តារាបាល់ទាត់លេចធ្លោកម្ពុជា ៨នាក់ មានសំណាងបានទៅលេងនៅបរទេស

2017-02-03 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលវិស័យបាល់ទាត់នៅកម្ពុជាកំពុងតែរីកដុះដាលខ្លាំង វិបសាយ Sabay សូមបង្ហាញប្រិយមិត្តឱ្យបានស្គាល់កីឡាករខ្លះៗដែលមានឱកាសបានទៅចូលលេងនៅក្លឹបក្រៅស្រុក៖

ទី១ កែវ សុខង៉ន

អតីតខ្សែប្រយុទ្ធជម្រើសជាតិកម្ពុជា កែវ សុខង៉ន បានចេញពីប្រទេសកំណើតទៅប្រកបអាជីពបាល់ទាត់នៅក្លឹប Samut Sakhon ដែលជាក្លឹបលេងនៅក្របខណ្ឌបាល់ទាត់លំដាប់ទី២របស់ប្រទេសថៃកាលពី ឆ្នាំ២០១០-២០១១។ នៅក្លឹបនេះរូបគេធ្លាប់បានបង្ហាញខ្លួនលើទីលានបាន២០ដង និងរកគ្រាប់បាល់បានចំនួន៩គ្រាប់។ អ្វីដែលពិសេសនេះ កីឡាករកម្ពុជារូបនេះត្រូវបានគេបោះឆ្នោតឲ្យក្លាយជាកីឡាករល្អ ក្នុងចំណោមកីឡាករ១១នាក់ផ្សេងទៀតនៅក្លឹបនេះ។

ទី២ ឃឹម បូរី

ឃឹម បូរី បានទៅលេងឲ្យក្លឹប Sisaket FC ដែលជាក្លឹបលេងនៅលីគបាល់ទាត់កំពូលថៃក្នុងឆ្នាំ២០១០-២០១១ជាលក្ខណៈខ្ចីជើង។ សម្រាប់ការបង្ហាញខ្លួននៅក្លឹបថៃមួយនេះបានធ្វើឲ្យ ឃឹម បូរីបានក្លាយជាកីឡាករកម្ពុជាទីមួយលេងនៅលីគបាល់ទាត់កំពូលថៃ។ នៅទីនោះ ឃឹម បូរី បានបង្ហាញខ្លួននៅលើទីលានបានប្រហែល៨ទៅ៩ប្រកួត។ នៅក្លឹបថៃនេះ បូរី អាចទទួលបានបៀវត្សរ៍ប្រហែលជិត៣ពាន់ដុល្លារអាមេរិក។

ទី៣ ចាន់ រិទ្ធី

កីឡាករកម្ពុជា ចាន់ រិទ្ធី ធ្លាប់បានលេងបាល់ទាត់នៅប្រទេសថៃរហូតដល់៣ក្លឹប និងធ្លាប់ទទួលបានប្រាក់ខែជាង១ពាន់ដុល្លារអាមេរិកចន្លោះឆ្នាំ ២០០៩-២០១០។ កីឡាកររូបនេះបានលេងនៅក្លឹបថៃ Thai Army នៅឆ្នាំ២០០៩ រយៈពេល៣ខែ និងបន្តលេងឲ្យក្លឹប Nakhon Pathon មុនពេលចុះកុងត្រាជាមួយក្លឹប Surin FC រដូវកាល២០០៩-២០១០។

ទី៤ ស៊ិន ដាលីន

ស៊ិន ដាលីន អតីតកីឡាករជម្រើសជាតិ និងក្លឹបបឹងកេតអង្គរ (ចម្ការកៅស៊ូបឹងកេត) ស៊ិន ដាលីន ធ្លាប់បានទៅប្រកបអាជីពបាល់ទាត់នៅក្លឹប Sa Kaeo United ដែលជាក្លឹបលេងនៅក្របខណ្ឌបាល់ទាត់តាមតំបន់របស់ប្រទេសថៃនៅរដូវ កាល២០១០-២០១១។ បន្ទាប់ពីដាច់ឆ្នាំ២០១១ លោក បែ មករា បានកោះហៅកីឡាកររូបនេះឲ្យមកលេងជាមួយក្លិបបឹងកេតអង្គរនៅឆ្នាំ ២០១២ដែលជារដូវកាលក្លឹបមកពីកំពង់ចាមនេះឈ្នះជើងឯកបាល់ទាត់កំពូល កម្ពុជា។

ទី៥ ចាន់ វឌ្ឍនាកា

តារាឆ្នើមជម្រើសជាតិកម្ពុជា ចាន់ វឌ្ឍនាកា បានបង្កើតកំណត់ត្រាជាប្រវត្តិសាស្ត្រក្នុងការក្លាយជាកីឡាករបាល់ទាត់កម្ពុជាទី១បានទៅប្រកបអាជីពនៅក្នុងទឹកដីនៃប្រទេសរីកចម្រើនផ្នែកបាល់ទាត់គឺជប៉ុន បន្ទាប់ពីប្រកាសផ្លូវការក្នុងសន្និសីទចុះហត្ថលេខាក្នុងលក្ខខណ្ឌខ្ចីជើង១រដូវកាលទៅក្លឹប Fujieda MYFC នារសៀលថ្ងៃទី១៣ ខែមករា ឆ្នាំ២០១៧នេះ។

ទី៦ ធារី ចន្ថាប៊ីន

កីឡាករកម្ពុជា ធារី ចន្ថាប៊ីន បានជាប់កំណត់ត្រាក្នុងការក្លាយជាកីឡាករអាស៊ានដំបូងគេបង្អស់ដែលបានចុះកុងត្រាលេងឲ្យក្លឹប Krabi FC ក្រោយពីរូបគេសម្រេចចិត្តចាកចេញពីក្រុមភ្នំពេញក្រោនទៅ។

ក្រៅពីកីឡាករទាំង៦នាក់នេះ Sabay ក៏នៅមានកីឡាករ២រូបទៀតដែរ ដែលធ្លាប់បានបង្ហាញខ្លួននៅក្លឹបប្រទេសថៃ គឺ ស្រី វាសនា និង សំអែល ណាសា។ ដោយកីឡាករទាំងពីរនាក់នេះ សុទ្ធតែជាអតីតកីឡាករកម្ពុជាដែលមានសមត្ថភាពទាំងអស់ ខណៈដែលទើបអ្នកស្រលាញ់វិស័យកីឡាមួយចំនួនអាចនឹងស្គាល់ក៏ថាបាន៕

អត្ថបទ៖ ជាន ចាន់រ៉ា