បាត់ខ្លួនជិត ៣ឆ្នាំ MH370 រកមិនឃើញពន្លឺ ការរុករកត្រូវផ្អាកមួយរយៈ
- 2017-01-17 08:26:17
- ចំនួនមតិ 0 | ចំនួនចែករំលែក 0
បាត់ខ្លួនជិត ៣ឆ្នាំ MH370 រកមិនឃើញពន្លឺ ការរុករកត្រូវផ្អាកមួយរយៈ
ចន្លោះមិនឃើញ
ការស្វែងរកជើងហោះហើរ ម៉ាឡេស៊ី MH370 រយៈពេលជិត ៣ឆ្នាំបានបញ្ចប់ដោយភាពបរាជ័យនាថ្ងៃអង្គារនេះ។ នេះបើតាមសារព័ត៌មាន Associated Press ។
ក្រុមស្រាវជ្រាវរុករក បានបំពេញបេសកកម្ម ស្វែងរកក្នុងសមុទ្រជ្រៅតាមបណ្ដោយមហាសមុទ្រ ឥណ្ឌា ដោយគ្មានរកឃើញ ស្នាមដាន ឬបំណែកអ្វីបន្តិចបន្តួចរបស់យន្តហោះនោះឡើយ។
ទីភ្នាក់ងារ របស់អូស្ត្រាលី ដែលបំពេញបេសកកម្ម រុករកយន្តហោះ Boeing 777 នោះ បានបញ្ជាក់ថា ការរុករកត្រូវបានពន្យារពេលសិន បន្ទាប់ពីក្រុមការងារស្វែងរក តាមផ្ទៃសមុទ្រ ១២០ ០០០គ.មការ៉េ ដោយពុំមានពន្លឺអ្វីសោះ ពីយន្តហោះនោះ។
“ពួកយើងបានប្រើប្រាស់ ធនធានបច្ចេកវិទ្យាទំនើបចុងក្រោយ ក៏ដូចជាអ្នកជំនាញជាច្រើនហើយ ប៉ុន្តែនៅតែមិនអាចរកឃើញ ទីតាំងរបស់យន្តហោះ (MH370) ឃើញឡើយ។" នេះបើតាមសេចក្ដីប្រកាសរួមគ្នារបស់ទីភ្នាក់ងាររុករកយន្តហោះអូស្ត្រាលី The Joint Agency Coordination Center ជាមួយ មន្ត្រីដឹកជញ្ជូនរបស់ ម៉ាឡេស៊ី។
ក្រុមអ្នកជំនាញក្នុងផែនការរុករកជើងហោះហើរបាត់ខ្លួន បានណែនាំឲ្យក្រុមការងាររុករកទៅកាន់តំបន់ថ្មីផ្សេងទៀត ក្រោយការវិភាគរួច យ៉ាងណាក្ដី រដ្ឋាភិបាលអូស្ត្រាលីដែលជ្រោមជ្រែងក្នុងបេសកកម្មរុករក MH370 នោះបានបដិសេធ។
រំលឹកផងដែរថា យន្តហោះដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ី បានបាត់ខ្លួនយ៉ាងអាថ៌កំបាំងកាលពីថ្ងៃទី០៨ ខែមីនា ឆ្នាំ២០១៤ ហើយឆក់យកជីវិតមនុស្ស ២៣៩នាក់ ពេលធ្វើដំណើរពីទីក្រុងកូឡាឡុំាពួរ ទៅកាន់ទីក្រុងប៉េកាំង ប្រទេសចិន។
ការរុករកជើងហោះហើរ MH370 គឺជាប្រតិបត្តិការធំបំផុតក្នុងប្រវត្តិសាស្ត្រ ដែលចំណាយប្រាក់អស់រាប់រយលានដុល្លារ និងមានការចូលរួមពីក្រុមការងារចម្រុះជាតិសាសន៍ជាច្រើនប្រទេស។ ក្រុមការងាររុករករបស់ប្រទេសអូស្ត្រាលី សង្ឃឹមថានឹងអាចរកឃើញយន្តហោះដែលបាត់ខ្លួនយ៉ាងអាថ៌កំបាំងនេះ នៅពេលឈានដល់តំបន់រុករកចុងក្រោយនាខែឧសភាឆ្នាំ២០១៥ កន្លងទៅ ប៉ុន្តែនៅតែគ្មានលទ្ធផលជាដុំកំភួនអ្វីឡើយ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
