហាខ្លះៗ ទើបអាចឈានដល់ បាត់វត្តមានក្តារចុចឆ្លាតវៃពី App Store។

ដោយឡែកបើតាមគ្រួសារលោក វណ្ណា អាចប្រាប់បានត្រឹមថា លោកសុខសប្បាយ តែមិនអាចប្រាប់បានច្រើនជាងនេះឡើយ។

មូលហេតុពិតប្រាកដយ៉ាងណា គ្រប់គ្នានៅមិនទាន់ដឹងច្បាស់ មានតែលោក គ្រុយ វណ្ណាប៉ុណ្ណោះទើបអាចបកស្រាយរឿងទាំងអស់នេះបាន៕

អត្ថបទ៖ ផាន់និត