ទោះបីពិការ ប្រាក់ សុផាន់ណា នឹងតស៊ូស្នេហាឲ្យដល់ទីបំផុត

2017-01-30 03:25:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីពិការ ដេកលើតែរទេះរុញក៏ពិតមែន តែ ប្រាក់ សុផាន់ណា ប្រាប់ថារូបគេក៏មានស្នេហ៍ស្មោះ ពិសេសពេលនេះ គេកំពុងតែមានស្នេហាជាមួយនារីម្នាក់ ដោយគេអះអាងថានឹងតស៊ូជាមួយស្នេហានេះឲ្យដល់ទីបំផុត។

ស្នេហានេះបានចាប់កំណើតរយៈពេល៨ឆ្នាំហើយ ប៉ុន្តែលោកមិនដែលនឹងទម្លាយប្រាប់នរណាម្នាក់នោះទេ ដោយសារចង់រកថវិការឲ្យបានច្រើន សម្រាប់ចិញ្ចឹមខ្លួន និងទុកទំនុកបម្រុងជីវិតនាពេលអនាគត ។ ប៉ុន្តែថ្មីៗនេះ ប្រាក់ សុផាន់ណា ប្រាប់ថាមិនអាចបន្តលាក់បាំងទៀតបានទេ ដោយសារសង្សារលោក ឈ្មោះ ស្រី ខួច បានយករូបលោកថតជាមួយគ្នាបង្ហោះក្នុងបណ្ដាញសង្គម ធ្វើឲ្យមានការចែកចាយតគ្នាជាច្រើន ដោយនាងបានភ្ជាប់មួយឃ្លាថា "មានតែគាត់ម្នាក់គត់ក្នុងបេះដូង អាណិតបំផុត ស្រលាញ់បំផុត"។

ទំនាក់ទំនងស្នេហាមួយនេះ អ្នកនិពន្ធបទស្នាដៃនិពន្ធថ្មីខាងលើ បន្តឲ្យដឹងទៀតថា មានការដឹងឮពីក្រុមគ្រួសារខាងស្រីរួចហើយ ហើយក៏មិនមានការហាមឃាត់អ្វីដែរ ប៉ុន្តែអ្វីដែលលោកចង់ផ្ដោតសំខាន់ពេលនេះ គឺការងារ។ ម្យ៉ាងទៀតលោកក៏សុំមិនទាន់រៀបរាប់លម្អិតទាក់ទិននឹងការស្រលាញ់គ្នានេះដែរ លោកថាបើសិនជាឱកាសល្អមានពេលណាលោកនឹងបង្ហាញ ក៏ដូចជារៀបរាប់ពីដើមកំណើតនៃស្នេហាមួយនេះទៅដល់បងប្អូនដែលតែងតែគាំទ្ររូបលោកកន្លងមក។

ម្ចាស់បទ "បរាជ័យជាមេរៀន" បន្ត៖ “ខ្លួនកំព្រាផង ពិការផង រកស៊ីចិញ្ចឹមតែខ្លួនម្នាក់មិនចង់គ្រាន់ទេបង ដូច្នេះរឿងអនាគតសុំមិនទាន់ហ៊ាននិយាយទេបង ប៉ុន្តែពួកយើងស្រលាញ់គ្នាខ្លាំង ហើយក៏សន្យាមិនបោះបង់ចោលគ្នាដែរ។ ដំបូងឡើយរឿងស្នេហាខ្ញុំមិនចង់គិតគូរប៉ុន្មានទេ ហើយរឹតតែមិនចង់ធ្វើបាបសង្សារដែរ ប៉ុន្តែយើងមិនអាចកាត់ផ្ដាច់មនោសញ្ចេតនាជាមួយគ្នាបាន ទោះធ្លាប់មានអ្នកនិយាយរិះគន់ពីយើងទាំងពីរនាក់ក៏ដោយ"។

សុផាន់ណា អះអាងថាមិនខ្វះទេអ្នកដែលរិះគន់រូបគេជាមួយសង្សារ ថាខ្លួនពិការមិនសមមានស្នេហាបែបនេះ។ ម្ចាស់បទ "ដើមត្នោត" ថាលោកសឹងតែបោះបង់មិនចង់ឲ្យសង្សារមានការឈឺចាប់នឹងការមើលងាយពីអ្នកដទៃដែលមកស្រលាញ់លោកដែលជាជនពិការ ប៉ុន្តែទាំងពីរនាក់នៅតែមិនបោះបង់គ្នា មកដល់ពេលនេះរយៈពេល៨ឆ្នាំ ដែលស្រលាញ់គ្នា។ក្នុងនោះដោយ សុផាន់ណា អាយុ២៦ឆ្នាំ រីឯសង្សារអាយុ២២ ហើយ។

បុរសកំព្រារូបនេះ បន្ថែម៖ "បើសិនជាការងារខ្ញុំល្អ ធ្វើបទស្នាដៃនិពន្ធថ្មីបានច្រើន មានគេស្គាល់ ចឹងក៏សម្បូរគេហៅខ្ញុំទៅច្រៀងដែរបង។ រាល់ថ្ងៃខ្ញុំច្រៀងនៅ ហាងមួយឯខេត្តសៀមរាប និងបង្រៀនភាសាអង់គ្លេសខ្លះៗដល់ក្មេងៗគ្រាន់បានកម្រៃចិញ្ចឹមជីវិត"។

ប៉ុន្មានថ្ងៃខាងមុខនេះបុរសពិការ ប្រាក់ សុផាន់ណា ប្រាប់ថានឹងមានត្រៀមចេញ MV បទថ្មីហើយ៕

អត្ថបទ៖ ថា ម៉ាលីដា

រូបភាព៖ ហ្វេសប៊ុក